ឈានមួយជំហានទៀត! SpaceX គ្រោងបំពាក់បន្ទះឈីប Nvidia  តម្លៃ ៤៤ ពាន់លានដុល្លារ ដើម្បីពង្រឹងហេដ្ឋារចនាសម្ព័ន្ធកុំព្យូទ័រ
Khunna - ឃុនណា
•
NOVEMBER 22 2026
•
នវានុវត្តន៍
•
14 views
•
2 mins read
•

ក្រុមហ៊ុនវិនិយោគ Apollo Global Management និងធនាគារ Goldman Sachs បានប្រកាសកាលពីថ្ងៃសុក្រ ទី២០ ខែវិច្ឆិកា ឆ្នាំ២០២៦ ថា ពួកគេបានកំណត់តម្លៃមូលបត្របំណុល ដែលមានទំហំទឹកប្រាក់ប្រមាណ ៤៤ ពាន់លានដុល្លារអាមេរិក ដើម្បីផ្តល់ហិរញ្ញប្បទានដល់ការទិញបន្ទះឈីប GPU និងឧបករណ៍ពាក់ព័ន្ធសម្រាប់ក្រុមហ៊ុន SpaceX។ ភាគីទាំងពីរបានចាត់ទុកកិច្ចព្រមព្រៀងនេះថាជាការផ្តល់ហិរញ្ញប្បទានលើបន្ទះឈីប GPU ដែលមានទំហំធំបំផុតមិនធ្លាប់មានគិតមកទល់ពេលនេះ ដោយសារតែមានតម្រូវការយ៉ាងខ្លាំងពីសំណាក់វិនិយោគិន រហូតធ្វើឱ្យទំហំទឹកប្រាក់ត្រូវបានដំឡើងខ្ពស់ជាងការគ្រោងទុកដំបូង។ 

Img 3557

ប្រភពហិរញ្ញប្បទានដ៏មហិមានេះ នឹងត្រូវយកទៅប្រើប្រាស់សម្រាប់ទិញបន្ទះឈីបជំនាន់ថ្មី Nvidia Vera Rubin ដើម្បីពង្រីកហេដ្ឋារចនាសម្ព័ន្ធប្រព័ន្ធកុំព្យូទ័រលើផ្ទៃដីរបស់ក្រុមហ៊ុន SpaceX។ កិច្ចព្រមព្រៀងនេះក៏ឆ្លុះបញ្ចាំងឱ្យឃើញពីតម្រូវការដើមទុនដ៏ច្រើនសន្ធឹកសន្ធាប់នៅក្នុងយុគសម័យបញ្ញាសិប្បនិម្មិត (AI) ខណៈដែលក្រុមហ៊ុនបច្ចេកវិទ្យាធំៗកំពុងប្រកួតប្រជែងគ្នាដណ្តើមទិញបន្ទះឈីបទំនើបៗ និងសាងសង់មជ្ឈមណ្ឌលទិន្នន័យ ដើម្បីទ្រទ្រង់ការអភិវឌ្ឍប្រព័ន្ធ AI របស់ពួកគេ។ 

យោងតាមរបាយការណ៍របស់ទីភ្នាក់ងារសារព័ត៌មាន Reuters កាលវិភាគនៃការជួលប្រើប្រាស់ ត្រូវបានរំពឹងថានឹងចាប់ផ្តើមនៅពេលដែលបន្ទះឈីប GPU និងឧបករណ៍ពាក់ព័ន្ធទាំងនោះត្រូវបានដឹកជញ្ជូនទៅដល់នៅក្នុងឆមាសទីមួយនៃឆ្នាំ ២០២៧។ នៅក្នុងប្រតិបត្តិការហិរញ្ញវត្ថុដ៏ធំនេះ ក្រុមហ៊ុនគ្រប់គ្រងទ្រព្យសកម្មលំដាប់ពិភពលោកដូចជា BlackRock, Goldman Sachs Asset Management និងគណនីដែលផ្តល់ប្រឹក្សាដោយ KKR សុទ្ធតែបានចូលរួមផ្តល់ការប្តេជ្ញាចិត្តវិនិយោគស្នូលផងដែរ។ 

Img 3559

គួររំលឹកផងដែរថា កាលពីខែមុន ក្រុមហ៊ុន SpaceX បានបញ្ជាក់រួចមកហើយថា ក្រុមហ៊ុនបុត្រសម្ព័ន្ធរបស់ Apollo Global Management នឹងធ្វើការទិញបន្ទះឈីប AI និងគ្រឿងម៉ាស៊ីន Server ទាំងនោះ រួចទើបដាក់ជួលបន្តឱ្យក្រុមហ៊ុន SpaceX ប្រើប្រាស់ ក្រោមកិច្ចព្រមព្រៀងដែលមានទំហំទឹកប្រាក់ដើមសរុបប្រមាណ ៤០ ពាន់លានដុល្លារ។ ទម្រង់នៃការផ្តល់ហិរញ្ញប្បទានបែបនេះ អនុញ្ញាតឱ្យក្រុមហ៊ុនបច្ចេកវិទ្យាអាចទទួលបានគ្រឿងបរិក្ខារកុំព្យូទ័រដែលមានតម្លៃថ្លៃយកមកប្រើប្រាស់បានទាន់ពេលវេលា ដោយមិនចាំបាច់បញ្ចេញសាច់ប្រាក់សុទ្ធទាំងដុលភ្លាមៗនោះទេ។

បន្តអានអត្ថបទបន្ទាប់
ស្វែងយល់អំពីពួកយើង
ទំនាក់ទំនង​មក​ពួក​យើង
© 2026 Baksey Media. All Rights Reserved.
Developed by: Technology Cambodia