កាលពីពេលថ្មីៗនេះ បើយោងតាមគេហទំព័រផ្លូវការរបស់ ក្រុមហ៊ុន Honda បានបង្ហាញនូវរថយន្តថ្មីសេរីឆ្នាំ ២០២៣ ដ៏ស្រស់ស្អាត គឺ Honda ZR-V ប្រភេទ SUV មានទាំងជម្រើស Hybrid មកជាមួយផងដែរ ហើយរថយន្តមួយនឹងធ្លាក់លើដៃប្រជាជនជប៉ុនដំបូងគេបង្អស់ មុនពេលនាំចេញទៅក្រៅប្រទេស ។
យ៉ាងណាមិញបើយើងនិយាយអំពីរូបរាងខាងក្រៅរបស់ Honda ZR-V មួយគ្រឿងពណ៌ក្រហមមួយនេះ ចំពោះផ្នែកខាងមុខ ត្រូវបានរចនាយ៉ាងស្អាតមែនទែន ដោយការប្តូរពីបាណាសេរីចាស់ ជំនួសមកវិញដោយការឌីហ្សាញបែបជ្រុងៗ តម្រៀបជាជួរៗកាន់តែទាក់ភ្នែក តែរូបរាងបែបនេះវាស្រដៀងនឹងរថយន្តរបស់ BMW សេរីចេញមកថ្មីៗផងដែរ ។ ចំណែកផ្នែកខាងក្រោយវិញនោះ ត្រង់កន្លែងភ្លើងស្តុប ចង្ក្រាងសាញូឆ្វេងស្តាំ ព្រមទាំងស៊ីម៉ាំងភ្លោះពីរទៀត គឺត្រូវបានរចនាម៉ូតថ្មីទាំងស្រុង អាចនិយាយបានថាទំនើបទាន់សម័យ ។
ក្រឡេកមកផ្នែកខាងក្នុង រថយន្តនេះវិញម្តង យើងបានឃើញអំពីលក្ខណ:ឌីហ្សាញគ្មាននូវប៊ូតុងច្រើននោះទេ ព្រោះរាល់ការបញ្ជាក់លើឧបករណ៍ទាំងអស់ស្ថិតលើអេក្រង់ Touchscreen តែមួយគត់ ហើយចំណុចទាក់ភ្នែកមួយទៀតនោះគឺត្រង់កន្លែងម៉ាស៊ីនត្រជាក់ ត្រូវបានដាក់បង្កប់ជាមួយតាប់ឡូដែលមានរាងជាបន្ទត់ត្រង់មួយ ។
ម្យ៉ាងវិញទៀត Honda ZR-V ក៏បានមកជាមួយនឹងប្រព័ន្ធ Hybrid ផងដែរ ដោយត្រូវបានផ្តល់មកជា ២ ជម្រើស រូមមាន Sport e: HEV និង e-HEV ធម្មតា ។ ជម្រើសទាំងពីរនេះ មានលក្ខណ:ស្រដៀងគ្នា ដែលមានជាម៉ាស៊ីនសាំង ២.០ លីត្រ ប្រើឧបករណ៍ស្រូបខ្យល់ស្អំម៉ាស៊ីនប្រើជាមួយនឹង Turbocharged និងម៉ូទ័រអគ្គិសនី ២ គ្រឿង ចំពោះប្រអប់លេខរបស់ Honda ZR-V ត្រូវបានប្រើប្រើប្រាស់ជាមួយ Hybrid e-CVT ដែលវាដំណើរការបានដោយថាមពលអគ្គិសនីជំនួយដល់ការប្តូរលេខឲ្យកាន់តែលឿន ។
លើសពីនេះ ចំពោះ Honda ZR-V ក៏មានជម្រើសប្រើជាម៉ាស៊ីនសាំងសុទ្ធចំណុះ ១.៥ លីត្រ ប្រើឧបករណ៍ស្រូបខ្យល់ស្អំម៉ាស៊ីនប្រើជាមួយនឹង Turbo និងមានប្រអប់លេខប្រភេទ CVT ដំណើរការធម្មតាជាមួយខ្សែពាន ។
គួរជំរាបផងដែរថា ក្រុមហ៊ុន Honda នឹងប្រកាសដាក់លក់ ព្រមទាំងតម្លៃរបស់ Honda ZR-V ដំបូងគេបង្អស់នៅប្រទេសជប៉ុន គឺនៅថ្ងៃទី ១៣ ខែសីហា ឆ្នាំ២០២២ នាពេលខាងមុខនេះ ៕
អត្ថបទដោយ ៖ ព្រឹម ភក្តី
