ប្រទេសថៃ ៖ ក្រុមហ៊ុន Yamaha ប្រចាំស្រុកថៃបានបង្កើតកម្មវិធីជិះតេស្តសាកល្បងលើម៉ូតូអគ្គិសនីថ្មី E01 នៅទីក្រុង Khao Yai ខេត្ត Nakhon Ratchasima ដោយមានការចូលរួមពីអ្នកជំនាញលើការបើកបរម៉ូតូជាច្រើននាក់ ក្នុងគោលបំណងដើម្បី ប្រមូលទិន្នន័យតាមរយ:ប្រព័ន្ធGPS ព្រមទាំងសាកភ្លក្សរសជាតិថ្មីនៃការជិះលើភ្នំចុះឡើងចម្ងាយផ្លូវ ៦៥ គីឡូម៉ែត្រ ។
យោងតាមគេហំទំព័រ BANGKOK POST បានឲ្យដឹងថា ជាលើកដំបូងនៅក្នុងតំបន់អាស៊ីប៉ាស៊ីហ្វិក YAMAHA បានរៀបចំព្រឹត្តិការណ៍ជិះសាកល្បងម៉ូតូអគ្គិសនី E01 នៅទីក្រុង Khao Yai ខេត្ត Nakhon Ratchasima ។ ក្នុងព្រឹត្តិការណ៍នេះផងដែរ ខាង YAMHA បានយកម៉ូតូចំនួន ៤០គ្រឿងដើម្បីប្រារព្ធកម្មវិធីនេះឡើងមក ក្នុងរមណីយដ្ឋានគីរីម៉ាយ៉ា ក្នុងតំបន់ Khao Tai ។
យ៉ាងណាមិញ បើយោងតាមជិះសាកល្បងចម្ងាយ ៦៥ គីឡូម៉ែត្រ គេបានឃើញប្រើថាមពលអស់តែ ៦០%តែប៉ុណ្ណោះ ។ នេះជាទិន្នន័យដែលនឹកស្មានមិនដល់មួយ ព្រោះកញ្ចប់អាគុយដែលភ្ជាប់មកជាមួយម៉ូតូអគ្គិសនី E01 នេះ ខាងក្រុមហ៊ុនបានអះអាងថា អាចបើកបរបានចម្ងាយ ១០៤ គីឡូម៉ែត្រចំពោះការពេញសាកថាមពលពេញម្តង ។
មូលហេតុធ្វើឲ្យ E01 អាចបើកបរលើសពីសមត្ថភាពនៃថ្ម ខាងក្រុមហ៊ុនបានកត់សម្គាល់ថា ដោយសារតែអ្នកបើកបរបានជ្រើសរើសយកការជិះលើ Eco mode ដែលជាកម្រិតសន្សំសំចៃបំផុត ហើយក៏បានកំណត់ល្បឿននៃការជិះឲ្យក្រោម ៦០ គីឡូម៉ែត្រក្នុង ១ម៉ោង ។
ដោយឡែក ម៉ូតូអគ្គិសនីនេះមាន Mode ចំនួនពីរថែមទៀត គឺកម្រិត Standard មានល្បឿនលឿនបំផុតច្រើនជាង ១០០ គីឡូម៉ែត្រក្នុង ១ម៉ោង ។ តួយ៉ាង រីឯកម្រិតមួយទៀតនោះគឺ Power ជា Mode ដែលតំឡើងសាច់ដុំទៅឲ្យម៉ូទ័របញ្ចេញនូវថាមពលមួយអស់ដៃ ក្នុងការបើកបរលើផ្លូវឡើងចោទ មានចំណោទខ្ពស់ ព្រមទាំងអាចធ្វើឲ្យម៉ូតូមានកម្រិតស្ទុះកាន់តែខ្លាំងនៅពេលដែលចាប់ផ្តើមល្បឿនពីសូន្យ ។
ដោយសារតែម៉ូតូអគ្គិសនី Yamaha E01 មានទំហំធំ ព្រមទាំងទម្ងន់ក៏រាងធ្ងន់ចំនួន ១៥៨ គីឡូក្រាមថែមទៀតនោះ គេបានបំពាក់នូវមុខងារ អាយ៉ែថយក្រោយ ឬលេខ R មានល្បឿន 1km/h សម្រាប់ជំនួយនៃការចត ដោយមិនចាំបាច់ឲ្យអ្នកបើកបរពិបាកចុះពីលើម៉ូតូឡើយ ។ មួយវិញទៀត ចំពោះក្នុងល្បឿនណាមួយឬ Mode ក៏ដូចជាការគណនាលើការផ្ទេរថាមពលថ្មទៅកាន់ម៉ូទ័រអេឡិកត្រិច និងការគ្រប់គ្រង់កង់ទាំងពីរ ត្រូវបានគ្រប់គ្រងដោយ ECU ហើយកម្មវិធីដ៏ឆ្លាតវ៉ៃមួយនេះ ក្រុមហ៊ុន Yamha បានដាក់បញ្ចូលក្នុងម៉ូតូអគ្គិសនី E01 ដើម្បីធានានូវសុវត្ថិភាពខ្ពស់ជាងម៉ូតូទូទៅ ។
គួរជំរាបផងដែរថា សម្រាប់តម្លៃពិតប្រាកដនៃម៉ូតូអគ្គិសនីថ្មី Yamaha E01 នៅតែជា Super Concept EV Scooter នៅឡើយទេ ព្រោះថាខាងក្រុមហ៊ុននៅតែសិក្សាលើចំណុចមួយចំនួនទៀត ដើម្បីធានាសុវត្ថិភាព ១០០% ណាមួយកញ្ចប់សេវាកម្ម ព្រមទាំងគ្រឿងបន្លាសផ្សេងទៀត ដែល Yamaha កំពុងតែត្រៀមចេញលក់ជាផ្លូវការនាពេលខាងមុខ ៕
អត្ថបទដោយ៖ ព្រឹម ភក្តី
