សម្ដេចតេជោ ហ៊ុន សែន បានមានប្រសាសន៍ថា “បន្ដិចទៀតខែកក្កដានេះ រោងចក្រដំឡើងរថយន្ដ TOYOTA គឺនឹងរួចរាល់ អាចនឹងចាប់ផ្ដើមផលិតរថយន្ដនៅតំបន់សេដ្ឋកិច្ចពិសេសនេះ”។
យោងតាមប្រសាសន៍របស់សម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជណាចក្រកម្ពុជា ក្នុងពិធីសំណេះសំណាលជាមួយបងប្អូនកម្មករ និយោជិត នៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នៅថ្ងៃទី២៦ ខែឧសភា ឆ្នាំ២០២៣ នេះបានឲ្យដឹងថា គម្រោងរោងចក្រដំឡើងរថយន្ដ TOYOTA Tsusho Manufacturing (Cambodia) Co., Ltd. (“TTMC”) ដែលស្ថិតក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ អាចនឹងបើកដំណើរការនៅក្នុងខែកក្កដា នាពេលខាងមុខនេះហើយ។
បើតាមការបញ្ជាក់ពីក្រុមហ៊ុន TOYOTA Cambodia កាលពីពេលកន្លងទៅ នៅពេលរោងចក្រនេះបើកដំណើរ ក្រុមហ៊ុននឹងធ្វើការ ដំឡើងរថយន្តប្រភេទ Pick-up និង SUV មុនគេ រួមមាន TOYOTA HILUX និង TOYOTA FORTUNER ដើម្បីផ្គត់ផ្គង់ចែកចាយទីផ្សារកម្ពុជា និងជំហានខាងមុខអាចនឹងនាំចេញទៅបណ្តាប្រទេសជិតខាងផងដែរ។ គួររំលឹកផងដែរ រោងចក្រ Toyota នេះត្រូវបានបោះទុនវិនិយោគគិតជាទឹកប្រាក់ចំនួន ៣៦.៨០០.០០០ដុល្លារសហរដ្ឋអាមេរិក៕
អត្ថបទ៖ ព្រឹម ភក្តី
