១-ការរំខានដំណេក៖ ការប្រើប្រាស់ស្មាតហ្វូន មុនពេលចូលគេង អាចរំខានដល់ដំណេករបស់កុមារ។ ពន្លឺពណ៌ខៀវដែលបញ្ចេញដោយអេក្រង់រំខានដល់ការផលិតមេឡាតូនីន ដែលជាអរម៉ូនដែលទទួលខុសត្រូវក្នុងការគ្រប់គ្រងការគេង។ នៅពេលដែលកុមារគេងមិនបានគ្រប់គ្រាន់ ពួកគេមានអារម្មណ៏មិនល្អ ការផ្តោតអារម្មណ៍កាន់តែពិបាក ហើយវាអាចប៉ះពាល់ដល់របៀបដែលពួកគេធ្វើបានល្អនៅក្នុងសាលារៀន។

២-កាត់បន្ថយសកម្មភាពរាងកាយ៖ កង្វះសកម្មភាពរាងកាយនេះត្រូវបានផ្សារភ្ជាប់ជាមួយនឹងការកើនឡើងហានិភ័យនៃការធាត់ និងបញ្ហាសុខភាពដែលពាក់ព័ន្ធ។ កុមារខ្លះអាចអង្គុយដោយដាក់ស្មារបស់ពួកគេ ហើយអោនក្បាល នាំឱ្យឈឺត្រង់ស្មា ខ្នង ក និងកន្លែងច្រើនទៀតក្នុងរយៈពេលយូរ។

៣-ប៉ះពាល់ដល់ការផ្តោតអារម្មណ៍៖ ទម្លាប់នៃការប្រើប្រាស់អេក្រង់យូរៗម៉ោង ធ្វើឱ្យកុមារបាត់បង់នូវការផ្ដោតអារម្មណ៍ទៅលើការធ្វើកិច្ចការមួយចំនួន ដូចជាកិច្ចការសាលា ឬភារកិច្ចប្រចាំថ្ងៃមួយចំនួនដែលពួកគេត្រូវរៀនទទួលខុសត្រវដោយខ្លួនឯង។

គួរជម្រាបផងដែរ ការសិក្សាបានបង្ហាញថា ការប្រើប្រាស់បច្ចេកវិទ្យាច្រើនលើសលប់អាចរារាំងដល់សុខុមាលភាពរបស់កុមារធ្ងន់ធ្ងរ។ របាយការណ៍ឆ្នាំ២០១៤ ដែលបានបោះពុម្ភផ្សាយនៅក្នុង Computers in Human Behavior បានបញ្ជាក់យ៉ាងច្បាស់ថា ក្មេងដែលចំណាយពេលច្រើននៅមុខអេក្រង់ មានអាកប្បកិរិយាច្រង៉េងច្រង៉ាង ប្រើពាក្យអសុរស ថយចុះសមត្ថភាពខួរក្បាល និងបញ្ហាផ្លូវអារម្មណ៍ ឬប្រឈមនឹងជំងឺផ្លូវចិត្តកម្រិតខ្ពស់ ជាដើម។ ដូច្នេះ សូមមាតិបិតា ឬអាណាព្យាបាល កុំព្រងើយកណ្តើយចំពោះការលេងទូរស័ព្ទរបស់កូនៗឱ្យសោះ ព្រោះវាជះឥទ្ធិពលធំធេងណាស់ដល់ការប្រែប្រួលរបស់ពួកគេក្នុងថ្ងៃអនាគត៕