ក្នុងចំណោមឡានដែលបានដាក់បង្ហាញនៅការតាំងពិព័រណ៍ឡាន Shanghai Auto Show 2023 គេបានសង្កេតឃើញថា ឡានអគ្គិសនី ១ម៉ូដែលរបស់ BYD គឺឡាន BYD Seagull អាចនឹងមានប្រជាប្រិយភាព និងលក់ដាច់ជាងគេ ដោយសារតែតម្លៃរបស់ឡាននេះតែ ១១៣០០ដុល្លារប៉ុណ្ណោះ ។
អ្នកទាំងអស់គ្នា មានបានដឹងឬអត់? នៅប្រទេសចិន គេមានការតាំងពិព៌រណ៍ឡានមួយដែលមានឈ្មោះថា Shanghai Auto Show ដែលមានការតាំងបង្ហាញឡានទំនើបៗច្រើនមែនទែន ដែលត្រៀមនឹងចេញលក់នាពេលឆាប់ៗនេះ ហើយក្នុងចំណោមឡានទាំងនោះ គេបានសង្កេតឃើញថា មានឡាន ១ម៉ូដែល ជាប្រភេទឡានអគ្គិសនី របស់ក្រុមហ៊ុន BYD ដែលមានភាពលេចធ្លោជាងគេ ដែលឡាននេះមានតម្លៃធូរថ្លៃណាស់ តែ ១១៣០០ដុល្លារតែប៉ុណ្ណោះ ហើយអាចនឹងលក់ដាច់បានច្រើនជាងគេក្នុងចំណោមឡានដែលមកតាំងពិព័រណ៍ទាំងនោះ។
សម្រាប់ឡានអគ្គិសនី BYD Seagull មានរាងតូចល្មម ដូចទៅនឹង Kia Mornig នៅខ្មែរយើងដែរ ដោយមានប្រវែង 3780អ៊ីញ និងមានទទឹង 1715mm និងកម្ពស់1540mm ។
អ្វីដែលកាន់តែពិសេស BYD បានបំពាក់គ្រោងឆ្អឹង EV Platform ជំនាន់ចុងក្រោយទី៣ ឲ្យ Seagull ។ ហើយសម្រាប់ការលក់នៅក្នុងទីផ្សារប្រទេសចិន Seagull គឺមានជម្រើស ២ ដោយជម្រើសទី១ ទទួលបានម៉ូទ័កម្លាំង 74hp ត្រូវបានបំពាក់នឹងមានថ្មទំហំ 30 KWh ដែលអាចសាកថ្មម្តងរត់បានចម្ងាយដល់ទៅ 306Km ។
ចំណែកឯជម្រើសទី២ មានម៉ូទ័រកម្លាំង 100hp ត្រូវបានបំពាក់នឹងមានថ្មទំហំ 38 KWh ដែលអាចសាកថ្មម្តងរត់បានចម្ងាយដល់ទៅ 405Km ។ សម្រាប់ការសាកថ្មវិញ BYD Seagull អាចទទួលនូវកម្លាំងភ្លើង ដែលចេញពីស្ថានីយសាកថ្មល្បឿនលឿន DC Fast Charge ដោយអាចសាកថ្មឡើងដល់ 80% ចំណាយពេលអង្គុយចាំតែ 30នាទី តែប៉ុណ្ណោះ។
ប្រភពពី៖ Carscoops
អត្ថបទដោយ៖ ព្រឹម ភក្តី
