លោក ត្រាំ បានលើកឡើងថា ការដាក់ពន្ធគយជាគោលនយោបាយសំខាន់មួយ ដែលជួយការពារផលិតផលក្នុងស្រុក និងបង្កើនចំណូលសរុបរបស់រដ្ឋាភិបាល។ បន្ទាប់មករដ្ឋាភិបាលរបស់លោកក៏មានផែនការផ្តល់លុយជាផ្នែកពីចំណូលពន្ធ ជូនដល់ប្រជាពលរដ្ឋអាមេរិករាប់លាននាក់ ជាពិសេសអ្នកមានប្រាក់ចំណូលទាប និងមធ្យម ដោយម្នាក់ៗទទួលបានប្រហែល ២,០០០ ដុល្លារ ខណៈចំណូលដែលនៅសេសសល់ នឹងត្រូវយកទៅកាត់បន្ថយបំណុលជាតិ។

ក្នុងអំឡុងពេលនិយាយជាសាធារណៈ លោក ត្រាំ ក៏បានសរសើរដល់ការធ្លាក់ចុះនៃអតិផរណា ដែលកើតឡើងចាប់តាំងពីលោកឡើងកាន់តំណែង ដោយបញ្ជាក់ថា តម្លៃអាហារ និងថាមពលកំពុងធ្លាក់ថ្លៃ។ ទោះបីជាយ៉ាងណា តុលាការកំពូលបានបង្កការសង្ស័យចំពោះសិទ្ធិអំណាចនៃការដាក់ពន្ធនេះ ដោយចៅក្រម Amy Coney Barrett បានបញ្ជាក់ថា ច្បាប់អំណាចសេដ្ឋកិច្ចបន្ទាន់អន្តរជាតិ ឆ្នាំ ១៩៧៧ (IEEPA) មិនបានរៀបរាប់ច្បាស់អំពីសិទ្ធិប្រើប្រាស់ពន្ធគយឡើយ។

គួរជម្រាបផងដែរថា ប្រសិនបើតុលាការសម្រេចប្រឆាំងនឹងលោក ត្រាំ ពិតមែន ក្រុមហ៊ុននាំចូលអាមេរិកនឹងអាចទទួលសំណងជាង ១០០ពាន់លានដុល្លារ ត្រលប់មកវិញ ពីពន្ធដែលបានបង់រួច។ ការសម្រេចចុងក្រោយរបស់តុលាការនេះ នឹងក្លាយជាចំណុចសំខាន់ ដែលអាចកំណត់អនាគតសេដ្ឋកិច្ច និងគោលនយោបាយពាណិជ្ជកម្មរបស់សហរដ្ឋអាមេរិកនៅឆ្នាំខាងមុខ៕