ស្ថាបនិក Telegram លោក Pavel Durov ដែលកំពុងស្ថិតក្រោមការស៊ើបអង្កេតនៅប្រទេសបារាំង បានឆ្លើយតបជាសាធារណៈជាលើកដំបូងកាលពីថ្ងៃសុក្រ ដោយលើកឡើងថា អាជ្ញាធរបារាំងគួរតែទាក់ទងក្រុមហ៊ុនរបស់លោកដោយផ្ទាល់ ជំនួសឱ្យការឃាត់ខ្លួនលោក។ នៅក្នុងការប្រកាសនៅលើឆានែល Telegram របស់លោក Durov បានបដិសេធការចោទប្រកាន់ដែលថាកម្មវិធីផ្ញើសារនេះគឺជា "ស្ថានសួគ៌គ្មានច្បាប់"។
លោក Durov បានសម្តែងការភ្ញាក់ផ្អើលចំពោះការស៊ើបអង្កេតនេះ ដោយសង្កត់ធ្ងន់ថា អាជ្ញាធរបារាំងមានលេខទូរស័ព្ទ "ហតឡាញ" ដែលលោកបានជួយបង្កើត ហើយអាចទាក់ទងទៅតំណាង Telegram ប្រចាំសហភាពអឺរ៉ុបបានគ្រប់ពេល។
លោកបានសរសេរថា "ប្រសិនបើប្រទេសមួយមានបញ្ហាជាមួយសេវាកម្មអ៊ីនធឺណិត ជាទូទៅគេត្រូវចាត់វិធានការផ្លូវច្បាប់ប្រឆាំងនឹងសេវាកម្មនោះដោយផ្ទាល់"។ "ការប្រើប្រាស់ច្បាប់ហួសសម័យដើម្បីដាក់ទោសអគ្គនាយកប្រតិបត្តិសម្រាប់បទល្មើសដែលប្រព្រឹត្តដោយភាគីទីបីនៅលើវេទិកា គឺជាវិធីសាស្ត្រមិនត្រឹមត្រូវ"។
ខណៈដែលទទួលស្គាល់ថា Telegram មិនមែនល្អឥតខ្ចោះនោះទេ លោក Durov បានបដិសេធយ៉ាងម៉ឺងម៉ាត់នូវការអះអាងអំពីការរំលោភបំពានទាក់ទងនឹងកម្មវិធីនេះ។ លោកបានថ្លែងថា "គំនិតដែលថា Telegram គឺជាស្ថានសួគ៌គ្មានច្បាប់ គឺជាការមិនពិតទាំងស្រុង"។ "យើងលុបចោលរាប់លានការប្រកាស និងឆានែលដែលបង្កគ្រោះថ្នាក់ជារៀងរាល់ថ្ងៃ"។
លោក Durov ដែលដើមកំណើតជាជនជាតិរុស្ស៊ី និងបច្ចុប្បន្នជាពលរដ្ឋបារាំង ត្រូវបានឃាត់ខ្លួនកាលពីខែមុននៅប្រទេសបារាំង ក្នុងក្របខណ្ឌនៃការស៊ើបអង្កេតលើបទល្មើសពាក់ព័ន្ធនឹងរូបអាសអាភាសកុមារ ការជួញដូរគ្រឿងញៀន និងប្រតិបត្តិការឆបោកដែលទាក់ទងនឹងកម្មវិធីនេះ។
