មានទាំងអ្នកគាំទ្រ និង អ្នកបន្ទុចបង្អាក់ និយាយលេងផង សើចផង ទៅលើរូបមួយនេះ តែសម្រាប់អ្នកនៅក្នុងវិស័យគ្រីបតូ ឬ NFT ប្រហែលជាមិនសូវជាភ្ញាក់ផ្អើលប៉ុន្មាននោះទេ ទៅលើរូបមួយប្រភេទនេះ ហើយបើស៊ើបឱ្យជាក់បន្តិចទៀត ទើបដឹងថារូបមួយសន្លឹកនេះមានតម្លៃជាងលានដុល្លារឯណោះ។

យោងតាមគេហទំព័រ Coinspeaker បានឱ្យដឹងថា Neymar បានទិញរូបដូចក្នុង Profile គាត់នេះមានឈ្មោះថា Bored Ape #6633 មានតម្លៃប្រហាក់ប្រហែលរហូតខ្ទង់ ៤៨១ ០០០ដុល្លារ ឬគិតឱ្យច្បាស់ៗជាលុយគ្រីបតូ Ethereum តែម្ដងមានតម្លៃរហូត 159.99 ETH។

មែនទែនរូបខាងលើនោះមិនមែនជាគំនូរដែលមានពិតនៅខាងក្រៅនោះទេ តែវាជាប្រភេទគំនូរ ឬទ្រព្យសម្បត្តិឌីជីថល ដែលមិនមាននរណាអាចធ្វើដូច ហើយមិនមានអ្វីជំនួសបាន ឬគេនិយមហៅថា NFT (Non-Fungible Tokens) ដែលជាវិស័យមួយកំពុងតែក្ដៅខ្លាំងនោះ។

នេះក៏មិនមែនជាលើកទីមួយដែរ ដែលកីឡាករអភិជនរូបនេះទិញ NFT ដែរ ដោយកន្លងទៅគាត់ត្រូវបានគេរាយការណ៍ថាចាយលុយរហូតដល់ខ្ទង់ ១លានដុល្លារលើពពួកគំនូរឌីជីថលរូបស្វាស្រដៀងគ្នានេះ ទៅជាបណ្ដុំរូប ឬ Collection មួយឈ្មោះថា Bored Apes Yacht Collection។

NFT ចាប់ផ្ដើមមានសន្ទុះនៃការចាប់អារម្មណ៍ខ្លាំងឡើងៗចាប់ពីដើមឆ្នាំ ២០២១ មកក្រោយល្បីរឿងវិចិត្រករឌីជីថលមួយរូប លក់បណ្ដុំរូបគំនូររបស់គាត់ជាប្រភេទ NFT នេះបានច្រើនជាង ៦៩លានដុល្លារ ហើយសន្ទុះនៃការដាក់លក់ស្នាដៃច្នៃប្រឌិតស្រដៀងគ្នានេះដូចជា គំនូរឌីជីថល វីដេអូ ឃ្លីប រូបសន្លឹក ភ្លេង ចម្រៀងជាដើម។

សម្រាប់អ្នកមិនទាន់យល់ពី NFT គេចំណាំពន្យល់ប្រៀបប្រដូចទៅនឹងរូបគំនូរ Mona Lisa ដូច្នោះដែរ មានន័យថា គ្រប់គ្នាអាចគូស Mona Lisa អាចព្រីន ឬ ថតរូប Mona Lisa បាន ប៉ុន្តែរូបគំនូរដែលមានតម្លៃពិត គឺច្បាប់ដើមនៃរូបគំនូរ Mona Lisa និង លិខិតដែលបញ្ជាក់ថារូបនោះពិតជាច្បាប់ដើមនៃរូបគំនូរ Mona Lisa គូសដោយលោក Leonardo Davinci ពិតមែន។

ហើយសម្រាប់គំនូរឌីជីថល NFT ដែលមានបច្ចេកវិទ្យា Blockchain នៅពីក្រោយនេះហើយ គឺជាឆ្អឹងខ្នងនៃទំនុកចិត្ត និងការបញ្ជាក់ពីច្បាប់ដើមនៃស្នាដៃច្នៃប្រឌិតណាមួយរបស់វិចិត្រករ។

អត្ថបទដោយ៖ Sakada Techie | ទំនាក់ទំនងផ្សព្វផ្សាយ៖ 089525180