នាយករដ្ឋមន្រ្តីនៃប្រទេសវៀតណាម លោក Pham Minh Chinh បានប្រកាសអំពីគម្រោង ឱ្យប្រជាជនវៀតណាម បញ្ឈប់ការប្រើប្រាស់ម៉ូតូចាក់សាំង នៅក្នុងទីក្រុងហាណូយ និងហូជីមិញ ចាប់ពីថ្ងៃទី១ ខែកក្កដា ឆ្នាំ២០២៦ ខាងមុខតទៅ។ នេះបើយោងតាមការចុះផ្សាយរបស់ VnExpress។
ប្រភពដដែលបានឱ្យដឹងថា រដ្ឋាភិបាលវៀតណាមធ្វើបែបនេះដោយសារតែចំនួនប្រជាជនដែលរស់នៅក្នុងទីក្រុងមានការកើនឡើងខ្លាំង ហើយការប្រើប្រាស់នូវយានជំនិះ ដែលដំណើរការដោយសាំង បង្ករឱ្យមានផលប៉ះពាល់ខ្លាំងទៅលើបរិស្ថាន ដូចជាបង្កើននូវខ្យល់ពុលពេញទីក្រុង ដែលធ្វើឱ្យខ្យល់បាត់បង់គុណភាពជាដើម។
គួរជម្រាបផងដែរថា បន្ទាប់ពីការចេញផ្សាយនូវសេចក្ដីប្រកាសខាងលើនេះ មានប្រជាជនជាច្រើនបានបញ្ចេញមតិផ្សេងៗ ប៉ុន្តែរាជរដ្ឋាភិបាលវៀតណាមនៅតែរក្សាជំហរ និងលើកទឹកចិត្តឱ្យប្រជាជនងាកទៅប្រើ ម៉ូតូ និងរថយន្តអគ្គិសនី ឬមធ្យោបាយសាធារណៈផ្សេងៗវិញ ដើម្បីជាការចូលរួមជួយទៅដល់បរិស្ថាន ហើយរដ្ឋាភិបាលក៏នឹងព្យាយាមរកវិធីដើម្បីជួយកាត់បន្ថយការចំណាយលើការធ្វើដំណើរជូនប្រជាជនផងដែរ៕
