សិក្ខាសាលានេះត្រូវបានធ្វើឡើង ក្រោមអធិបតីភាព របស់ ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច​ និង ហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការសេដ្ឋកិច្ច និងធុរកិច្ចឌីជីថល (គ.ស.ធ.ឌ.)​​, និងមានការអញ្ជើញចូលរួមពីថ្នាក់ដឹកនាំ និង​ តំណាងក្រសួង ស្ថាប័ន នៃរាជរដ្ឋាភិបាល, វិស័យឯកជន, សមាគម, គ្រឹះស្ថានអប់រំ និង ក្រុមហ៊ុនដំណោះស្រាយឌីជីថល។ សិក្ខាសាលានេះត្រូវបានរៀបចំឡើងក្រោមគោលបំណង ពង្រឹងចំណេះដឹងទាក់ទងទៅនឹងបច្ចេកវិទ្យាហិរញ្ញវត្ថុ, ចែករំលែកបទពិសោធន៍, និង ផ្ដល់វេទិកាសម្រាប់បង្កើតទំនាក់ទំនងជាមួយគ្នាក្នុងប្រព័ន្ធអេកូឡូស៊ីនៃធុរកិច្ចក្នុងសេដ្ឋកិច្ចឌីជីថល។

សិក្ខាសាលានេះបានចាប់ផ្តើមដោយសុន្ទរកថារាយការណ៍ របស់ លោកជំទាវ ផល​ ម៉ារីណា អគ្គលេខា-ធិការរង នៃអគ្គលេខាធិការដ្ឋាន គ.ស.ធ.ឌ.និង ការថ្លែងសុន្ទរកថាបើកដោយ ឯកឧត្តមបណ្ឌិត​​ គង់ ម៉ារី។ នៅក្នុងនោះ, ឯកឧត្តមបណ្ឌិត បានគូសរំលេចពីការរីកចម្រើននៃបច្ចេកវិទ្យាឌីជីថល ជាពិសេស បច្ចេក-វិទ្យាហិរញ្ញវត្ថុ ដែលក្លាយជាកម្លាំងចលករមួយដ៏ចម្បងក្នុងការជំរុញសម្ទុះកំណើនសេដ្ឋកិច្ចកម្ពុជា តាមរយៈការប្រើប្រាស់បច្ចេកវិទ្យាថ្មីៗ និង នវានុវត្តន៍ ក្នុងវិស័យហិរញ្ញវត្ថុ ទាំងវិស័យធនាគារ និង វិស័យហិរញ្ញវត្ថុមិន-មែនធនាគារ។ ទៀតសោត ការប្រើប្រាស់បច្ចេកវិទ្យាហិរញ្ញវត្ថុ មានដូចជា ប្រព័ន្ធទូទាត់សងប្រាក់បាគង, ខេ-អេចឃ្យូអរ (KHQR), សេវាធនាគារចល័ត (Mobile Banking), ព្រមទាំងសេវាកម្ម និង ផលិតផលបច្ចេកវិទ្យាជាច្រើនទៀត បាន និង កំពុងបំពេញតម្រូវការ និង ជួយសម្រួលដល់ការរស់នៅប្រចាំថ្ងៃ និង ការធ្វើសុវុឌ្ឍិកម្មសេវាហិរញ្ញវត្ថុ សម្រាប់ប្រជាពលរដ្ឋទូទៅ និង សហគ្រាសផងដែរ។​ បន្ថែមពីលើនេះទៅទៀត, សិក្ខាសាលានេះគឺជាឱកាសដ៏ពិសេសសម្រាប់សហគ្រាសធុនតូច និង មធ្យម, ជាពិសេសលើកទឹកចិត្តដល់ធុរជន និង ម្ចាស់សហគ្រាស ក្នុងការស្វែងយល់បន្ថែមពីបច្ចេកវិទ្យាហិរញ្ញវត្ថុ និង ការប្រើប្រាស់សេវាកម្ម ឬ ដំណោះស្រាយឌីជីថល ដើម្បីទាញយកអត្ថប្រយោជន៍ជាអតិបរមាពីបច្ចេកវិទ្យា។ ជាមួយគ្នានេះដែរ ឯកឧត្តមបណ្ឌិត ក៏បានលើកទឹកចិត្តដល់ក្រសួង ស្ថាប័ន និង តួអង្គពាក់ព័ន្ធទាំងអស់ចូលរួមសហការជាមួយ អគ្គលេខាធិការដ្ឋានគណៈកម្មា-ធិការសេដ្ឋកិច្ច និង ធុរកិច្ចឌីជីថល ក្នុងការបន្តរៀបចំផ្តួចផ្តើមផ្សេងៗ សំដៅដល់ការលើកកម្ពស់ និង ជំរុញការ-បង្កើនចំណេះដឹង និង អក្ខរកម្មបច្ចេកវិទ្យាហិរញ្ញវត្ថុសម្រាប់ធុរជនកម្ពុជាឱ្យកាន់តែមានវិសាលភាពខ្ពស់នាពេលខាងមុខទៀត។ នៅក្នុងដំណើរការនៃសិក្ខាសាលានេះ មានបទបង្ហាញចំនួន ២ ដែលផ្តោតលើ៖ (១). ទិដ្ឋភាពទូទៅ និង ការអភិវឌ្ឍបច្ចេកវិទ្យាហិរញ្ញវត្ថុនៅកម្ពុជា, (២) ស្វែងយល់ពីបច្ចេកវិទ្យាហិរញ្ញវត្ថុ៖ ហេតុអ្វីបានជាបច្ចេកវិទ្យាហិរញ្ញវត្ថុមានសារៈសំខាន់សម្រាប់សហគ្រាសធុនតូច និង មធ្យម, និង កិច្ចពិភាក្សាចំនួន ១ លើប្រធានបទ “ការទាញយកអត្ថប្រយោជន៍៖ តើអ្វីជាអាទិភាពគន្លឹះដែលសហគ្រាសធុនតូច និង មធ្យម គួរតែស្វែងយល់ពីបច្ចេកវិទ្យាហិរញ្ញវត្ថុនៅកម្ពុជា”។ បទបង្ហាញនីមួយៗ  បានផ្តល់ជាព័ត៌មានមូលដ្ឋាន បទពិសោធន៍

