អ្នកទាំងអស់ប្រាកដជាឆ្ងល់យូរមកហើយ អំពីតម្លៃម៉ូតូអ៊ីតាលីរូបរាងសាមញ្ញ បែប Classic របស់ Vespa ដែលមានតម្លៃថ្លៃជាងម៉ូតូផ្សេងៗ រូបរាង ការឌីហ្សាញ ស្រដៀងនឹងម៉ូតូ Honda Today តែនិយាយរឿងតម្លៃវិញគឺថា ខុសគ្នាដូចមេឃនិងដីអ៊ីចឹង។
នៅថ្ងៃនេះដែរ admin នឹងធ្វើការ ជីកកកាយ ស្រាយចម្ងល់បងប្អូនទាំងអស់គ្នាដែលបានទុកយូរ តាំងពីម៉ាកយីហោនេះបង្កើតឡើងនៅឆ្នាំ ១៩៤៦ មកម្លេះ។ តោះអ៊ីចឹងយើងទៅដឹងអំពីមូលហេតុទាំង 6 ដែលធ្វើឲ្យម៉ូតូ Vespa មានតម្លៃថ្លៃកប់លើសគេលើសឯងបែបនេះ ។
១ . តួខ្លួនទាំងមូល ធ្វើអំពីវត្ថុធាតុម្យ៉ាងដែលមានតម្លៃថ្លៃ
គ្រប់ម៉ូតូរបស់ Vespa ទាំងអស់ គឺត្រូវបានផលិតមក ដោយមាន តួខ្លួនស្រោបដោយដែកម្យ៉ាងមានឈ្មោះថា monocoque ដែលសភាពរឹងមាំ ស្វិតជាងប្រេនម៉ូតូ Scooter ដទៃទៀត។
លោក Corradino D’Ascanio ជាអ្នកបង្កើត Vespa ដំបូងគេបង្អស់ ហើយលោកក៏ជាវិស្វករអាកាសចរណ៍ ហើយគាត់បានយកការបំផុសគំនិតពីយន្តហោះសមុទ្រ(អាចអណ្តែតលើទឹកបាននិងហោះលើអាកាសក៏បាន ) ក្បាលរថភ្លើង និងរថយន្ត ដើម្បីតែបង្កើតម៉ូតូនេះឡើងមក។
Vespa ត្រូវបានបង្កើតឡើងនៅឆ្នាំ ១៩៤៦ ហើយម៉ូតូដែលបានផលិតចេញមកដំបូងគេនោះគឺ Vespa 98 ដោយត្រូវបានផលិតនៅក្នុងរោងចក្ររបស់ក្រុមហ៊ុន Piaggio ពេលនោះដែរ តួខ្លួននៃម៉ូតូ Vespa គឺស្រោបដោយស៊ុមដែកការពារយ៉ាងមាំ មិនចាញ់ឡាន និងគ្រឿងយន្តនៅសម័យនោះទេ ហើយដែកទាំងនោះសុទ្ធសឹងតែមានតម្លៃថ្លៃផងដែរ។
២. Vespa មានស្លាកសញ្ញាផលិតប្រទេសតែ ៣ ប៉ុណ្ណោះ
បងប្អូនទាំងអស់គ្នាធ្លាប់ដឹងរឿងខ្លះៗពីចំណូលចិត្តរបស់ប្រជាជនវៀតណាមទេ? ពួកគេនៅទីនោះ គឺចូលចិត្តជិះម៉ូតូធ្វើជាយានជំនិះជាជាងឡាន ជាពិសេសប្រភេទម៉ូតូ Scooter តែម្តង ដោយសារកត្តាបែបនេះទើបរោងចក្រផលិតដ៏ធំរបស់ Vespa បានបោះបង្គោលចាក់គ្រិះយ៉ាងមាំនៅខេត្ត វិញហ្វុក (Vinh Phuc) នៃប្រទេសវៀតណាម ណាមួយទីផ្សារសម្រាប់អ្នកនិយមជិះម៉ូតូ Vespa គឺធំជាងសហរដ្ឋអាមេរិក ៣ដង និងអឺរ៉ុប ២ដង ។ ក្រៅពីរោងចក្រផលិតធំៗរបស់ Vespa គឹនៅប្រទេសអ៊ីតាលី និងប្រទេសឥណ្ឌា។
៣. អារម្មណ៍
គ្រប់ផលិតល្បីៗ និងមានតម្លៃថ្លៃទាំងអស់សុទ្ធសឹងបានដាក់អារម្មណ៍នៅក្នុងផលិតផលរបស់ពួកគេ ជាក់ស្តែងដូចម៉ូតូ Vespa នេះអ៊ីចឹង តួខ្លួនទាំងមូលត្រូវបានស្រោបដោយដែក monocoque មានទម្ងន់ធ្ងន់ ដែលធ្វើឲ្យអ្នកកំពុងតែជិះមានអារម្មណ៍ ប្លែកជាងម៉ូតូផ្សេងៗ ដែលមានទម្ងន់ស្រាល និយាយរួម បើយើងធៀបគ្នាទៅ ម៉ូតូ Scooter ដូចជា Honda Yamaha អីនឹងដូចជាម៉ូតូកូនក្មេងជិះ មកធៀបនឹងម៉ូតូមនុស្សពេញវ័យជិះអ៊ីចឹង។
