យោងតាមរបាយការណ៍ពី OBERLO បានបង្ហាញឱ្យឃើញថា ស្មាតហ្វូនដែលផលិតដោយក្រុមហ៊ុនដ៏ធំបំផុតមួយរបស់កូរ៉េខាងត្បូងគឺ Samsung ជាប់ចំណាត់ថ្នាក់ជា ប្រេនទូរស័ព្ទដៃដែលលក់ដាក់បំផុតប្រចាំឆ្នាំ២០២៤ ខណៈ iPhone របស់ក្រុមហ៊ុន Apple ឈរលើលំដាប់ទី២។
ប្រភពដដែលបានឱ្យដឹងទៀតថា គិតត្រឹមត្រីមាសទី៣នៃឆ្នាំ២០២៤ យីហោទូរស័ព្ទដៃ Samsung មានចំណែកទីផ្សារ 18.3% នៃចំណែកទីផ្សារនៃការនាំចេញស្មាតហ្វូនសកល ស្របជាមួយនឹងចំនូននៃការលក់ចេញប្រមាណ 57.8លានគ្រឿង។
គួររំឭកផងដែរថាយីហោទូរស័ព្ទដៃរបស់ប្រទេសកូរ៉េខាងត្បូងមួយនេះ តែងតែឈរនៅក្នុងលំដាប់ក្រុមហ៊ុនផលិតទូរស័ព្ទដៃធំជាងគេនៅលើពិភពលោក។ ស្មាតហ្វូនរបស់ Samsung មានលក្ខណៈពិសេសជាច្រើន និងមានបច្ចេកវិទ្យាថ្មីៗដែលបំពេញតម្រូវការរបស់អ្នកប្រើប្រាស់បានគ្រប់កម្រិត។
សូមជម្រាបផងដែរថា Samsung អាចទាក់ទាញចិត្តអ្នកប្រើប្រាស់បានតាមរយៈ កាមេរ៉ាកម្រិតខ្ពស់, អេក្រង់ Dynamic AMOLED, ការរចនាប្រកបដោយភាពច្នៃប្រឌិតថ្មីៗ, ដំណើរការដោយ One UI (ផ្អែកលើ Android), ព្រមទាំងមានភាពបត់បែនទៅតាមតម្រូវការគ្រប់យ៉ាងរបស់អ្នកប្រើប្រាស់៕
អត្ថបទដោយ៖ សូ សុខលី (កូនផ្កាឈូក)