ឧត្តមានុវត្តន៍ និង​ ការបណ្តុះប​ណ្តាលពាក់ព័ន្ធនឹងចំណេះដឹងហិរញ្ញវត្ថុឌីជីថល និង ជំនាញបច្ចេកវិទ្យាថ្មីៗ ដល់ធុរជន​ ម្ចាស់អាជីវកម្ម សហគ្រាសនៅកម្ពុជា និង អ្នកចូលរួម។

​          ជាលទ្ធផល សិក្ខាសាលានេះមានអ្នកចូលរួមសរុបចំនួន  ១៥០ នាក់ និង បានបញ្ចប់ទៅដោយរលូន តាមរយៈការបង្កើតវេទិកាឱ្យមានការជជែកពិភាក្សាពីបច្ចេកវិទ្យាហិរញ្ញវត្ថុ  សម្រាប់សហគ្រាសនៅកម្ពុជា។

គណៈកម្មាធិការសេដ្ឋកិច្ច និង ធុរកិច្ចឌីជីថល នឹងបន្តឱ្យមានការរៀបចំកម្មវិធីសិក្ខាសាលាបែបនេះបន្តទៀត នៅឆ្នាំបន្តបន្ទាប់ដោយផ្តោតទៅលើប្រធានបទផ្សេងៗ ពាក់ព័ន្ធនឹងសេដ្ឋកិច្ច និង ធុរកិច្ចឌីជីថល។

សម្រាប់ព័ត៌មានអំពីសិក្ខាសាលា ឬ កម្មវិធីពាក់ព័ន្ធនឹងចំណេះដឹងឌីជីថលផ្សេងៗរបស់ធុរកិច្ចនៅកម្ពុជា សូមសាធារណជន ទាំងអស់មេត្តាតាមដានលើគេហទំព័រ និង គ្រប់បណ្ដាញសង្គមរបស់អគ្គលេខាធិការដ្ឋាន

គណៈកម្មាធិការសេដ្ឋកិច្ច និង ធុរកិច្ចឌីជីថល​  (គ.ស.ធ.ឌ.)។

• គណៈកម្មាធិការសេដ្ឋកិច្ច និង ធុរកិច្ចឌីជីថល
• គេហទំព័រផ្លូវការ៖ https://digitaleconomy.gov.kh
• គេហទំព័រហេ្វកប៊ុកផ្លូវការ៖គណៈកម្មាធិការសេដ្ឋកិច្ច និង ធុរកិច្ចឌីជីថល - គសធឌ