យោងតាមការចេញផ្សាយពីគេហទំព័ររបស់ scmp.com បានឲ្យដឹងថា រាជរដ្ឋាភិបាលនៅឯប្រទេសចិនបានឧបត្ថម្ភ ជាសាច់ប្រាក់ រាប់រយដុល្លារ សម្រាប់ជាការលើកទឹកចិត្តដល់ប្រជាជនដែលបានប្តូរចិត្តពីរថយន្តចំហេះក្នុង (ICE ) មកប្រើជារថយន្តអគ្គិសនី (EV)វិញ និងអ្នកដែលបានទិញរថយន្តអគ្គិសនីសុទ្ធមកជិះ ។ មិនថាប៉ុណ្ណោះ រដ្ឋាភិបាលចិនបានកំពុងតែពិភាក្សារឿងលើកលែងពន្ធចំពោះ រថយន្តអគ្គិសនី គ្រប់ប្រភេទផងដែរ ។
ទីក្រុង Wuhan និង ទីក្រុងប៉េកាំន បានចូលរួមចំណែក ក្នុងការអភិវឌ្ឍ និងលើកកម្ពស់វិស័យយានយន្តអគ្គិសនី នៅក្នុងទីក្រុងរៀងៗខ្លួន ដើម្បីធ្វើឲ្យកំណើនភាគរយនៃអ្នកប្រើប្រាស់រថយន្តអគ្គិសនី កើនពីមួយឆ្នាំទៅមួយឆ្នាំ។ ដោយទីក្រុង Wuhan បានផ្តល់នូវប្រាក់ឧបត្ថម្ភចំនួន ៨០០០ យន់ និង ទីក្រុង ប៉េកាំង បានផ្តល់នូវថវិកាឧបត្ថម្ភរហូតដល់ ១០០០០ យន់ ( ១៤៩៥ ដុល្លារសហរដ្ឋអាមេរិក ) ទៅកាន់ប្រជាជនណាដែលទិញរថយន្តអគ្គិសនី ព្រមទាំងអ្នកដែលសម្រេចចិត្តប្តូរពីរថយន្តចំហេះក្នុង (ICE) ជំនួយដោយរថយន្តអគ្គិសនីអគ្គិសនី ។
យ៉ាងណាមិញ ការលក់រថយន្តអគ្គិសនី នៅក្នុងស្រុកចិន ត្រូវបានគេរំពឹងទុកថា នឹងអាចកើនឡើង ៨៤% ពីមួយឆ្នាំទៅមួយឆ្នាំ អាចឡើងដល់ ៥.៥ លានគ្រឿង ក្នុងឆ្នាំ ២០២២ នេះបើយោងតាមការព្យាកណ៍របស់ China Passenger Car Association ។
បើយោងតាមប្រភពខាងលើបានឲ្យដឹងទៀតថា កាលពីសប្តាហ៍មុន ក្រុមប្រឹក្សាគណ:រដ្ឋមន្ត្រីរបស់ប្រទេសចិន កំពុងព្យាយាមរកដំណោះស្រាយធ្វើយ៉ាងណា បញ្ចុះតម្លៃពន្ធលើរថយន្តអគ្គិសនី នៅចុងឆ្នាំ ២០២២ នេះ ដើម្បីឲ្យប្រជាជនអាចទិញរថយន្តអគ្គិសនីមានថាមពលអាចរត់ចម្ងាយ ចាប់ពី៤០០ គ.មឡើងទៅ ក្នុងតម្លៃជាមធ្យម ២០០ ពាន់យន់ ឬក្បែរ ៣ ម៉ឺនដុល្លារសហរដ្ឋអាមេរិក ៕
អត្ថបទដោយ ៖ ព្រឹម ភក្តី
