ពិធីចុះហត្ថលេខានេះ ត្រូវបានរៀបចំឡើងនៅរាជធានីភ្នំពេញ ដោយមានការអញ្ជើញចូលរួមពីសំណាក់ថ្នាក់ដឹកនាំជាន់ខ្ពស់ និងមន្ត្រីជំនាញនៃក្រសួងមហាផ្ទៃ ព្រមទាំងគណៈប្រតិភូតំណាងពីភាគីសាកលវិទ្យាល័យចិន។ កិច្ចព្រមព្រៀងនេះមានគោលដៅចម្បងក្នុងការផ្លាស់ប្តូរបទពិសោធន៍ បណ្តុះបណ្តាល និងពង្រឹងកិច្ចសហប្រតិបត្តិការលើវិស័យ បញ្ញាសិប្បនិម្មិត (Artificial Intelligence - AI) និង យន្តហោះគ្មានមនុស្សបើក (Drones) ដែលជាបច្ចេកវិទ្យាមានសារៈសំខាន់ក្នុងការគាំទ្រដល់ប្រតិបត្តិការ និងការងាររដ្ឋបាលក្នុងយុគសម័យទំនើប។

ជុំវិញព្រឹត្តិការណ៍នេះ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានសម្តែងការអបអរសាទរយ៉ាងកក់ក្តៅនៅលើទំព័រហ្វេសប៊ុកផ្លូវការរបស់លោក កាលពីថ្ងៃទី២៩ ខែមេសា ឆ្នាំ២០២៤ កន្លងទៅនេះ។

ឯកឧត្តមឯកអគ្គរដ្ឋទូត បានគូសបញ្ជាក់យ៉ាងដូច្នេះថា៖ "សូមអបអរសាទរយ៉ាងកក់ក្តៅចំពោះក្រសួងមហាផ្ទៃកម្ពុជា បានចុះហត្ថលេខាលើកិច្ចព្រមព្រៀងសហប្រតិបត្តិការជាយុទ្ធសាស្ត្រនៅទីក្រុងភ្នំពេញ ជាមួយសាកលវិទ្យាល័យវិជ្ជាជីវៈនិងបច្ចេកទេសណាននីង ប្រទេសចិន លើវិស័យបញ្ញាសិប្បនិម្មិត និងយន្តហោះដ្រូន។"

ជាមួយគ្នានេះ ឯកឧត្តមក៏បានសង្កត់ធ្ងន់ពីការប្តេជ្ញាចិត្តរបស់រដ្ឋាភិបាលប៉េកាំង ដោយបញ្ជាក់បន្ថែមថា "ភាគីចិននឹងបន្តគាំទ្រដល់ការផ្លាស់ប្តូរឌីជីថលរបស់ប្រទេសកម្ពុជា"។

កិច្ចសហប្រតិបត្តិការថ្មីនេះ គឺជាសក្ខីភាពមួយទៀតដែលឆ្លុះបញ្ចាំងពីការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ជាពិសេសនៅក្នុងការជំរុញនវានុវត្តន៍ និងការធ្វើទំនើបកម្មស្ថាប័នរដ្ឋ ស្របតាមទិសដៅនៃការកសាងរដ្ឋាភិបាលឌីជីថលនៅកម្ពុជា៕