ជាទូទៅ យើងធ្លាប់តែបានឃើញនូវរ៉ូបូត AI ដែលវាភាគច្រើន រ៉ូបូតនេះភាគច្រើនគឺមាននៅឯក្រៅប្រទេស ប៉ុន្តែឥឡូវនេះនៅប្រទេសកម្ពុជាយើងក៏មាននូវរ៉ូបូតដើរដោយ AI ដែលគេយកមកបម្រើការងាររត់តុក្នុងហាងកាហេ្វមួយឈ្មោះថា Black Canyon នៅផ្សារទំនើបអ៊ីអនម៉ល ភ្នំពេញ ។
បើយោងតាមការស៊ើបសួរពី កញ្ញា ភី សុភារ៉ា ដែលជានាយកប្រតិបត្តិអភិវឌ្ឍន៍អាជីវកម្ម ក្នុងហាងកាហ្វេឈ្មោះ Black Canyon បានប្រាប់មកខាងសារព័ត៌មាន Technology Cambodia (ចាបខៀវ ) បានឲ្យដឹងថា រ៉ូបូតនេះអាចជួយសម្រាលការងាររបស់មនុស្សបានច្រើនណាស់ ជាពិសេសនៅពេលដែលបុគ្គលិកជាប់រវល់ គេយករ៉ូបូត AI នេះមក ជួយលើភេសជ្ជ: ឬកាហ្វេ ទៅកាន់កន្លែងតុភ្ញៀវ ដែលគេបានកំណត់ ។
រ៉ូបូត AI នេះអាចដំណើរការបានគឺដោយសារតែវាមានកាមេរ៉ា AI ពីខាងមុនសម្រាប់ចាប់សញ្ញា ដោយមានជំនួយពី Sensor នៅខាងលើ ជាប់ពិដានហាង រួចក៏គេកំណត់ផ្លូវសម្រាប់ឲ្យរ៉ូប៉ូតនេះដើរទៅត្រង់ជ្រុងណាមួយនៃតុ នៅក្នុងបរិវេនហាងទាំងមូល ។
ឧទាហរណ៍ថាយើងចុចបញ្ជាឲ្យវាយកកាហ្វេ ១ កែវទៅតុលេខ ៥ បន្ទាប់មកវាធ្វើដំណើរទៅភា្លមៗ នៅពេលដែលដល់កន្លែងតុលេខ ៥ នោះ រ៉ូបូត AI នឹងបង្ហាញនូវពាក្យថា Return to Starting point ត្រង់កន្លែងនេះវាអនុញ្ញាតឲ្យភ្ញៀវយកនូវកាហ្វេចេញពីថ្នើរដែលគេបានដាក់ដូចនៅក្នុងរូបខាងលើនេះអ៊ីចឹង បន្ទាប់មកទៀតយើងត្រូវចុចនូវ ប៊ូតង់ពាក្យខាងលើនោះ ដើម្បីឲ្យវាត្រឡប់ទៅកន្លែងដើមវិញ ។
មិនត្រឹមតែប៉ុណ្ណោះ វាមិនត្រឹមតែអាចលើកកាហ្វេជូនភ្ញៀវនោះទេ វាក៏អាចច្រៀងចម្រៀងអមជាមួយក្បាច់រាំគួរឲ្យស្រឡាញ់ថែមទៀតផង ។ លើសពីនេះ នៅពេលមានកម្មវិធីខួបកំណើត និងបុណ្យ គ្រីសស្មិក យើងអាចកំណត់ឲ្យរ៉ូបូតនេះច្រៀងបានចម្រៀងជូនពរ ទាំងអស់នោះបានថែមទៀតផង ។
សរុបមករ៉ូបូតនេះ គឺមានគុណសម្បត្តិជាច្រើនណាស់ វាអាចជួយសម្រាលការងារមនុស្សបានច្រើន ហើយប្រសិនជារមណីដ្ឋាន និងហាងកាហ្វេនៅស្រុកខ្មែរយើងមានរ៉ូបូតAIនេះ ក្នុង ១ ហាងមាន១គ្រឿង នោះវាពិតជាបង្កើននូវសោភណ្ឌភាពហាងឲ្យកាន់តែស្អាត ពោរពេញដោយបច្ចេកវិទ្យាទំនើបៗ ។ សូមជំរាបជូនប្រសិនបងប្អូនចង់ស្គាល់ ឬទៅលេងជាមួយរ៉ូបូតនេះ អាចទៅកាន់ហាងកាហ្វេ Black Canyon នៅជាន់ទី២ នៃផ្សារទំនើបអ៊ីអនមល ភ្នំពេញ តែមួយកន្លែងតែប៉ុណ្ណោះ ៕
អត្ថបទដោយ៖ ព្រឹម ភក្តី
