ថ្មីៗនេះ ក្រុមហ៊ុន Toyota ទើបតែបានប្រគល់រថយន្ត Toyota Highlander SUV ស៊េរីឆ្នាំ 2023 ដល់បុរសម្នាក់នៅសហរដ្ឋអាមេរិក បន្ទាប់ពីដឹងថាបុរសនោះបានបាត់បង់រថយន្ត Highlander ស៊េរីឆ្នាំ២០០៦ ដែលបានជិះអស់ ១លានម៉ាយឬជាង ១,៦លានគីឡូម៉ែត្រ ក្រោយពីព្យុះដ៏កំណាចមួយបានបក់បោកឆក់យករថយន្តសំណព្វចិត្តរបស់បុរសម្នាក់នោះ។
យោងតាមប្រភពពី Carpart បានឲ្យដឹងថា ក្រុមហ៊ុន Toyota USA បានឲ្យរថយន្ត Toyota Highlander Hybrid Bronze Edition ស៊េរីឆ្នាំ 2023 ចំនួន១គ្រឿង ដោយឥតគិតថ្លៃទៅកាន់បុរសម្នាក់ឈ្មោះថា Mark Miller ដែលរស់នៅសហរដ្ឋអាមេរិក ព្រោះតែរថយន្តដែលគាត់បានបាត់នោះដោយសារព្យុះ Hurricane Ian បានឆក់យកទៅនោះ គឺជារថយន្ត Highlander ស៊េរីឆ្នាំ២០០៦ ដែលបុរសនោះបានជិះជាច្រើនឆ្នាំ មានចម្ងាយ ១,៦លានគីឡូម៉ែត្រ ។
លោក Mark បាននិយាយថា "រថយន្ត Highlander ស៊េរីឆ្នាំ២០០៦ គឺគាត់ជិះសឹងតែរាល់ថ្ងៃ ហើយគាត់ពេញចិត្តស្រឡាញ់រថយន្ត SUV របស់ Toyota មួយនេះណាស់”។ Mark បានបន្តនិយាយទៀតថា “ក្រៅពី Highlander គឺគាត់មិនព្រមប្រើរថយន្តផ្សេងឡើយ”។
មូលដែលធ្វើឲ្យឡានសំណព្វចិត្តរបស់គាត់បានបាត់នោះគឺបណ្តាលមកពី មានព្យុះ Hurricane Ian បានវាយលុករដ្ឋ Florida ក្នុងឆ្នាំ 2020 និងបានបង្កើតការខូចខាតដែលមានតម្លៃ 113 ពាន់លានដុល្លារ។ បន្ទាប់មកកាលពីថ្មីៗនេះ ក្រុមហ៊ុន Toyota USA ទទួលដំណឹងមកថា ឡានដែលបានបាត់របស់ Mark គឺជិះបាន ១លាយម៉ាយភ្លាម ក្រុមហ៊ុនក៏បានហៅលោក Mark មកឲ្យឡានថ្មី ១គ្រឿងដោយឥតគិតថ្លៃ ដែលរថយន្តនោះគឺជាស៊េរីថ្មី កូនកាត់ Highlander Hybrid Bronze Edition ឆ្នាំ 2023។
គួរជំរាបផងដែរថា រថយន្ត Highlander Hybrid Bronze Edition ឆ្នាំ 2023 ដែល Mark ទទួលបានជាកាដូ គឺជាការផ្តល់ចុងក្រោយបំផុតមួយពីក្រុមហ៊ុន Toyota ។ រថយន្តប្រភេទ SUV កូនកាត់នេះ មានការរចនារូបរាងស្អាត និងទាន់សម័យ រួមផ្សំជាមួយនឹងដំណើរការដ៏មានថាមពល និងលក្ខណៈពិសេសទំនើបៗ។ Bronze Edition គឺជាកម្រិត Trim ថ្មី ដែលភ្ជាប់មកជាមួយបច្ចេកវិទ្យាផ្តាច់មុខរបស់ Toyota និងការធ្វើឱ្យប្រសើរឡើង ដើម្បីបង្កើនបទពិសោធន៍នៃការបើកបរ។
រថយន្តប្រភេទ SUV នេះត្រូវបានបំពាក់ដោយម៉ាស៊ីន 4 ស៊ីឡាំង 2.5 លីត្រ រួមផ្សំជាមួយនឹងម៉ូទ័រអេឡិចត្រិចចំនួន 2 ដែលផ្តល់កម្លាំងសរុប 243 សេះ។ វាក៏បានភ្ជាប់មកជាមួយការបញ្ជូនបន្តអថេរអគ្គិសនី (eCVT) និងដ្រាយកង់ទាំងអស់ ដែលផ្តល់នូវប្រសិទ្ធភាពប្រេងពិសេស ខណៈពេលដែលផ្តល់នូវថាមពល និងការបង្កើនល្បឿនពី០ដល់១០០គ.ម/ម៉ ចាយពេលតែ 7.3វិនាទី៕
អត្ថបទដោយ៖ ព្រឹម ភក្តី
