ក្នុងនោះដែរ បើតាមប្រភពពី Reuters បានឱ្យដឹងថា ប្រទេសម៉ាឡេស៊ី កំពុងមានគម្រោងដាក់បម្រាមលើការប្រើប្រាស់បណ្ដាញសង្គមសម្រាប់អ្នកប្រើប្រាស់ដែលមានអាយុក្រោម ១៦ឆ្នាំ ដោយរំពឹងថានឹងអាចចាប់ផ្តើមពីឆ្នាំក្រោយនេះតទៅ។

លោក ហ្វាមី ហ្វាឌហ្ស៊ីល (Fahmi Fadzil) រដ្ឋមន្ត្រីក្រសួងគមនាគមន៍ បាននិយាយកាលពីថ្ងៃអាទិត្យថា រដ្ឋាភិបាលកំពុងពិនិត្យមើលយន្តការដែលត្រូវបានប្រើដើម្បីដាក់កំហិតអាយុសម្រាប់ការប្រើប្រាស់បណ្ដាញសង្គម នៅក្នុងប្រទេសអូស្ត្រាលី និងប្រទេសដទៃទៀត។ លោកបានលើកឡើងអំពីភាពចាំបាច់ក្នុងការការពារយុវជនពីផលប៉ះពាល់អនឡាញ ដូចជា ការគំរាមកំហែងតាមអ៊ីនធឺណិត (cyberbullying) ការបោកប្រាស់ផ្នែកហិរញ្ញវត្ថុ និងការរំលោភបំពានផ្លូវភេទលើកុមារ ជាដើម។

គួរជម្រាបផងដែរថា ក្នុងប៉ុន្មានឆ្នាំចុងក្រោយនេះ ប្រទេសម៉ាឡេស៊ីបានដាក់ក្រុមហ៊ុនបណ្ដាញសង្គមឱ្យស្ថិតនៅក្រោមការត្រួតពិនិត្យកាន់តែខ្លាំង ដើម្បីឆ្លើយតបទៅនឹងអ្វីដែលខ្លួនអះអាងថាជាការកើនឡើងនៃមាតិកាដែលបង្កគ្រោះថ្នាក់ រួមទាំងការលេងល្បែងអនឡាញ និងការបង្ហោះដែលទាក់ទងនឹងបញ្ហាពូជសាសន៍ សាសនា ជាដើម។ វេទិកា និងសេវាកម្មផ្ញើសារដែលមានអ្នកប្រើប្រាស់លើសពី ៨លាននាក់នៅក្នុងប្រទេសម៉ាឡេស៊ី ឥឡូវនេះត្រូវបានតម្រូវឱ្យមានអាជ្ញាប័ណ្ណត្រឹមត្រូវ ក្រោមបទប្បញ្ញត្តិថ្មីដែលបានចូលជាធរមានកាលពីខែមករា៕