នៅក្នុងកំណត់ត្រាបំបែកឯតទគ្គកម្មពិភពលោកនេះ គេបានចាប់ទុកត្រីបបែលយក្សទឹកសាប ឈ្មោះបូណ៌មី គឺជាប្រភេទពូជត្រីកម្រ និងជិតផុតពូជ។ បើទោះបីជាបបែលទឹកសាបនេះ ត្រូវបានរកឃើញដោយប្រជានេសាទនៅក្នុងខេត្តស្ទឹងត្រែងក្ដី ប៉ុន្តែការពិនិត្យ និងវាសវែង ក៏មានការចូលរួមពីក្រុមអ្នកជំនាញអន្តរជាតិ (ក្រុមអច្ឆរិយៈនៃទន្លេមេគង្គ) ដោយសហការជាមួយរដ្ឋបាលជលផលកម្ពុជាផងដែរ។

សរុបមក៖ ត្រីបបែលបូណ៌មី ដែលរកឃើញក្នុងប្រទេសកម្ពុជាយើង ពេលនេះត្រូវបានគេដាក់ចូលជាប្រភេទត្រីដែលជិតផុតពូជ​ និងជាត្រីដែលអស្ចារ្យមួយនៅលើផែនដី ដោយសូម្បីតែអ្នកវិទ្យាសាស្ត្រក៏មានការភ្ញាក់ផ្អើលខ្លាំងណាស់ដែរ ពេលបានឃើញវត្តមានរបស់ត្រីនេះដំបូង។ គួរជម្រាបផងដែរ ពេលចាប់បានបបែលនេះ កាលពីពាក់កណ្ដាលខែមិថុនាកន្លងទៅ ក្រុមអ្នកជំនាញរបស់ អច្ឆរិយៈទន្លេមេគង្គ ក៏បានភ្ជាក់នូវសេនស័រជាប់កន្ទុយរបស់វា ដើម្បីចង់ដឹងថា តើត្រីបបែលដ៏កម្រនេះ មានការបម្លាស់ទី និងរស់នៅដូចម្ដេចខ្លះផងដែរ។

អត្ថបទដោយ៖ ផែន ផាន់ណា