ឯកឧត្តមទេសរដ្ឋមន្ត្រី ស៊ុន ចាន់ថុល បាននិយាយថា នៅឆ្នាំ២០៥០ រាជរដ្ឋាភិបាលបានដាក់ចេញនូវ វិធានការណ៍ សម្រេចបាននូវការប្រើប្រាស់រថយន្តអគ្គិសនី ក្នុងអត្រា ៤០% និងម៉ូតូអគ្គិសនី ក្នុងអត្រា៧០% ខណ:ដែលបច្ចុប្បន្ននេះ គិតត្រឹមចុចឆ្នាំ២០២២ កម្ពុជាមានអ្នកប្រើប្រាស់យានយន្តអគ្គិសនី សរុប ៧៣១គ្រឿង។
យោងតាមការចេញផ្សាយពីក្រសួងសាធារណការ និងដឹកជញ្ជូន បានឲ្យដឹងកាលពីថ្ងៃទី០១ មីនា ២០២៣ តាមសម្តីរបស់ឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងក្នុងកម្មវិធីដាក់សម្ពោធឲ្យប្រើប្រាស់ស្ថានីយសាកថ្មឡានអគ្គិសនី “EV STATION PLUZ ទាំង ៣ ទីតាំងរបស់ PTT ថា(១) ស្ថានីយប្រេងឥន្ធនៈ PTT ច្បារអំពៅ ផ្លូវជាតិលេខ១ (២) ស្ថានីយប្រេងឥន្ធនៈ PTT ព្រែកព្នៅ ផ្លូវជាតិលេខ៥ និង (៣) ស្ថានីយប្រេងឥន្ធនៈ PTT ជ្រោយចង្វារ ផ្លូវជាតិលេខ៦ ។
ក្នុងឱកាសនោះដែរ ឯកឧត្តម បានបន្តមានប្រសាសន៍ថា នៅឆ្នាំ២០៥០ រាជរដ្ឋាភិបាលបានដាក់ចេញនូវ វិធានការណ៍ សម្រេចបាននូវការប្រើប្រាស់រថយន្តអគ្គិសនី ក្នុងអត្រា ៤០% និងម៉ូតូអគ្គិសនី ក្នុងអត្រា៧០% ។
មូលហេតុនៃការរៀបចំយុទ្ធសាស្រ្តនេះ គឺដើម្បីចូលរួមជាមួយរាជរដ្ឋាភិបាល ក្នុងការកាត់បន្ថយការបំភាយឧស្ម័នកាបូនឌីអុកស៊ីត ចេញពីយានយន្តដែលជាផ្នែកមួយនៃការកើនឡើងនូវឧស្ម័នផ្ទះកញ្ចក់ ក៏ដូចជាចូលរួមអនុវត្តយុទ្ធសាស្រ្តអភិវឌ្ឍន៍រយៈពេលវែងប្រកបដោយអព្យាក្រឹតកាបូនឆ្នាំ២០៥០ (Long-Term Strategy for Carbon Neutrality 2050) និងនិន្នាការនៃការប្រើប្រាស់យានយន្តអគ្គិសនីរបស់ពិភពលោក និងក្នុងតំបន់ផងដែរ ។
គួរជំរាបផងដែរថា យោងតាមទិន្នន័យយានយន្តអគ្គិសនី ដែលបានចុះបញ្ជីគិតត្រឹមថ្ងៃទី៣១ ខែធ្នូ ឆ្នាំ២០២២ មានចំនួនសរុប ៧៣១គ្រឿង ក្នុងនោះរថយន្តមានចំនួន ៣៦៩គ្រឿង ត្រីចក្រយានយន្ត (ម៉ូតូកង់បី) មានចំនួន ៣៣៩គ្រឿង និងទោចក្រយានយន្តមានចំនួន ២៣គ្រឿង៕
