ជាទូទៅការរៀន ឬចាប់យកជំនាញណាមួយដែលអ្នកស្រលាញ់ ហើយប្រឹងដុះខាត់គឺជារឿងមួយដែលល្អបំផុត។ តែក្នុងករណីយុវជនសម័យថ្មីដែលមានគោលបំណងចង់ប្រឡូកក្នុងវិស័យបច្ចេកវិទ្យា ចាបខៀវសូមណែនាំជំនាញ ៤ ដែលកម្ពុជាកំពុងត្រូវការ ដើម្បីជួយដល់ខ្លួនឯង គ្រួសារ សេដ្ឋកិច្ចជាតិ និងប្រទេសជាតិរីកចម្រើនផងដែរ។
១./ ជំនាញទីផ្សារឌីជីថល (Digital Marketing)
ទីផ្សារឌីជីថល គឺជាការប្រើប្រាស់បច្ចេកវិទ្យាឌីជីថលទាំងអស់ រួមទាំងអនឡាញ (Online) និងក្រៅអនឡាញ (Offline) ដើម្បីផ្សព្វផ្សាយផលិតផល សេវាកម្ម ឬម៉ាកយីហោ (Brand) ទៅកាន់អតិថិជនគោលដៅ។ គោលដៅចុងក្រោយគឺ ជំរុញការលក់ និងកសាងទំនាក់ទំនងជាមួយអតិថិជន។ ជំនាញនេះមានលក្ខណៈទូលំទូលាយ និងផ្លាស់ប្តូរលឿនណាស់ ព្រោះវាត្រូវពឹងផ្អែកលើវេទិកា ដូចជា Facebook, Instagram, TikTok, LinkedIn ដើម្បីផ្សព្វផ្សាយ មាតិកា និងទំនាក់ទំនងជាមួយសហគមន៍ និងឧបករណ៍បច្ចេកវិទ្យាថ្មីៗ។
២./ ជំនាញសន្តិសុខបច្ចេកវិទ្យា (Cybersecurity)
សន្តិសុខបច្ចេកវិទ្យា គឺជាការអនុវត្តបច្ចេកវិទ្យាដំណើរការ និងការគ្រប់គ្រងដើម្បីការពារប្រព័ន្ធ បណ្តាញ Networks កម្មវិធី Applications ឧបករណ៍ និងទិន្នន័យពីការវាយប្រហារឌីជីថល ការខូចខាត ឬការចូលប្រើប្រាស់ដោយគ្មានការអនុញ្ញាត។ ជំនាញមួយនេះតម្រូបវឲ្យអ្នកត្រូវយល់ដឹងអំពី៖
- ចំណេះដឹងផ្នែក Network និង Operating Systems (OS): យល់ដឹងពី TCP/IP, Linux, និង Windows System Administration។
- ការសរសេរ Scripting: ចេះប្រើភាសាដូចជា Python ឬ PowerShell សម្រាប់ការវិភាគទិន្នន័យ និងការធ្វើស្វ័យប្រវត្តិកម្ម Automation។
- ការប្រើប្រាស់ Tools: ចេះប្រើប្រាស់ឧបករណ៍ដូចជា SIEM (Security Information and Event Management), IDS/IPS (Intrusion Detection/Prevention Systems), និង Vulnerability Scanners។
៣./ ជំនាញអភិវឌ្ឍន៍គេហទំព័រ (Web Development)
Web Development សំដៅលើដំណើរការនៃការកសាង និងថែទាំគេហទំព័រ។ នេះរាប់បញ្ចូលទាំងការរចនាគេហទំព័រ Web Design ការបង្កើតកូដ Coding និងការធ្វើឲ្យគេហទំព័រដំណើរការលើអ៊ីនធឺណិត។ Web Developer ត្រូវបានបែងចែកជាបីផ្នែកធំៗ៖
- Front-End Developer៖ ផ្តោតលើអ្វីដែលអ្នកប្រើប្រាស់មើលឃើញ និងអន្តរកម្មជាមួយ (ផ្នែកខាងមុខនៃគេហទំព័រ)។ ធានាថាគេហទំព័រមានភាពទាក់ទាញ និងងាយស្រួលប្រើ។
- Back-End Developer៖ ផ្តោតលើអ្វីដែលកើតឡើងនៅពីក្រោយឆាក Server-side។ គ្រប់គ្រង Database, Logic របស់ Server និង API សម្រាប់ទំនាក់ទំនងជាមួយ Front-End។
- Full-Stack Developer៖ មានជំនាញទាំង Front-End និង Back-End ហើយអាចគ្រប់គ្រងគម្រោងទាំងមូលពីដើមដល់ចប់។
៤./ ជំនាញសរសេរកូដ (Coding/Programming)
ការសរសេរកូដ Coding គឺជាសិល្បៈនៃការផ្តល់នូវ សំណុំនៃសេចក្តីណែនាំ Instructions ជាលាយលក្ខណ៍អក្សរដល់កុំព្យូទ័រ ដោយប្រើភាសាណាមួយដែលកុំព្យូទ័រអាចយល់បាន Programming Languages។ គោលបំណងគឺដើម្បីឲ្យកុំព្យូទ័រអនុវត្តកិច្ចការជាក់លាក់មួយ ឬដោះស្រាយបញ្ហាណាមួយ។ ការសរសេរកូដ Coding មិនមែនគ្រាន់តែបង្កើតកម្មវិធីអនឡាញប៉ុណ្ណោះទេ តែវាជាខួរក្បាលរបស់ Robot ឬឧបករណ៍ដែលផលិតបានជាច្រើនប្រភេទដោយប្រើប្រាស់កូដផងដែរ។
គូសបញ្ជាក់ផងដែរថា ជំនាញខាងលើ គឺតម្រូវការបច្ចេកទេសមិនអាចខ្វះបានឡើយ ដូចជា កុំព្យូទ័រដែលមានសមត្ថភាពសមរម្យ សម្រាប់ការដំឡើងកម្មវិធីអភិវឌ្ឍន៍ (IDE) ឬកម្មវិធីវិភាគទិន្នន័យនានា ព្រមទាំងការតភ្ជាប់អ៊ីនធឺណិតដែលមានស្ថិរភាព ដើម្បីអាចចូលទៅដល់ធនធានសិក្សាអនឡាញ និងធ្វើការងារបានរលូន។ ទន្ទឹមនឹងនេះដែរ ចំណេះដឹងភាសាអង់គ្លេស គឺជាតម្រូវការមូលដ្ឋានដ៏សំខាន់ ដោយសារឯកសារបច្ចេកទេស វគ្គសិក្សាដែលមានគុណភាព និងវេទិកាជំនួយបច្ចេកទេសស្ទើរតែទាំងអស់សុទ្ធតែត្រូវបានសរសេរជាភាសាអង់គ្លេស។
