ជ័យលាភីជាប្រវត្តិសាស្ត្រនេះ ត្រូវបានការកើតឡើងពីការប្តេជ្ញាចិត្តខ្ពស់ និងការប្រកួតប្រជែងយ៉ាងស្វិតស្វាញពីសំណាក់សមាជិកក្រុមឆ្នើមទាំងបីរូបគឺ៖

១. កញ្ញា ស្លេះ រ៉យ្យ៉ាន (Ms. Ryan Sleh)

២. លោក ស៊ាង ធានសឹង្ហ (Mr. Theansoeng Seang)

៣. កញ្ញា អ៊ុង ខេមរាបូណ៌មីច័ន្ទ (Ms. Khemara Bormeychan Ung)

មុនពេលឈានដល់ការឈ្នះពានរង្វាន់កម្រិតពិភពលោកដ៏ធំធេងនេះ ក្រុមយុវជនកម្ពុជាបានបង្កើតភាពល្បីល្បាញ និងទទួលបានការគាំទ្រយ៉ាងខ្លាំងកន្លងមកហើយ តាមរយៈការប្រកួតឈ្នះលើក្រុមយុវជនថៃយ៉ាងស្វិតស្វាញ និងជាពិសេសគឺការវាយលុកដណ្តើមបានចំណាត់ថ្នាក់លេខ១ ក្នុងការប្រកួតកម្រិតតំបន់អាស៊ីប៉ាស៊ីហ្វិក (ASPAC) ជាប្រវត្តិសាស្ត្រលើកដំបូង ដែលរៀបចំឡើងនៅប្រទេសជប៉ុន កាលពីខែមិថុនា ឆ្នាំ២០២៦ កន្លងទៅនេះ។

គូសបញ្ជាក់ផងដែរថា ចាប់តាំងពីវគ្គជម្រុះបឋម វគ្គពាក់កណ្តាលផ្តាច់ព្រ័ត្រ រហូតដល់វគ្គផ្តាច់ព្រ័ត្រដ៏ស្វិតស្វាញមួយនេះ ក្រុមជជែកដេញដោលកម្ពុជាបានបង្ហាញពីភាពអង់អាច ទេពកោសល្យដ៏ប៉ិនប្រសប់ និងស្មារតីមុតស្រួច ក្នុងការលើកយកសំឡេង រឿងរ៉ាវ និងទស្សនវិស័យរបស់កម្ពុជាទៅកាន់ឆាកអន្តរជាតិ រហូតអាចទាក់ទាញចិត្តគណៈកម្មការ និងដណ្តើមបានជើងឯកពិភពលោកមកជូនជាតិមាតុភូមិវិញយ៉ាងត្រចះត្រចង់។

ជ័យជម្នះដ៏ធំធេងនេះ មិនត្រឹមតែជាកិត្តិយសផ្ទាល់ខ្លួនរបស់យុវជនទាំងបីរូបប៉ុណ្ណោះទេ ប៉ុន្តែវាក៏ជាមោទកភាពរួមរបស់ប្រទេសកម្ពុជាទាំងមូល រួមមានក្រុមគ្រួសារ ទីប្រឹក្សា ស្ថាប័ន JCI កម្ពុជា ក៏ដូចជាប្រជាពលរដ្ឋកម្ពុជាគ្រប់រូបដែលតែងតែគាំទ្រ និងជឿជាក់លើសមត្ថភាពយុវជនខ្មែរ។ ទន្ទឹមនឹងនេះ ស្មារតីនៃការប្រកួតប្រជែងដ៏ថ្លៃថ្នូរ និងការគោរពគ្នាទៅវិញទៅមកពីបណ្តាប្រទេសដទៃទៀត ក៏បានរួមចំណែកលើកកម្ពស់ស្តង់ដារ និងស្មារតីពិតប្រាកដនៃគ្រួសារ JCI ផងដែរ។