ជាទូទៅ បងប្អូនដែលចង់ផ្ទេរកម្មសិទ្ធយានយន្តគឺមានភាពលំបាក ព្រោះតែមិនដឹងអំពីឯកសារដែលត្រូវបានតម្រូវទៅតាមដំណើរនៃការផ្ទេរកម្មសិទ្ធយានយន្ត ។ ដូច្នេះថ្ងៃនេះ Technology Cambodia នឹងលើកយកនូវឯកសារចំនួន៨ ដែលត្រូវមានចាំបាច់នៅពេលបងប្អូនចង់ផ្ទេរកម្មសិទ្ធិយានយន្ត និងមានភាពរហ័ស ងាយស្រួល មិនរញ៉ែរញ៉ាយច្រើនឡើយ ។
បើយោងតាមការចេញផ្សាយពីក្រសួងសាធារណការ និងដឹកជញ្ជូន កាលពីពេលថ្មីៗនេះ បានឲ្យដឹងថា បែបបទ និងនីតិវិធីផ្ទេរកម្មសិទ្ធយានយន្តសម្រាប់ពលរដ្ឋខ្មែរ គឺតម្រូវឲ្យមានឯកសារទាំង ៨ខាងក្រោម៖
-ពាក្យសុំផ្ទេរកម្មសិទ្ធិ ដែលមានលេខកាល់លេខតួ ឬលេខសាក់ស៊ី (ដែលចម្លងជាក់ស្តែងពីយានយន្ត)
-អត្តសញ្ញាណអ្នកលក់ និងអ្នកទិញ៖
*ពលរដ្ឋខ្មែរ៖ អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)
-បណ្ណសម្គាល់យានជំនិះ (ច្បាប់ដើម) និងផ្លាកលេខសម្គាល់យានជំនិះ (ករណីផ្ទេរកម្មសិទ្ធិឆ្លងរាជធានី-ខេត្ត)
-វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ (លើកលែងទោចក្រយានយន្ត)
-លិខិតលក់ទិញ ត្រូវធ្វើឡើងនៅទីតាំងផ្តល់សេវាសាធារណៈ និងចំពោះមុខមន្រ្តីមានសមត្ថកិច្ចផ្ទេរកម្មសិទ្ធិយានជំនិះ
-កិច្ចសន្យាធានាដែលមានបញ្ជាក់ពីប៉ុស្តិ៍នគរបាលរដ្ឋបាលដែលខ្លួនរស់នៅ (ករណីមិនមានម្ចាស់ដើម)
-បង្កាន់ដៃពន្ធផ្លូវ (ក្នុងពេលប្រមូលពន្ធមធ្យោបាយយានយន្ត)
-ក្នុងករណីអាសយដ្ឋានបច្ចុប្បន្ន ខុសពីអាសយដ្ឋានដែលមាននៅក្នុងអត្តសញ្ញាណប័ណ្ណសញ្ជាតិខ្មែរ ត្រូវភ្ជាប់សៀវភៅគ្រួសារ ឬសៀវភៅស្នាក់នៅ ដែលមានបញ្ជាក់ពីអាជ្ញាធរមានសមត្ថកិច្ច។
គួរបញ្ជាក់ផងដែរថា ចំពោះកម្រៃសេវាសម្រាប់យានយន្តដែលផ្ទេរកម្មសិទ្ធក្នុងរាជធានី-ខេត្ត មានកម្រៃសេវា ៤៨.០០០ រៀល និងសម្រាប់យានយន្តដែលផ្ទេរកម្មសិទ្ធឆ្លងរាជធានី-ខេត្តមានកម្រៃសេវា ១០១.០០០ រៀល (មិនបូកបញ្ចូលពន្ធប្រថាប់ត្រា ៤%) ៕
អត្ថបទដោយ៖ ព្រឹម ភក្តី
