មិនឲ្យគេហៅចាស់កំរិលទៀតហើយ ក្រុមហ៊ុនមេធំ Honda បានសម្រេចចិត្តជះឥទ្ធិពលនៃបច្ចេកវិទ្យារបស់ខ្លួនទៅកាន់ អាគុប C100 មកជា 125 វិញម្តង និងបានផ្លាស់ប្តូររូបរាងថ្មីទាំងស្រុង និងបំពាក់នូវម៉ាស៊ីនស៊េរីថ្មីខ្លាំង ព្រមទាំងស៊ីសាំងតិចជាងមុនទៅទៀត ។
តើអ្នកដឹងទេ Super Cub ដែលអ្នកទាំងអស់គ្នាតែងហៅថា អាគុប នោះគឺមានអាយុកាល ៧០ឆ្នាំ ចាប់តាំងពី Super Cub C100 ត្រូវបានផលិតនៅឆ្នាំ១៩៥៨ ហើយរាប់មកទល់បច្ចុប្បន្ននេះ ។ ប៉ុន្តែទើបតែកន្លងទៅប៉ុន្មានឆ្នាំមកនេះ ក្រុមហ៊ុន Honda ក៏បាននឹកគិតស្រមៃឃើញចង់កែប្រែរូបរាងសម័យបុរាណ និងពោរពេញទៅដោយរឿងរ៉ាវដ៏យូរអង្វែងដែលបានដិតដាមជាប់ក្នុងក្រអៅបេះដូងរបស់អតិថិជនជាម្ចាស់នៃម៉ូតូអាគុបមួយនេះ ។
ខណ:ពេលបច្ចុប្បន្ននេះផងដែរ Honda ទើបតែបង្ហាញរូបសម្រស់នៃ Super Cub 125 ស៊េរីឆ្នាំ ២០២២ កាលពីថ្មីៗនេះទេ ដោយផ្លាស់ប្តូរនូវភាពចាស់បុរាណរបស់អាគុប ក្លាយជារូបរាងមួយដែលសង្ហារមានភាពលេចធ្លូជាងម៉ូតូដែលទើបតែចេញមកដំណាលៗ គ្នានេះ ។
តួយ៉ាង បើយើងក្រឡេកមកនិយាយអំពីចំណុចផ្លាស់ប្តូរទាំងអស់នោះរួមមាន ចង្កៀងខាងមុខ ដែលពីមុនប្រៀបដូចចង្ការនេអុងអីចឹង តែឥឡូវគេប្តូរមកជាអំពូល LED យ៉ាងស្រស់ស្អាតនិងបំភ្លឺផ្លូវបានឆ្ងាយច្បាស់មិនចាញ់អំពូលគជ់ឡានប៉ុន្មានទេ។ មួយវិញទៀតចំពោះ អាវក្រៅរបស់ Super Cub 125 នេះ សឹងតែផ្លាស់ប្តូរទាំងស្រុង ជាពិសេសក្បាលម៉ូតូ ត្រូវបានគេទម្លាក់ចុះបន្តិច ប៉ុន្តែ Honda នៅតែរក្សានូវរសជាតិនៃអាគុប នៅដដែល គ្រាន់តែវាមានភាពប្លែកភ្នែកខ្លាំង ប្រសិនជាយើងមើលពីចម្ងាយ យើងគិតថា វាមិនមែនអាគុប ។
យ៉ាងណាមិញ ចំពោះគ្រឿងផ្សំរបស់ Super Cub 125 នេះវិញ ត្រូវបានគេបំពាក់មកជាមួយនឹងកម្លាំងម៉ាស៊ីន ១២៤សេសេ ស្មើរនឹង ៧.២គីឡូវ៉ាត់ និងកម្លាំងបង្វិលជុំ ១០.៤ ញ៉ូតុនម៉ែត្រ ព្រមទាំងបន្ថែមនូវបច្ចេកវិទ្យា Air-Cooled SOHC 4-stroke 2-vale ដែលជួយកាត់បន្ថយការឡើងកម្តៅខ្លាំងរបស់ម៉ាស៊ីន និងជួយសន្សំសំចៃនូវកម្រិតស៊ីសាំងបានច្រើនថែមទៀតផង ក្នុង ១០០ គីឡូម៉ែត្រស៊ីសាំងតែ ១.៥ លីត្រតែប៉ុណ្ណោះ ។
លើសពីនេះ សូម្បីទម្ងន់រវាង Super Cub C100 និង Super Cub 125 ខុសគ្នាឆ្ងាយណាស់ ចំពោះ C100 មានទម្ងង់ ៦៥ គីឡូក្រាម រីឯ 125 មានទម្ងន់ដល់ ១១០ គីឡូក្រាមឯណោះ បើប្រៀបជាមួយ Honda Click 125cc វិញអាគុបនេះចាញ់តែមួយលេខកន្ទុយតែប៉ុណ្ណោះ ។
ម្យ៉ាងវិញចំពោះ សុវត្ថិភាព ខាងក្រុមហ៊ុន Honda បានច្បិចយកនូវប្រព័ន្ធកាច់សោរជា Smart-Key ព្រមទាំងបានហាយឡាយនូវភ្លើងពណ៌ជុំវិញទៀតផង ។ មិនតែប៉ុណ្ណោះ ចំពោះហ្វ្រាំងខាងមុខបានប្តូរមកជា ហ្វ្រាំង ABS ឬក៏ហៅថាហ្វ្រាំងដីស ប៉ុន្តែចំណែកឯហ្វ្រាំងខាងក្រោយវិញ Honda នៅតែរក្សាហ្វ្រាំងស្បែក ឬហ្វ្រាំងជាន់ (Drum Brake ) ។
គូសបញ្ជាក់ផងដែរថា សម្រាប់ការដែល Honda បានផ្លាស់ប្តូរនូវរូបរាងថ្មីនេះ តាំងពីឆ្នាំ ២០១៧ មកម្ល៉េះ ហើយរូបរាងបែបនេះក៏បន្តចេញលក់ទៅតាមស៊េរីឆ្នាំនីមួយៗ ផងដែរ មកដល់បច្ចុប្បន្ននេះ ចំពោះតម្លៃដែលបានដាក់លក់នៅក្នុងទីផ្សារស្រុកខ្មែរវិញនោះប្រហែលជាខ្ទង់ ៣,៥០០ ដុល្លារឡើងទៅ តែវាអាចខុសគ្នាបន្តិច ៕
អត្ថបទដោយ៖ ព្រឹម ភក្តី
