បញ្ហាដ៏ធំមួយទៀតនៃការទិញលក់អនឡាញនៅកម្ពុជាគឺការបោកប្រាស់ដោយទិញហើយមិនឃើញផ្ញើទំនិញមក ដែល TipTop បានដោះស្រាយតាមរយៈការបង្កើតប្រព័ន្ធគ្រប់គ្រងហានិភ័យដោយមានធនាគារនៅកណ្តាល។ នៅពេលអតិថិជនបញ្ជាទិញ ធនាគារនឹងបង្កកទឹកប្រាក់នោះសិន ហើយលុយនឹងត្រូវបានកាត់ចេញពីគណនីអ្នកទិញបែងចែកទៅអ្នកលក់ដោយស្វ័យប្រវត្តិ លុះត្រាតែភ្នាក់ងារដឹកជញ្ជូនបានយកទំនិញចេញរួចរាល់។ ចំពោះសុវត្ថិភាពទិន្នន័យ TipTop មិនបានរក្សាទុកព័ត៌មានគណនីធនាគាររបស់អ្នកប្រើប្រាស់ឡើយ ដោយគ្រាន់តែហៅព័ត៌មានពី API របស់ធនាគារ ABA ប៉ុណ្ណោះ ហើយរាល់ប្រតិបត្តិការទាមទារការបញ្ជាក់តាមរយៈលេខកូដយ៉ាងតឹងរ៉ឹង ដែលជួយការពារការលួចចូលគណនី។

កម្មវិធីនេះក៏បានដើរតួនាទីយ៉ាងសំខាន់ក្នុងការកែប្រែទម្លាប់លក់ដូរប្រពៃណីរបស់អាជីវករខ្មែរ ឱ្យមកប្រើប្រាស់បច្ចេកវិទ្យាឌីជីថលវិញ តាមរយៈមុខងារ TipTop Supplier App។ មុខងារនេះអនុញ្ញាតឱ្យម្ចាស់រោងចក្រ សិប្បកម្ម និងអាជីវកម្មក្នុងស្រុក អាចបង្ហោះលក់ផលិតផល និងគ្រប់គ្រងស្តុកដោយឯករាជ្យ ដើម្បីចាប់យកចំណែកទីផ្សារពីអតិថិជនជំនាន់ថ្មី ពិសេស GenY និង GenZ ដែលនិយមការទិញទំនិញអនឡាញជាចម្បង។ 

ចំពោះមហិច្ឆតាអន្តរជាតិ TipTop មានគោលដៅច្បាស់លាស់ក្នុងការក្លាយខ្លួនជា "Amazon នៅស្រុកខ្មែរ" និងមានក្តីស្រមៃក្លាយជាកម្មវិធីលំដាប់លេខ៥ នៅអាស៊ីអាគ្នេយ៍ និងលេខ១០ ក្នុងពិភពលោក។ កម្មវិធីនេះកំពុងនាំផលិតផលខ្មែរទៅកាន់ទីផ្សារពិភពលោក ដែលបច្ចុប្បន្នអាចឱ្យអតិថិជនបញ្ជាទិញពី ១៩៦ប្រទេស ហើយមុខងារស្វែងរកដោយរូបភាពតែងតែបង្ហាញទំនិញខ្មែរជាអាទិភាពមុនគេជានិច្ច។ នៅថ្ងៃអនាគត TipTop គ្រោងនឹងបន្ថែមមុខងារលក់បោះដុំ B2B និងចាប់ដៃគូជាមួយក្រុមហ៊ុនដឹកជញ្ជូនអន្តរជាតិ ដើម្បីពង្រីកទីផ្សារបន្ថែមទៀតទៅកាន់អាជីវកម្មក្រៅប្រទេស។

ជាចុងក្រោយ ស្ថាបនិកកម្មវិធីបានអំពាវនាវយ៉ាងទទូចឱ្យប្រជាជនខ្មែរគ្រប់រូបងាកមកគាំទ្រផលិតផលក្នុងស្រុក ដើម្បីជាប្រយោជន៍ដល់កូនចៅជំនាន់ក្រោយ។ លោកស្រីបានបញ្ជាក់ថា ផលិតផលប្រទេសជិតខាងមួយចំនួនមានតម្លៃថោក និងរសជាតិឆ្ងាញ់ដោយសារការប្រើប្រាស់សារធាតុគីមី ខណៈដែលទំនិញខ្មែរភាគច្រើនប្រើវត្ថុធាតុដើមសុទ្ធសាធ។ ការរួមគ្នាគាំទ្រសិប្បកម្មខ្មែរ មិនត្រឹមតែជួយសង្គ្រោះអាជីវកម្មក្នុងស្រុកកុំឱ្យបិទទ្វារប៉ុណ្ណោះទេ តែថែមទាំងជួយការពារសុខភាពកូនចៅជំនាន់ក្រោយពីជំងឺកាចសាហាវនានា ដែលបណ្តាលមកពីការប្រើប្រាស់ផលិតផលពោរពេញដោយគីមីផងដែរ។