ម្យ៉ាងវិញម៉ូតូនេះដែរ ក៏បានលាយលំជានឹងសិល្ប:នៃការច្នៃប្រឌិតខ្ពស់ អមជាមួយនឹងការឌីហ្សាញបែបបុរាណកាត់សម័យ និងមានការ customize ពណ៌ទៅតាមចំណងចំណូលចិត្តរបស់អតិថិជនថែមទៀតនោះ ហេតុដូចនេះតម្លៃរបស់ម៉ូតូក៏ថ្លៃតាមហ្នឹងផងដែរ ជាក់ស្តែងដូចជា Vespa 946 x Dior ដែលមានតម្លៃជាង ១០ម៉ឹនដុល្លារ លក់នៅប្រទេសវៀតណាម ហើយក៏ជាតម្លៃទាបបំផុតដែលបានដាក់លក់នៅទីនោះ។
៤. គ្រាមួយ ដែល Vespa ត្រូវបានគេស្គាល់ទូទាំងពិភពលោក និងលក់ដាច់បំផុត
ម៉ូតូដែលមានស្លាកសញ្ញាឡូហ្គូក្រោមចង្ក្រៀងខាងមុខ Piaggio មានភាពល្បីឈ្មោះខ្លាំងបំផុត បន្ទាប់រឿង Roman Holiday ដោយសម្តែងដោយអ្នកស្រី Audrey Hepburn និងលោក Gregory Peck ត្រូវបានចាក់បញ្ចាំង នៅឆ្នាំ ១៩៥៣ ពេលនោះរឿងនេះល្បីខ្លាំង ក៏មានអ្នកចាប់អារម្មណ៍ច្រើនទៅលើម៉ូតូដែល តួអង្គឯកទាំងពីរបានជិះក្នុងសាច់រឿង ហើយក៏ជាពេលវេលាមួយធ្វើឲ្យ Vespa ផ្ទុះការបញ្ជារទិញ ជាខ្លាំងជុំវិញពិភពលោក រហូតមកដល់បច្ចុប្បន្ន។
៥. ម៉ូតូ Vespa លក់វិញនៅតែបានថ្លៃ
បើយោងតាមវេបសាយ J.D Power បាននិយាយថា ជាធម្យមនៅពេលម្ចាស់ម៉ូតូ Vespa ចង់លក់វិញ គឺពួកគេ មិនទទួលបានតម្លៃខាតច្រើននោះទេ យ៉ាងហោចណាស់បើពួកគេយកទៅប្រើប្រាស់ ៣ឆ្នាំ ចង់លក់វិញ នឹងទទួលបានតម្លៃ 72.1% នៃតម្លៃម៉ូតូ ប៉ុន្តែប្រសិនបើយើងរស់នៅក្នុងតំបន់ដែលនិយមជិះ Vespa ច្រើន នោះអាចទទួលបានតម្លៃសមរម្យជាងហ្នឹង ឬអាចថាចំណេញលើសនេះក៏ថាបាន។
៦. Vespa បង្កើតម៉ូតូមានលក្ខណ:ពិសេស និងមានកំណត់
ក្រុមហ៊ុន Piaggio គឺចូលចិត្តបង្កើតម៉ូតូដែលមានលក្ខណ:ពិសេសៗ និងផលិតម៉ូតូដែលមានកំណត់ ខុសប្លែកពីប្រេនម៉ូតូដទៃ ដូចជានៅចន្លោះឆ្នាំ ១៩៥១-១៩៥៣ យើងបានវត្តមាន Vespa 125 Sei Giorni ជាប្រភេទម៉ូតូមានកំណត់ ផលិតតែ ៣០០គ្រឿងប៉ុណ្ណោះ ហើយបានដាក់តម្លៃថ្លៃជាងម៉ូតូ Vespa ធម្មតាដល់ទៅ ៤ដង ថែមទៀត និង Vespa x Justin Bieber ដែលត្រូវបានឌីហ្សាញផ្ទាល់ពីតារាចម្រៀងដ៏ល្បី លោក Justin Bieber ហើយតម្លៃវិញខ្ទង់ ៤ពាន់ដុល្លារសម្រាប់ម៉ាស៊ីន ១២៥សេសេសេ និងខ្ទង់ ៥ពាន់ដុល្លារ សម្រាប់ម៉ាស៊ីន ១៥០សេសេ ដែលបានលក់នៅសហរដ្ឋមេរិក។
ទន្ទឹមនឹងនេះផងដែរ ថ្មីៗ ក៏មានលេចចេញមកម៉ូដែលថ្មីមួយទៀត គឺ Vespa 946 x Dior ជាប្រភេទម៉ូដែលមានកំណត់ ផលិតតែ៩៤៦គ្រឿងប៉ុណ្ណោះ ហើយតម្លៃរបស់ម៉ូតូនេះ បើលក់នៅប្រទេសវៀតណាម តិចណាស់ក៏ជាង ១០ម៉ឹនដុល្លារដែរ។
អ៊ីចឹងអ្នកទាំងអស់គ្នា គិតយ៉ាងដែរចំពោះប្រេនម៉ូតូអ៊ីតាលីមួយនេះ សុំយោបល់ម្នាក់មួយម៉ាត់មកណា៕
ប្រភពពី៖ vespavirgin
អត្ថបទដោយ៖ ព្រឹម ភក្តី
