ការផ្លាស់ប្តូរទៅកាន់ប្រព័ន្ធឌីជីថលនេះ គឺក្នុងគោលបំណងចម្បងដើម្បីសម្រួលដល់ប្រជាពលរដ្ឋ និងធុរជនដែលកំពុងប្រកបអាជីវកម្មក្នុងវិស័យកសិកម្ម ឱ្យទទួលបានសេវាកាន់តែលឿនរហ័ស មានតម្លាភាព និងកាត់បន្ថយការចំណាយពេលវេលាផ្សេងៗ។ យោងតាមសេចក្តីប្រកាសព័ត៌មានរួមនេះ សាធារណជន និងធុរជន អាចធ្វើការស្នើសុំសេវាសំខាន់ៗចំនួន ៨ ប្រភេទតាមរយៈប្រព័ន្ធអនឡាញថ្មីនេះ ដែលរួមមាន៖

• ១. វិញ្ញាបនបត្របញ្ជាក់ការបញ្ចេញភូតគាមអនាម័យ
• ២. វិញ្ញាបនបត្របញ្ជាក់ការចុះបញ្ជីសម្ភារៈកសិកម្ម
• ៣. លិខិតអនុញ្ញាតផ្គត់ផ្គង់ចែកចាយសម្ភារៈកសិកម្ម
• ៤. លិខិតអនុញ្ញាតប្រតិបត្តិការលក់ដុំ ឬលក់រាយសម្ភារៈកសិកម្ម
• ៥. វិញ្ញាបនបត្របញ្ជាក់ការចុះបញ្ជីជីកសិកម្ម
• ៦. វិញ្ញាបនបត្របញ្ជាក់ការចុះបញ្ជីថ្នាំកសិកម្ម
• ៧. លិខិតអនុញ្ញាតផ្គត់ផ្គង់ចែកចាយជីកសិកម្ម
• ៨. លិខិតអនុញ្ញាតប្រតិបត្តិការលក់ដុំ ឬលក់រាយជីកសិកម្ម

ក្រៅពីសេវាទាំង ៨ ខាងលើ ក្រសួងកសិកម្ម រុក្ខាប្រមាញ់ និងនេសាទ បាននឹងកំពុងដាក់ឱ្យប្រើប្រាស់សេវាស្នើសុំវិញ្ញាបនបត្រ ឬអាជ្ញាបណ្ណសរុបចំនួន ៥៣ សេវា និងកំពុងដំណើរការសេវាចំនួន ២៦ ផ្សេងទៀតនៅលើប្រព័ន្ធបញ្ជរតែមួយជាតិ (National Single Window - www.nsw.gov.kh) ផងដែរ។

សមិទ្ធផលនៃការធ្វើឌីជីថលភាវូបនីយកម្មសេវាសាធារណៈនេះ គឺជាការឆ្លើយតបយ៉ាងសកម្មទៅនឹង «យុទ្ធសាស្ត្របញ្ចកោណដំណាក់កាលទី១» របស់រាជរដ្ឋាភិបាលកម្ពុជា ក្នុងការកសាងរដ្ឋាភិបាលឌីជីថល និងការលើកកម្ពស់បរិយាកាសធុរកិច្ចនៅក្នុងប្រទេស តាមរយៈការកាត់បន្ថយនីតិវិធីស្មុគស្មាញ និងពង្រីកលទ្ធភាពទទួលបានសេវារបស់ប្រជាពលរដ្ឋ។

សម្រាប់ធុរជន និងសាធារណជនដែលមានបំណងស្វែងយល់បន្ថែម ឬត្រូវការសេវាគាំទ្របច្ចេកទេស អាចចូលទៅកាន់គេហទំព័រផ្លូវការរបស់ក្រសួងកសិកម្ម (www.maff.gov.kh, https://services.maff.gov.kh) ឬគេហទំព័ររបស់ក្រុមការងារគាំទ្រកណ្តាល (https://registrationservices.gov.kh)។ ទន្ទឹមនឹងនេះ ប្រជាពលរដ្ឋក៏អាចទាក់ទងដោយផ្ទាល់មកកាន់សេវាបម្រើអតិថិជន (Call Center) តាមរយៈលេខទូរស័ព្ទ ១៨៨១ ឬ ០៨១ ៨៨៨ ២៩៦ និងតាមរយៈអ៊ីមែល registrationservices@mef.gov.kh ៕