តាមការប្រកាសរបស់ OpenAI នៅថ្ងៃទី១០ ខែវិច្ឆិកា ឆ្នាំ២០២៦ មុខងារ Business Hub នេះ កំពុងដាក់ឱ្យប្រើប្រាស់ក្នុងដំណាក់កាល Beta ដោយផ្តល់លទ្ធភាពឱ្យក្រុមហ៊ុនអាចចុះឈ្មោះ និងផ្ទៀងផ្ទាត់អាជីវកម្មរបស់ខ្លួននៅលើ ChatGPT។ បន្ទាប់ពីផ្ទៀងផ្ទាត់រួច ក្រុមហ៊ុនអាចកែប្រែព័ត៌មានសំខាន់ៗ បន្ថែមព័ត៌មានអំពីផលិតផល រួមទាំងតម្លៃ និងស្ថានភាពមានទំនិញក្នុងស្តុក ដើម្បីផ្តល់ព័ត៌មានដែលត្រឹមត្រូវដល់អ្នកប្រើប្រាស់។

មិនត្រឹមតែអាចគ្រប់គ្រងព័ត៌មានអាជីវកម្មប៉ុណ្ណោះទេ Business Hub ក៏ផ្តល់នូវ Business Insights ដែលជាទិន្នន័យស្ថិតិអំពីការចាប់អារម្មណ៍របស់អ្នកប្រើប្រាស់ចំពោះអាជីវកម្មនីមួយៗផងដែរ។ ទិន្នន័យទាំងនេះ រួមមាន ចំនួនដងដែលអាជីវកម្មត្រូវបានលើកឡើងនៅក្នុង ChatGPT, ចំនួនអ្នកចុចចូលគេហទំព័រ និងប្រធានបទដែលអ្នកប្រើប្រាស់ស្វែងរកពាក់ព័ន្ធនឹងអាជីវកម្ម។ ទិន្នន័យទាំងនេះ នឹងអាចជួយឱ្យក្រុមហ៊ុនដឹងពីរបៀបដែលអ្នកប្រើប្រាស់ស្គាល់ និងស្វែងរកផលិតផលរបស់ខ្លួន។

លើសពីនេះ OpenAI ក៏បានណែនាំមុខងារថ្មីមួយទៀតឈ្មោះថា Business Agents ដែលអនុញ្ញាតឱ្យក្រុមហ៊ុនអាជីវកម្ម បង្កើតភ្នាក់ងារ AI ផ្ទាល់ខ្លួន ដើម្បីឆ្លើយសំណួររបស់អតិថិជនអំពីផលិតផល និងសេវាកម្ម។ គួរបញ្ជាក់ថា មុខងារ Business Agents នេះ គឺមិនទាន់បើកឱ្យក្រុមហ៊ុនទាំងអស់ប្រើប្រាស់នៅឡើយទេ ក្នុងនោះ OpenAI បានដាក់មុខងារនេះដល់ក្រុមហ៊ុន E-commerce និងអាជីវកម្មផ្តល់សេវាកម្មតាមអនឡាញដែលមានសិទ្ធិនៅសហរដ្ឋអាមេរិកប៉ុណ្ណោះ។

ចំណែក ក្រុមហ៊ុន ដែលស្ថិតនៅក្នុងប្រទេសដែលគាំទ្រការប្រើប្រាស់ ChatGPT គឺអាចចូលទៅកាន់ Business Hub ដើម្បីស្នើសុំផ្ទៀងផ្ទាត់ភាពជាម្ចាស់អាជីវកម្ម និងទទួលបានសិទ្ធិកែប្រែព័ត៌មានអាជីវកម្មរបស់ខ្លួននៅលើ ChatGPT ។ ជាមួយគ្នានេះ OpenAI បានបញ្ជាក់ថា ខ្លួនមិនចែករំលែកការសន្ទនាផ្ទាល់ខ្លួនរបស់អ្នកប្រើប្រាស់ ឬការសន្ទនាជាមួយ Business Agents ទៅឱ្យក្រុមហ៊ុនអាជីវកម្មនោះទេ តែទិន្នន័យស្ថិតិ ដែលក្រុមហ៊ុនទទួលបាន ជាទិន្នន័យសរុបអំពីការប្រើប្រាស់របស់អតិថិជន ដោយ OpenAI នឹងបង្ហាញទិន្នន័យទាំងនេះនៅពេលមានអ្នកប្រើប្រាស់គ្រប់ចំនួនតាមលក្ខខណ្ឌកំណត់។

ការដាក់ចេញ Business Hub និង Business Agents គឺជាជំហានថ្មីរបស់ OpenAI ក្នុងការនាំយកអាជីវកម្មមកភ្ជាប់ជាមួយអ្នកប្រើប្រាស់តាមរយៈ ChatGPT។ តាមរយៈមុខងារទាំងនេះ ក្រុមហ៊ុន មិនត្រឹមតែអាចបង្ហាញព័ត៌មានផលិតផល និងសេវាកម្មប៉ុណ្ណោះទេ ប៉ុន្តែថែមទាំងអាចប្រើ AI ដើម្បីឆ្លើយសំណួរ និងជួយអតិថិជនស្វែងយល់អំពីអាជីវកម្មរបស់ខ្លួនបានទៀតផង។