មិនចាញ់តេឡេក្រាមទេ ! «HelloTalk» កម្មវិធីផ្ញើសារដំបូងគេនៅខ្មែរ ចាយពេលបង្កើតរាប់ឆ្នាំ ឥឡូវដាក់ឱ្យប្រើប្រាស់ហើយ
ផែន ផាន់ណា
NOVEMBER 21 2022
នវានុវត្តន៍
1.2 K views
3 mins read

បើគេនិយាយដល់កម្មវិធីផ្ញើសារ ច្បាស់ណាស់គេនឹងនឹកស្រមៃទៅដល់កម្មវិធីធំៗ នៅលើពិភពលោក តួយ៉ាងដូចជា៖ កម្មវិធីផ្ញើសារ Messenger, Telegram, WeChat ឬ Line ជាដើម។ បណ្ដាញទំនាក់ទំនងទាំងនេះ បានជ្រាបចូលទៅក្នុងក្រអៅបេះដូងមនុស្សជាច្រើនលាននាក់ នៅលើសកលលោក បូកទាំងប្រជាជនកម្ពុជាយើងផងដែរ។ ជាការពិត រាល់ការផ្ញើសារនៅលើកម្មវិធីធំៗ ដូចដែលបានរៀបរាប់ខាងលើនេះ យើងពិបាកនឹងគ្រប់គ្រងទិន្នន័យផ្ទាល់ខ្លួន ពោលគឺមិនដឹងថាគេនឹងយកព័ត៌មានយើងទៅធ្វើអ្វីខ្លះនោះទេ ជាក់ស្តែងនៅលើ App Store ត្រង់ចំណុច App Privacy លើ App Telegram និង Messenger ត្រូវបានបង្ហាញថា មានការប្រមូលទិន្នន័យរបស់អ្នកប្រើប្រាស់ (Data Linked to You)  ដែលបាននឹងកំពុងទាញយកទិន្នន័យរបស់អ្នកប្រើប្រាស់ប្រចាំថ្ងៃដូចជា៖ ប្រវត្តិនៃការទិញ, ព័ត៌មានហិរញ្ញវត្ថុ, ទីតាំង, ព័ត៌មានទំនាក់ទំនង, រូបថត និងព័ត៌មានទូទៅជាច្រើនទៀត។

Photo 2022 11 22 10 45 09

ដើម្បីចូលខ្លួនមកដោះស្រាយបញ្ហាដ៏ធំនេះ «HelloTalk» ដែលជាបណ្ដាញទំនាក់ទំនងបង្កើតឡើងដោយស្នាដៃកូនខ្មែរពិតៗ បានរំលេចរូបរាងឡើង បន្ទាប់ពីក្រុមការងារជំនាញបានចំណាយពេលទាំងយប់ទាំងថ្ងៃ ពោលគឺជាង ២ ឆ្នាំ ដើម្បីបង្កើតកម្មវិធីផ្ញើសារមួយនេះទ្បើង សម្រាប់ប្រជាជនខ្មែរប្រើប្រាស់ប្រចាំថ្ងៃ ដែលមានមុខងារសំខាន់ៗដូចជា៖ ការផ្ញើសារជាអក្សរ សំឡេង វីដេអូ និងផ្ញើឯកសារផ្សេងៗ។ ដើម្បីជ្រាបកាន់តែច្បាស់ ក្រុមការងារ Technology Cambodia បានស្កាត់ទៅជួបជាមួយលោកស្រី ហ្លួង កល្យាន ដែលជានាយកប្រតិបត្តិ (CEO) របស់កម្មវិធី HelloTalk ផ្ទាល់ ដើម្បីចង់ដឹងពីគោលបំណង និងមុខងារពិសេសៗរបស់កម្មវិធីបណ្តាញទំនាក់ទំនង​សង្គមខ្មែរមួយនេះ។

បើតាមការបញ្ជាក់របស់លោកស្រី ហ្លួង កល្យាន នាយកប្រតិបត្តិ (CEO) របស់ «HelloTalk» បានឱ្យដឹងថាកម្មវិធីផ្ញើសាររបស់ខ្មែរដំបូងគេមួយនេះ ទើបតែធ្វើរួចរាល់ទេ ប៉ុន្តែទម្រាំសម្រេចដាក់ឱ្យប្រើប្រាស់ ក្រុមការងារជំនាញព័ត៌​មាន​វិទ្យា និងអ្នកសរសេរកម្មវិធី (ប្រូក្រាម) បានចំណាយពេលជាង ២ ឆ្នាំ ដើម្បីធ្វើយ៉ាងណាឱ្យកម្មវិធីបណ្តាញទំនាក់ទំនង​សង្គមខ្មែរមួយនេះ ដំណើរការទៅដោយរលូន និងមានសុវត្ថិភាពគួរជាទីទុកចិត្តបំផុតក្នុងការប្រើប្រាស់ប្រចាំថ្ងៃ។ លោកស្រីបានបន្តថា «HelloTalk» គឺផ្ដោតសំខាន់ទៅលើការការពារទិន្នន័យរបស់អ្នកប្រើប្រាស់ ជាចាំបាច់បំផុត​ ពោលគឺ «HelloTalk» មិនច្បាមយករាល់ទិន្នន័យរបស់អ្នកប្រើប្រាស់ សូម្បីតែប៉ុនចុងក្រចកក៏ដោយ។

