បទបញ្ជាដែលត្រូវបានពង្រីកនេះ នឹងគ្របដណ្តប់ទៅលើឧបករណ៍ទាំងម៉ូឌែលចាស់ និងម៉ូឌែលថ្មី (មិនមែនត្រឹមតែម៉ូឌែលដែលផលិតចាប់ពីចុងឆ្នាំ២០២២ ដូចការហាមឃាត់លើកមុននោះទេ) ដែលជាផលិតផលរបស់ក្រុមហ៊ុនចិនល្បីៗ រួមមាន Huawei, ZTE, Hytera, Hikvision និង Dahua។ ឧបករណ៍ទាំងនោះ រួមមានឧបករណ៍ទូរគមនាគមន៍ និងប្រព័ន្ធវីដេអូឃ្លាំមើល ដែលត្រូវបានប្រើប្រាស់សម្រាប់សុវត្ថិភាពសាធារណៈ សន្តិសុខនៅតាមទីតាំងរបស់រដ្ឋាភិបាល និងការឃ្លាំមើលហេដ្ឋារចនាសម្ព័ន្ធសំខាន់ៗ។ ចំពោះមូលហេតុចម្បងដែលធ្វើឱ្យក្រុមហ៊ុនចិនទាំង ៥ ដូចជា Huawei, ZTE, Hytera, Hikvision, និង Dahua ប្រឈមមុខនឹងហានិភ័យធ្ងន់ធ្ងរ គឺដោយសារតែ វិធានការរឹតត្បិត និងពង្រីកបម្រាមជាបន្តបន្ទាប់ពីសំណាក់រដ្ឋាភិបាលសហរដ្ឋអាមេរិក។

ទោះជាយ៉ាងណាក៏ដោយ បទបញ្ជាថ្មីនេះមិនមានឥទ្ធិពលទៅលើឧបករណ៍ដែលប្រជាជនអាមេរិកកំពុងមាន និងប្រើប្រាស់នាពេលបច្ចុប្បន្ននោះទេ ពោលគឺពួកគេនៅតែអាចបន្តប្រើប្រាស់វាបានដដែល។ ជាមួយគ្នានេះ ការរឹតត្បិតចុងក្រោយនេះ ក៏មិនប៉ះពាល់ដល់ការនាំចូលម៉ូឌែលមុនៗនៃឧបករណ៍ដ្រូន និងប្រព័ន្ធរ៉ោតទ័ររបស់ចិនដែលធ្លាប់ត្រូវបាន FCC ហាមឃាត់មិនឱ្យនាំចូលតែម៉ូឌែលស៊េរីថ្មី កាលពីអំឡុងខែធ្នូ និងខែមីនាកន្លងទៅនោះដែរ។

ក្រៅពីវិធានការខាងលើ FCC ក៏កំពុងតែពិចារណាលើការដាក់ទណ្ឌកម្មបន្ថែម ដោយអាចនឹងហាមឃាត់ក្រុមហ៊ុនទូរគមនាគមន៍អាមេរិក មិនឱ្យធ្វើការតភ្ជាប់បណ្តាញជាមួយក្រុមហ៊ុនទូរគមនាគមន៍របស់ចិន។ ប្រសិនបើផែនការនេះត្រូវបានអនុម័ត វានឹងរារាំងក្រុមហ៊ុនចិនយ៉ាងមានប្រសិទ្ធភាព មិនឱ្យដំណើរការមជ្ឈមណ្ឌលទិន្នន័យនៅក្នុងទឹកដីសហរដ្ឋអាមេរិកបានឡើយ ខណៈដែលក្រុមហ៊ុនចិនមួយចំនួនដូចជា Hikvision បានដាក់ពាក្យបណ្តឹងតវ៉ាប្រឆាំងនឹងចំណាត់ការរបស់ FCC នេះរួចទៅហើយ។