ចាប់ពីពេលនេះទៅ អ្នកបង្កើតមាតិកានៅកម្ពុជា ដែលមានខ្លឹមសារល្អ និងមានភាពទាក់ទាញអ្នកទស្សនាច្រើននៅលើបណ្តាញសង្គម TikTok នឹងអាចរកចំណូលបានហើយ។ នេះបើយោងតាមប្រសាសន៍ ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ថ្លែងក្នុងក្នុងសិក្ខាសាលាផ្សព្វផ្សាយស្តីពីសុវត្ថិភាពលើប្រព័ន្ធអនឡាញ និងគោលការណ៍ណែនាំជាមួយក្រុមហ៊ុន TikTok នាថ្ងៃទី១៩ ខែមីនា ឆ្នាំ២០២៥។
ខាងក្រោមនេះ គឺជាលក្ខខណ្ឌទូទៅ សម្រាប់អ្នកចង់រកចំណូលតាមបណ្តាញសង្គម TikTok៖
សម្រាប់គោលការណ៍ Subscription៖
១. អ្នកផលិតមាតិកាត្រូវមានអាយុចាប់ពី 18ឆ្នាំឡើងទៅ
២. ត្រូវមានអ្នក Followers ចាប់ពី ១០០០០ ឡើងទៅ
៣. គោរពតាមគោលការណ៍នៃការផលិតមាតិការបស់ TikTok និង LIVE Policy
៤. ស្ថិតនៅក្នុងប្រទេសដែលអាចរកលុយជាមួយ Tik Tok បាន។
សម្រាប់កម្មវិធី TikTok Creativity Program (ពីមុនហៅថា Creator Fund)
១. ត្រូវមានគណនី Tik Tok មួយ និងផុសវីដេអូឱ្យបានទៀតទាត់
២. ត្រូវមានអ្នក Followers ចាប់ពី ១០០០០ ឡើងទៅ
៣. មានអ្នកមើលយ៉ាងហោចណាស់ ១០ម៉ឺនដងក្នុងរយៈពេល៣០ថ្ងៃចុងក្រោយ
៤. ស្ថិតនៅក្នុងប្រទេសដែលអាចរកលុយជាមួយ Tik Tok បាន។
គួរជម្រាបផងដែរថា ឯកឧត្តមបណ្ឌិត ជា វ៉ាន់ដេត បានលើកឡើងថា កាលពីពេលកន្លងមក អ្នកបង្កើតមាតិកាជាច្រើននៅកម្ពុជា បានស្នើទៅសម្តេចនាយករដ្ឋមន្រ្តី ដើម្បីឱ្យក្រុមហ៊ុន TikTok, Facebook និងបណ្តាញសង្គមផ្សេងទៀតផ្តល់ឱកាសក្នុងការរកចំណូលបានពីការបង្កើតមាតិកាផ្សព្វផ្សាយនៅលើបណ្តាញសង្គមទាំងនោះផងដែរ។ ហើយនាពេលខាងមុខ ក្រសួងនឹងបន្តខិតខំសម្របសម្រួលបន្ថែមទៀត ដើម្បីឱ្យអ្នកបង្កើតមាតិកានៅបណ្តាញសង្គម Facebook នៅកម្ពុជាអាចរកចំណូលបាន៕
