ចាបខៀវ នឹងនាំទាំងអស់គ្នាទៅស្គាល់នូវវេបសាយ AI ដ៏អស្ចារ្យមួយ ដែលមានសមត្ថភាពលើសពីការបង្កើតរូបភាពសន្លឹកធម្មតា។ នោះគឺ Blockade Labs ដែលជាឧបករណ៍វៃឆ្លាត អាចជួយបំប្លែងការស្រមើស្រមៃរបស់អ្នកឱ្យក្លាយជាពិភពនិម្មិត ជាមួយនឹងទិដ្ឋភាពជុំវិញខ្លួន ៣៦០ ដឺក្រេយ៉ាងរស់រវើកបំផុត។ នេះគឺជាបច្ចេកវិទ្យាថ្មីដែលនឹងជួយឱ្យការបង្កើតមាតិកា ឬការរចនាបទពិសោធន៍បែបឌីជីថលរបស់អ្នក កាន់តែមានភាពច្នៃប្រឌិត និងស៊ីជម្រៅជាងពេលណាៗទាំងអស់។

ចំណុចពិសេសដែលធ្វើឱ្យវេបសាយមួយនេះមានភាពលេចធ្លោ គឺភាពងាយស្រួលក្នុងការប្រើប្រាស់ ដោយវាមិនតម្រូវឱ្យអ្នកប្រើប្រាស់ធ្វើការចុះឈ្មោះបង្កើតគណនី (Sign up) ឱ្យស្មុគស្មាញនោះទេ។ អ្នកគ្រាន់តែបញ្ចូលពាក្យបញ្ជា (Prompt) តាមអ្វីដែលអ្នកចង់បាន វានឹងបង្កើតរូបភាពចេញមកភ្លាមៗ។

លើសពីនេះ វាក៏មានជម្រើស Style ច្រើនប្រភេទ ដែលអនុញ្ញាតឱ្យអ្នកកំណត់ 'រសជាតិ' ឬសោភ័ណភាពនៃរូបភាពបានតាមចិត្តចង់ មិនថាជាបែបគំនូរ បែបពិតៗ ឬបែបតុក្កតាឡើយ។ បន្ទាប់ពីបង្កើតរួច អ្នកក៏អាចទាញយក (Download) រូបភាពទាំងនោះមកទុកប្រើប្រាស់បានក្នុងទម្រង់ជា JPEG ដែលផ្ដល់ភាពងាយស្រួលបំផុតសម្រាប់យកទៅប្រើប្រាស់បន្ត។