សេចក្តីជូនដំណឹងដល់បងប្អូន ដែលមានបំណងធ្វើដំណើរលើផ្លូវល្បឿនលឿន ក្រសួងសាធារណការ និងដឹកជញ្ជូន បានហាមដាច់ខាតមិនអនុញ្ញាតឲ្យឈប់ ឬសម្រាកលើគន្លងឈប់បន្ទាន់ឡើយ លើកលែងករណីយានយន្តខូច ឬមានបញ្ហាផ្សេងៗប៉ុណ្ណោះ។
គួររំឭកផងដែរ ក្រសួងសាធារណការ និងដឹកជញ្ជូន សូមធ្វើការក្រើនរម្លឹកជាថ្មី ចំពោះបងប្អូនប្រជាពលរដ្ឋឱ្យបានជ្រាបថា ការធ្វើដំណើរលើផ្លូវល្បឿនលឿនក្រៅពីកន្លែងឈប់សម្រាក និងផ្តល់សេវាកម្ម(ចំណតយានយន្ត ស្ថានីយប្រេងឥន្ធនៈ បន្ទប់ទឹក អាហារដ្ឋាន និងកន្លែងផ្តល់សេវាកម្មផ្សេងៗ) គឺមិនអនុញ្ញាតឱ្យឈប់ ឬចតយានយន្តនៅលើផ្លូវល្បឿនលឿនឡើយ លើកលែងករណីយានយន្តខូច ឬមានបញ្ហាផ្សេងៗប៉ុណ្ណោះ ដែលតម្រូវឱ្យឈប់នៅគន្លងឈប់បន្ទាន់។
សូមជម្រាបជូនថា៖ កន្លែងឈប់សម្រាកទី១(កំពង់ស្ពឺ) ទី២(កំពង់ស្ពឺខាងលិច) និងទី៤(ព្រៃនប់ខាងលិច) នៅមិនទាន់បានសាងសង់រួចរាល់ជាស្ថាពរនៅឡើយទេ។ ដោយឡែក កន្លែងឈប់សម្រាកទី៣(កំពង់សិលា) សាងសង់រួចបានមួយផ្នែកធំហើយ ពោលគឺបងប្អូនអាចឆៀងចូលប្រើប្រាស់បង្គន់អនាម័យនៅកន្លែងឈប់សម្រាកទី៣នេះបាន។ប៉ុន្តែចំពោះស្ថានីយប្រេងឥន្ធនៈ អាហារដ្ឋាន និងកន្លែងផ្តល់សេវាកម្មនានា គឺមិនទាន់រួចរាល់អាចបម្រើការបាននៅឡើយទេ។
ក្នុងន័យនេះដែរ ចំពោះបងប្អូនដែលមានបំណងក្នុងការធ្វើដំណើលើផ្លូវល្បឿនលឿន កំឡុងពេលសាកល្បងមួយខែនេះ សូមមេត្តាត្រួតពិនិត្យយានយន្តឱ្យបានសព្វជ្រុងជ្រោយ ជាពិសេសកម្រិតប្រេងឥន្ធនៈ ដើម្បីធានាថាគ្រប់គ្រាន់សម្រាប់ការបើកបរលើចម្ងាយផ្លូវ ១៨៧,០៥គីឡូម៉ែត្រនេះ៕
អត្ថបទដោយ៖ ព្រឹម ភក្តី