ក្រុមហ៊ុន Apple បានបញ្ជាក់នៅក្នុងអត្ថបទសេចក្តីថ្លែងការណ៍ថា កម្មវិធីណាដែលមានមាតិកាបង្កើតដោយអ្នកប្រើប្រាស់ ត្រូវតែមានប្រព័ន្ធស្កេនមាតិកាមិនសមរម្យ មានមុខងារឱ្យអ្នកប្រើប្រាស់រាយការណ៍ និងអាចប្លុកគណនីដែលរំលោភបំពានបាន។ លើសពីនេះ កម្មវិធីដែលលាក់មុខងារ ឬគ្មានឯកសារបញ្ជាក់ច្បាស់លាស់ ក៏ត្រូវហាមឃាត់ដាច់ខាតផងដែរ រាប់បញ្ចូលទាំងកម្មវិធីដែលកុហក ពីគោលបំណងរបស់ខ្លួនអំឡុងពេលពិនិត្យ ហើយទើបតែទម្លាក់មុខងារបង្កគ្រោះថ្នាក់ (ដូចជាការកាត់តរូបអាក្រាត) បន្ទាប់ពីទទួលបានការអនុម័តរួច ដែលល្បិចនេះត្រូវបានគេស្គាល់ថាជា Bait-and-switch។ ក្រុមហ៊ុនក៏បានបន្ថែមថា ខ្លួននឹងលុបកម្មវិធីណាដែលលួចបន្ថែមមុខងារខុសពីកំណែ ដែលបានដាក់ជូនពិនិត្យដំបូងចេញពីហាង App Store។

ទន្ទឹមនឹងនេះ ក្រុមហ៊ុនផលិតទូរស័ព្ទ iPhone មួយនេះបានធ្វើបច្ចុប្បន្នភាពផ្នែកច្បាប់របស់ខ្លួន ដើម្បីបញ្ជាក់ជំហរជាថ្មីថានឹងហាមឃាត់កម្មវិធីទាំងឡាយណាដែលជួញដូរមនុស្ស និងកេងប្រវ័ញ្ចលើកុមារ។ កាលពីឆ្នាំមុន ប្រព័ន្ធពិនិត្យរបស់ Apple បានរារាំងកម្មវិធីជាង ១៥០,០០០ និងបានលុបគណនីអ្នកអភិវឌ្ឍន៍ចំនួន ១៩៣,០០០ ដោយសារតែការឆបោក និងរំលោភបំពាន។ ការចាត់វិធានការនេះបានកើតឡើង បន្ទាប់ពីរដ្ឋអាជ្ញាក្រុង San Francisco បានបង្គាប់ឱ្យ Apple និង Google លុបកម្មវិធីកាត់តរូបអាក្រាតចេញពី Store របស់ពួកគេកាលពីខែកក្កដា ខណៈដែលរបាយការណ៍របស់ Tech Transparency Project កាលពីខែមេសា បានបង្ហាញថា ក្រុមហ៊ុនយក្សទាំងពីរបានដាក់ឱ្យទាញយកកម្មវិធីកាត់តរូបអាក្រាតជាច្រើន ហើយកម្មវិធីខ្លះថែមទាំងត្រូវបានកំណត់ថាសមស្របសម្រាប់អនីតិជនទៀតផង។