បើទោះបីជាម៉ាត និងផ្សារទំនើបកើតឡើងរីកដុះដាលដូចផ្សិតក៏ដោយក្ដី ប៉ុន្តែគេឃើញមានតូបចាប់ហួយ ឬអាជីវកម្មខ្លាតតូចជាច្រើន ក៏កំពុងតែដំណើរល្អ និងមានមួយចំនួនទៀតរីកចម្រើនគួរឱ្យកត់សម្គាល់។ ទោះមិនចំណេចបានលុយទាំងគីបៗ ប៉ុនតែការលក់ដូរបែបនេះ ក៏មិនធ្វើឱ្យអ្នករកស៊ីខាតឡុងចុងអស់ពីខ្លួនដែរ។
អាជីវកម្មតូចៗដូចជាតូបលក់ចាប់ហួយនេះ គឺជារបរមួយដែលមានហានិភ័យប្រឈមតិច បើប្រៀបធៀបជាមួយនឹងមុខរបររកស៊ីដទៃទៀត ប៉ុន្តែបើយើងតាមដានឱ្យបានច្រើនបន្តិចនឹងឃើញថា តូបលក់ចាប់ហួយមួយចំនួន នៅមិនទាន់ចេះវិវត្តន៍ខ្លួនឱ្យទាន់សម័យកាលទំនើបនៅឡើយទេ។ តួយ៉ាងដូចជាសម្ភារៈប្រើប្រាស់នៅកន្លែងលក់ ក៏មិនសម្បូរបែបទៅដោយ គ្រឿងប្រើប្រាស់ចាំបាច់មួយចំនួន ដើម្បីដើរឱ្យទាន់អាជីវកម្មបែបទំនើបសព្វថ្ងៃនេះដែរ។
បើយើងក្រឡេកទៅមើលតូបចាប់ហួយនៅក្នុងប្រទេសឥណ្ឌូណេស៊ី ដែលកំពុងប្រើប្រាស់សេវាកម្មរបស់ក្រុមហ៊ុន Warung Pintar ហាក់បីដូចជាសំងំពង្រីកខ្លួនកាន់តែធំៗទៅ ដោយតូបលក់ចាប់ហួយនីមួយៗ បានបំពាក់នូវគ្រឿងបច្ចេកវិទ្យាសំខាន់ៗ និងចាំបាច់ ដែលយើងគ្រប់គ្នាបានស្គាល់និងបានដឹង តែមិនបានចាប់អារម្មណ៍ នឹងយកវាមកប្រើប្រាស់ក្នុងមុខរបស់រកស៊ី ដូចជាតូបលក់ចាប់ហួយជាដើម។
យើងនឹងលើកយកពីសម្ភារៈឬគ្រឿងបច្ចេកវិទ្យា មួយចំនួនដែលតូបចាប់ហួយនៅក្នុងប្រទេសឥណ្ឌូណេស៊ីកំពុងតែប្រើប្រាស់ ដើម្បីចែករំលែកគំនិតទាំងអស់នេះ ដល់បងប្អូនខ្មែរដែលមានដើមទន់មធ្យម ហើយចង់ពង្រីកមុខរបរចាប់ហួយរបស់ខ្លួនឱ្យកាន់តែធំ និងទំនើបជាងមុន ដោយគ្រឿងទាំងនោះរួមមាន៖
WIFI, ម៉ាស៊ីនទឹកក្ដៅទឹកត្រជាក់, ទូរទឹកកក, ទូរទស្សន៍ LCD, កន្លែងសាកថ្មទូរស័ព្ទ, ម្ចាស់តូប ត្រូវមានកុងធនាគារយ៉ាងតិច២ ដើម្បីឱ្យភ្ញៀវអាចវេរលុយជាមួយ QRCode បាន, មួយទៀត គឺការដាក់ស្លាកសញ្ញាដូចជារូប Wifi និង មានកន្លែងសាកថ្មទូរស័ព្ទជាដើម។ សម្រាប់គ្រឿងទាំងនេះដែរ គឺជាអ្វីដែលតូបលក់ចាប់ហួយតូចៗនៅក្នុងប្រទេសឥណ្ឌូណេស៊ីកំពុងប្រើ និងទទួលបានលទ្ធផលល្អ ហើយយើងក៏ជឿថាតូបលក់ដូរនៅកម្ពុជាយើង ក៏ជាអាចវិវត្តន៍ទៅប្រើគ្រឿងបច្ចេកវិទ្យាទាំងនេះបានដែរ។
ថ្វីត្បិតតែគ្រឿងទាំងនេះមានតម្លៃថ្លៃ និងត្រូវចំណាយទន់អស់គួរសមមែន ប៉ុន្តែយើងនៅតែលើកទឹកចិត្តឱ្យម្ចាស់អាជីវកម្មចាប់ផ្ដើមសន្សំគ្រឿងទាំងនេះម្ដងបន្តិចៗ ដាក់ក្នុងតូបលក់ បើទោះបីជាមិនសូវមានថវិការសម្រាប់ទិញវាម្ដងតាំងអស់ក៏ដោយ។ មួយវិញទៀត គ្រឿងទាំងនេះសុទ្ធតែចាំបាច់ សម្រាប់អ្នកលក់និងអ្នកទិញផងដែរ ហើយយើងក៏មិនត្រូវបណ្ដោយឱ្យអាជីវកម្មរបស់យើងតូចរហូត ដោយមិនពង្រីកនោះទេ។
គូសបញ្ជាក់ថា ការប្រាស់គ្រឿងបច្ចេកវិទ្យាទាំងអស់នេះ ក៏មានបងប្អូនខ្មែរយើងកំពុងតែធ្វើហើយដែរ ប៉ុន្តែយើងចង់ផ្ដោតសំខាន់ទៅលើអ្នកលក់ចាប់ហួយដែលគាត់កំពុងត្រូវការគំនិតដើម្បីពង្រីកមុខរបររបស់ខ្លួនបន្ថែមទៀត។ ប្រសិនបើយើងអាចប្រើប្រាស់គ្រឿងទាំងនេះនៅក្នុងតូបលក់របស់ហើងបាន ពិតថាវាច្បាស់ជារីកចម្រើនជាងមុន នឹងធ្វើឱ្យកម្ពុជាយើងកាន់តែទំនើបជាងមុន។
អត្ថបទដោយ៖ ផែន ផាន់ណា
