យោងតាមសារព័ត៌មានរយទ័រនៅថ្ងៃទី ០៣ ខែកុម្ភៈ ឆ្នាំ ២០២៦ បានប្រាប់ឲ្យដឹងថា ប៉ូលីសបារាំងបានឆ្មក់ចូលឆែកឆេរការិយាល័យបណ្តាញសង្គម X របស់លោក Elon Musk ហើយក្រុមព្រះរាជអាជ្ញាក៏បានបញ្ជាឱ្យមហាសេដ្ឋីបច្ចេកវិទ្យារូបនេះ ចូលខ្លួនមកឆ្លើយបំភ្លឺចំពោះសំណួរនានានៅក្នុងដំណើរការស៊ើបអង្កេតដែលកំពុងរីករាលដាលកាន់តែធំ ស្របពេលដែលមានការត្រួតពិនិត្យកាន់តែតឹងរ៉ឹងលើវេទិកាមួយនេះពីសំណាក់អាជ្ញាធរនៅទូទាំងអឺរ៉ុប។
មូលហេតុចម្បងដែលនាំឱ្យមានការចុះឆែកឆេរនេះរួមមាន៖
- ការរកឃើញការផ្សព្វផ្សាយមាតិកាខុសច្បាប់៖ អាជ្ញាធររកឃើញថា បណ្តាញសង្គម X ខកខានក្នុងការលុបចោល ឬទប់ស្កាត់ការរីករាលដាលនៃរូបភាពអាសអាភាសកុមារ និងការញុះញង់ឱ្យមានអំពើហឹង្សា។
- ការមិនសហការជាមួយច្បាប់ស្រុក៖ ក្រុមហ៊ុនត្រូវបានចោទប្រកាន់ថា មិនបានផ្តល់ទិន្នន័យចាំបាច់ដល់ប៉ូលីស ក្នុងការតាមដានមុខសញ្ញាឧក្រិដ្ឋជនបច្ចេកវិទ្យាដែលប្រើប្រាស់ Platform របស់ខ្លួន។
- ព័ត៌មានក្លែងក្លាយ (Fake News)៖ ការបណ្តោយឱ្យមានការបង្ហោះព័ត៌មានដែលបង្កចលាចលក្នុងសង្គម ដោយគ្មានការត្រួតពិនិត្យឱ្យបានដិតដល់ ស្របតាមច្បាប់សេវាកម្មឌីជីថល (DSA) របស់សហភាពអឺរ៉ុប។
នេះបើយោងតាមទីភ្នាក់ងារសារព័ត៌មានបារាំង (AFP) និង សេចក្តីប្រកាសរបស់ព្រះរាជអាជ្ញាទីក្រុងប៉ារីសបានប្រាប់ឲ្យដឹងបន្ថែមថា ប្រសិនបើរកឃើញថាមានកំហុសពិតមែន លោក Elon Musk ក្នុងនាមជាម្ចាស់ក្រុមហ៊ុន អាចនឹងត្រូវប្រឈមមុខនឹងការផាកពិន័យជាទឹកប្រាក់រាប់លានអឺរ៉ូ ឬអាចឈានដល់ការរឹតត្បិតសេវាកម្ម X នៅក្នុងទឹកដីប្រទេសបារាំងទាំងស្រុង ប្រសិនបើក្រុមហ៊ុននៅតែបន្តមិនសហការតាមផ្លូវច្បាប់។
