ដោយសារកំណើនយានយន្តក្នុងប្រទេសកម្ពុជា មានការកើនច្រើន ក្រសួងបានយល់ព្រមសហការជាមួយក្រុមហ៊ុនក្រៅរដ្ឋាភិបាល អនុញ្ញាតឲ្យបង្កើតកន្លែងត្រួតពិនិត្យលក្ខណ:បច្ចេកទេសយានយន្ត ឬឆៀក ថ្មីមួយកន្លែងទៀត។
យោងតាមការចេញផ្សាយពី ក្រសួងសាធារណការ និងដឹកជញ្ចូន នៅថ្ងៃនេះ បានឲ្យដឹងថា មណ្ឌលត្រួតពិនិត្យលក្ខណ:បច្ចេកទេសតយានយន្ត(ឆៀក) ថ្មីមួយកន្លែងទៀត នៅតាមបណ្តោយមហាវិថីហាណូយ បានបើកដំណើរការសាកល្បងចាប់ពីថ្ងៃទី ១៧ ខែមករា ថ្ងៃនេះតទៅ។
តួយ៉ាងសម្រាប់កន្លែងឆៀកឡានថ្មី មួយកន្លែងនេះ ត្រូវបានបើកដំណើរការដោយក្រុមហ៊ុនខេមបូឌា ម៉ូទ័រវីហ៊ីឃល អ៊ិនស្ពេកសិន (Cambodia Motor Vehicle Inspection) សម្រាប់ទីតាំងគឺ នៅជិតច្រកចូលវត្តសំរោងអណ្តែត តាមបណ្តោយមហាវិថីហាណូយ ក្នុងគោលបំណង ដើម្បីឆ្លើយតបទៅនឹងតម្រូវការកំណើនយានយន្តក្នុងប្រទេសកម្ពុជា និងផ្តល់នូវភាពងាយស្រួលសម្រាប់ប្រជាជនដែលនៅក្បែរៗតំបន់នោះផងដែរ។
យ៉ាងណាមិញ សម្រាប់ កន្លែងឆៀកថ្មីរបស់ក្រុមហ៊ុន ខេមបូឌា ម៉ូទ័រវីហ៊ីឃល អ៊ិនស្ពេកសិន (Cambodia Motor Vehicle Inspection) បានទទួលអាជ្ញាបណ្ណអនុញ្ញាតឱ្យធ្វើអាជីវកម្មពី ក្រសួងសាធារណការ និងដឹកជញ្ជូន ដែលធានាបានថាការត្រួតពិនិត្យលក្ខណៈបច្ចេកទេសយានយន្តនៅទីនេះ គឺប្រកបដោយភាពត្រឹមត្រូវគ្រប់លក្ខខណ្ឌ តាមបទដ្ឋានបច្ចេកទេស។
គួរជំរាបផងដែរថា កន្លែងឆៀកថ្មី ហាណូយសំរោងអណ្តែត មានទីតាំងស្ថិតនៅតាមបណ្តោយមហាវិថីហាណូយ ក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ មណ្ឌលបើកដំណើរការរៀងរាល់ថ្ងៃចន្ទ ដល់ថ្ងៃសៅរ៍ ចាប់ពីម៉ោង ៧:០០នាទីព្រឹក រហូតដល់ម៉ោង ១៧:០០នាទីល្ងាច៕
អត្ថបទដោយ៖ ព្រឹម ភក្តី