Photo 2022 11 22 10 45 20

លោកស្រីបានបន្ថែមដោយទំនុកចិត្តថា «HelloTalk» មានការទទួលស្គាល់ត្រឹមត្រូវពី Play Store (Android) និង App Store (iOS) ដើម្បីបញ្ជាក់ពីភាពស្អាតស្អំថា កម្មវិធីមួយនេះ ពិតជាមិនបានលួចយកទិន្នន័យអ្នកប្រើប្រាស់ទៅលក់ ដូចជា WeChat ឬ Telegram នោះទេ។ បញ្ជាក់ត្រង់ចំណុចនេះ លោកស្រីបានសង្កត់ធ្ងន់ថា សព្វថ្ងៃនេះលោកស្រីពិតជាមានការព្រួយបារម្ភយ៉ាងខ្លាំង អំពី ព័ត៌មានឯកជនភាព ទាំងប្រជាជនទូទៅ និងមន្ត្រីរាជការថ្នាក់ជាតិ ដែលកំពុងប្រើកម្មវិធីបរទេស ដើម្បីផ្ញើឯកសារ និងព័ត៌មានសំខាន់ៗជាច្រើន ខណៈសាមីខ្លួន មិនបានដឹងថារាល់ការផ្ញើទាំងអស់នោះ អាចបង្កជាបញ្ហាអ្វីខ្លះ ក្នុងកាលៈទេសៈណាមួយ ដែលសារ ឬឯកសារទាំងអស់នោះ ត្រូវបានបែកធ្លាយ ដោយពុំបានដឹងមុននោះទេ។

ដោយមើលឃើញបែបនេះហើយ ទើបលោកស្រី និងក្រុមការងារជំនាញ បានព្យាយាមធ្វើយ៉ាងណាកសាងកម្មវិធីបណ្តាញទំនាក់ទំនង​សង្គមខ្មែរមួយនេះទ្បើង សម្រាប់ប្រជាជនខ្មែរ ឱ្យមានអ្វីមួយជារបស់ខ្លួន ដោយលែងពឹងពាក់កម្មវិធីបរទេសតទៅទៀត។ លោកស្រីបានបន្តថា បច្ចុប្បន្ន «HelloTalk» បាននឹងកំពុងបំពេញតម្រូវការសំខាន់ៗជាច្រើន ដោយក្នុងកម្មវិធី «HelloTalk» បានបញ្ចូលនូវមានមុខងារល្អៗ ដូចជា៖ ឆាតជាអក្សរ សំឡេង វីដេអូ Sticker ស្កេន QRCode ផ្ញើឯកសារ និងមុខងារពិសេសៗមួយចំនួនផ្សេងទៀត។ 

Photo 2022 11 22 10 45 20 (2)

លោកស្រីបានបញ្ជាក់ទៀតថា លើកម្មវិធី «HelloTalk» ក៏បានបន្ថែមនូវប្រព័ន្ធសុវត្ថិភាព Electronic Know Your Customer (e-KYC) ដែលអាចផ្ទៀងផ្ទាត់ព័ត៌មាន និងអត្តសញ្ញាណរបស់អតិថិជន ដោយសម្គាល់មុខមនុស្សបានច្បាស់ ៩៨% ពោលគឺនៅលើ «HelloTalk» មិនមានអ្នកចង់ក្លែងបន្លំគណនីបានងាយៗឡើយ។ សម្រាប់អ្នកមិនទាន់ប្រើ ឬ ចង់ប្រើកម្មវិធីរបស់ខ្មែរមួយនេះ អាចចូលទៅទាញយកបានទាំងនៅលើ Play Store (Android) និង App Store (iOS)។

ក្នុងនាមយើងជាអ្នកកំពុងប្រើប្រាស់បណ្តាញទំនាក់ទំនងយ៉ាងសកម្មសព្វថ្ងៃនេះ តើអ្នកប្រាកដទេថា រាល់ទិន្នន័យដែលអ្នកបានផ្ញើចេញ នឹងមិនបែកធ្លាយ ឬ វាត្រូវដល់ពេល ដែលអ្នកគួរងាកមកជ្រើសរើសបណ្តាញទំនាក់ទំនងដែលទិន្នន័យរបស់អ្នកត្រូវបានធានា ១០០% ថានឹងមិនបែកធ្លាយ ? HelloTalk គឺជាចម្លើយ !!!

អត្ថបទដោយ៖ ផែន ផាន់ណា

បន្តអានអត្ថបទបន្ទាប់
ស្វែងយល់អំពីពួកយើង
ទំនាក់ទំនង​មក​ពួក​យើង
© 2024 Baksey Media. All Rights Reserved.
Developed by: Technology Camabodia Team