នេះបើយោងតាមគេហទំព័រ Caranddrive បានឲ្យដឹងថា ក្រុមហ៊ុន Toyota បានបង្ហាញនូវរថយន្ត ៣ ប្រភេទ ផ្សេងៗគ្នាជាសេរីឆ្នាំ២០២៣ ដែលប្រុងនឹងបញ្ចេញលក់កើបលុយវាល់លានដុល្លារនាឆាប់ៗនេះហើយ ។ តួយ៉ាងរថយន្តទាំង ៣ ប្រភេទដែលបានបង្ហាញទាំងនោះ គឺស្ថិតក្នុងម៉ូដែលតែមួយគឺ Toyota Crown សេរី ២០២៣ រួមមាន Sedan , Estate និង Sport ( Crossover ) ដែលវាចេញជារូបរាងលើកនេះ មានភាពទាក់ភ្នែកជាខ្លាំង ហើយក្នុងចំណោមរថយន្តទាំងបីនោះ ក៏មានប្រភេទរថយន្តប្រើថាមពលអគ្គិសនីពាក់កណ្ដាលប្រើសាំង(Hybrid) ផងដែរ ។
ដូច្នេះថ្ងៃនេះក្រុមការងារចាបខៀវនឹងបង្ហាញនូវរថយន្តទាំងបីប្រភេទខាងក្រោមនេះ ជូនដល់ប្រិយមិត្តអ្នកអានជាពិសេសតែម្តង ។សូមអានបន្តនៅអត្ថបទខាងក្រោម ៖
១ . Toyota Crown ប្រភេទ Sedan
ចំណុចទាក់ផ្នែកដំបូងគេ ប្រាកដណាស់គឺជាពណ៌សម្បុរ ជាប្រាក់(Silver) និងពណ៌មាស(Gold) របស់រថយន្ត Toyota Crown ប្រភេទ Sedan មួយនេះ ដែលបង្ហាញពីស៊ីវិល័យបែបឡូយឆើតឆៃ លាយបញ្ចូលជាមួយនឹងគំនិតច្នៃប្រតិដ្ឋខ្ពស់ ព្រមទទាំងមានបំពាក់នូវប្រព័ន្ធ Hybrid ដដែល ។ ថ្វីត្បិតតែ វាមានរូបរាងស្រដៀងនឹង Toyota Marai ក៏ពិតមែន ប៉ុន្តែភាពលេចធ្លោរបស់ Toyota Crown នេះនៅតែមាន ជាពិសេសគឺត្រង់កន្លែងប៉ាណាខាងមុខគឺមានរូបរាងដូច Sticker 😁នេះអ៊ីចឹង នៅចំកណ្ដាល ដោយទុកចន្លោះឲ្យខ្យល់ចូលសល់តែប្រឡោះលើក្រោមបន្តិចនោះទេ ។
មួយវិញទៀត ចំពោះអំពូល LED ផ្នែកខាងមុខ ត្រូវបានគេហៅថា Multi-Beam headlight ហើយវាមាននៅលើតែរថយន្តប្រភេទ Sedan ដែលមាន ៣ ម៉ូដែលផ្សេងៗគ្នាទៀត រួមមាន XLE , XLE limited និង Platinum ផងដែរ ។ ចំណែកឯផ្នែកក្រោយ ក៏ត្រូវបានលេងស្ទីលដូចពីមុខដែរ ប៉ុន្តែក៏បានបន្ថែមនូវកាបូនហ្វ័យប័រនៅចន្លោះឡូហ្គូ Toyota និងអក្សរផុស Crown ផ្ទុយមកវិញ ចំពោះខ្ពស់និងប្រវែងរបស់រថយន្តនេះខាង Toyota មិនទាន់បានបង្ហើបនៅឡើយទេ ។
Toyota Crown សេរីឆ្នាំ ២០២៣ នេះ ក៏បានមកដល់ជាមួយនឹងប្រព័ន្ធ Hybrid ដែរ និងមានម៉ូទ័រ ៣ គ្រឿងមុខក្រោយ រួមផ្សំនឹងម៉ាស៊ីនសាំង 2.5 លីត្រ ៤ ស៊ីឡាំង ប្រើជាប្រអប់លេខស្វ័យប្រវត្តិ CVT ៦វគ្គ ហើយចំពោះការផលិតកម្លាំងរួមគ្នាអាចបង្កើតកម្លាំងបានដល់ 236 សេះ សូមបញ្ជាក់ថាទំហំម៉ាស៊ីនទាំងនេះមាននៅលើម៉ូដែល XLE និង XLE Limited ។
លើសពីនេះ Toyota ក៏បានបញ្ចេញនូវបច្ចេកវិទ្យាថ្មី Hybrid Max មាននៅលើម៉ូដែល Platinum តែមួយប៉ុណ្ណោះ ។ ការបំពាក់នូវបចេ្ចកវិទ្យា Hybrid Max ថ្មីនេះ ត្រូវបានដាក់ឲ្យប្រើលើម៉ូទ័រ ១ គ្រឿងទេ រួមជាមួយនឹងម៉ាស៊ីនសាំងចំណុះ 2.4 លីត្រ 4 ស៊ីឡាំង ដោយកម្លាំងរួមគ្នាទាំងអស់ រត់អ័ក្សខាងក្រោយ អាចផលិតកម្លាំងរហូតដល់ 340សេះ ឯណោះ ប៉ុន្តែចំពោះប្រអប់លេខដូចគ្នាជាមួយម៉ូដែលមុនដែរ ។
២ . Toyota Crown ប្រភេទ Estate
ចំពោះរថយន្ត Estate នេះមានរូបរាងគឺធំជាង Crossover បន្តិចដែលគេហៅវាថា Estate Station Wegon ចំពោះរូបរាងនៃការឌីហ្សាញមកលើកនេះវស្រដៀងទៅនឹងពពួក Lexus Lineup ព្រមទាំងយកគំរូតាមរថយន្តអគ្គិសនី Toyota bz4x ដែលកំពូងផ្ទុះចំណាប់អារម្មណ៍ពេញបណ្តាញសង្គមនានា ។ ចំពោះគ្រឿងម៉ាស៊ីន ស្ពិចម៉ាស៊ីន បច្ចេកវិទ្យាដែលបានបំពាក់ផ្សេងៗទៀត ខាងក្រុមហ៊ុន Toyota មិនបានបញ្ចេញជាផ្លូវការនៅឡើយទេ ប្រហែលលាក់ទុក Surprise នៅពេលចេញតម្លៃហើយមើលទៅ ។
៣ . Toyota Crown ប្រភេទ Sport (Crossover)
ចំពោះម៉ូដែលចុងក្រោយនេះ វាមានទំហំតូចជាង Estate បន្តិចទេ ប៉ុន្តែវាមកជាមួយនឹងនិមិត្តសញ្ញា Sport ពណ៌ក្រហមចាំងភ្នែកមែនទែន ហើយនេះជាពណ៌សំណព្វចិត្តរបស់ Admin ផងដែរ ។ ចំពោះរថយន្តប្រភេទនេះផងដែរ គេក៏មិនបានបញ្ជាក់ពីកម្លាំងម៉ាស៊ីននោះទេ ហើយសម្រាប់ព័ត៌មានច្បស់ការយ៉ាងណា ក្រុមការងារចាបខៀវនឹងអាប់ដេតថ្មីជូន នៅថ្ងៃក្រោយទៀត
ប្រភព ៖ Caranddrive , Jdpower
អត្ថបទដោយ ៖ ព្រឹម ភក្តី
