ថ្ងៃទី២២ ខែវិច្ឆិកា ឆ្នាំ២០២៦ - វ៉ាស៊ីនតោន៖ ត្រឹមតែប៉ុន្មានម៉ោងបន្ទាប់ពីប្រធានាធិបតីអាមេរិក លោក ដូណាល់ ត្រាំ ត្រឡប់មកពីជំនួបជាមួយប្រធានាធិបតីចិន លោក ស៊ី ជីនពីង ក្នុងកិច្ចប្រជុំកំពូល APEC នៅទីក្រុង Shenzhen សមាជិកសភាមកពីគណបក្សសាធារណរដ្ឋអាមេរិកពីររូប គឺលោក Andrew Garbarino និងលោក John Moolenaar បានជំរុញឱ្យរដ្ឋបាលលោក ត្រាំ ដាក់ចេញយុទ្ធសាស្ត្រថ្មីដើម្បីទប់ទល់នឹងឥទ្ធិពលបញ្ញាសិប្បនិម្មិត (AI) របស់ទីក្រុងប៉េកាំង។ ពួកគេបានស្នើឱ្យរដ្ឋាភិបាលជួយគាំទ្រដល់ក្រុមហ៊ុនអភិវឌ្ឍន៍ម៉ូដែល AI ប្រភេទ Open-weight របស់អាមេរិក តាមរយៈការផ្តល់សិទ្ធិប្រើប្រាស់ធនធានកុំព្យូទ័ររបស់សហព័ន្ធ និងជំរុញឱ្យស្ថាប័នរដ្ឋាភិបាលប្រើប្រាស់ផលិតផលទាំងនោះ ដើម្បីបង្កើនទំនុកចិត្តដល់វិស័យឯកជន។

ការជំរុញនេះកើតឡើងចំពេលដែលម៉ូដែល AI ប្រភេទ Open-weight របស់ចិន កំពុងទទួលបានការពេញនិយមយ៉ាងខ្លាំងក្នុងចំណោមក្រុមហ៊ុនអាមេរិក ដោយសារវាមានតម្លៃថោកជាង និងមានសមត្ថភាពប្រហាក់ប្រហែលនឹងបច្ចេកវិទ្យារបស់ក្រុមហ៊ុនធំៗនៅអាមេរិក ដូចជា OpenAI និង Anthropic ជាដើម។ ជាក់ស្តែង កាលពីខែតុលាកន្លងទៅ ម៉ូដែល AI របស់ចិនបានជាប់ចំណាត់ថ្នាក់កំពូលទាំងបីដែលមានការប្រើប្រាស់ច្រើនជាងគេនៅលើទីផ្សារ AI OpenRouter ខណៈដែលអាមេរិកនៅមានកម្រិតនៅឡើយក្នុងប្រភេទម៉ូដែលនេះ បើទោះបីជាមានផលិតផលដូចជា Muse Glimmer របស់ Meta, Nemotron របស់ Nvidia និង Inkling របស់ Thinking Machines ក៏ដោយ។
សមាជិកសភាទាំងពីររូបបានព្រមានថា ទីក្រុងប៉េកាំងកំពុងប្រើប្រាស់ AI ដើម្បីធ្វើឱ្យក្រុមហ៊ុនបរទេសពឹងផ្អែកលើបច្ចេកវិទ្យារបស់ចិន ដែលបង្កជាការគំរាមកំហែងដល់សេដ្ឋកិច្ច និងសន្តិសុខជាតិរបស់សហរដ្ឋអាមេរិក។ ជំហរដ៏តឹងរ៉ឹងរបស់សមាជិកសភាទាំងនេះ ហាក់មានភាពផ្ទុយគ្នាបន្តិចទៅនឹងអាកប្បកិរិយាដ៏កក់ក្តៅរបស់លោក ត្រាំ ក្នុងអំឡុងពេលជំនួបជាមួយលោក ស៊ី ជីនពីង ដែលប្រទេសទាំងពីរកំពុងប្រកួតប្រជែងដណ្តើមឧត្តមភាពលើវិស័យបច្ចេកវិទ្យាស្នូលមួយនេះ។

ទន្ទឹមនឹងការជំរុញពីសភា រដ្ឋបាលលោក ត្រាំ ក៏កំពុងពិចារណាតម្រូវឱ្យក្រុមហ៊ុនអាមេរិកបង្ហាញជាសាធារណៈអំពីការប្រើប្រាស់ម៉ូដែល AI របស់ចិន ដើម្បីកាត់បន្ថយការពឹងផ្អែកដោយមិនចាំបាច់ដាក់កំហិតថ្មីដែលអាចធ្វើឱ្យប៉ះពាល់ដល់ទំនាក់ទំនងជាមួយទីក្រុងប៉េកាំង ឬវិស័យឧស្សាហកម្ម។ ក្រៅពីនេះ លោក ត្រាំ ក៏បានប្រកាសពីគម្រោងយកពន្ធយ៉ាងធ្ងន់ធ្ងរលើក្រុមហ៊ុនណាដែលសាងសង់មជ្ឈមណ្ឌលទិន្នន័យនៅក្រៅប្រទេស ក្នុងគោលបំណងជំរុញការវិនិយោគហេដ្ឋារចនាសម្ព័ន្ធ AI នៅក្នុងស្រុកវិញ៕
