ប្លែកខ្លាំងណាស់ ឡានអគ្គិសនីនេះ ទំហំតូចខ្លាំងមែនទែន តែសមត្ថភាពមិនចាញ់ប្រភេទរថយន្ត SUV ធំៗ ឡើយដោយគេបានបំពាក់មកជាមួយទំហំថាមពលអាគុយខ្លាំង ព្រមទាំងប្រព័ន្ធបច្ចេកវិទ្យាទំនើបដូចទៅនឹងឡានអគ្គិសនីទូទៅផងដែរ ប៉ុន្តែតម្លៃមិនធម្មតាៗ ដូចដែលលោកអ្នកគិតនោះទេ ឃើញតូចចឹងមែនតម្លៃវិញ ១៥៥០០ ដុល្លារ ។
បើយោងតាមការចុះផ្សាយពីគេហទំព័រក្រៅមួយឈ្មោះ Carbuzz.com បានឲ្យដឹងថា កូនឡានអគ្គិសនីដែលមានមាឌតូចជាងចង្អៀតនេះ ផ្ទុះការចាប់អារម្មណ៍ខ្លាំងនៅប្រទេសប៉ែកខាងអឺរ៉ុប ព្រមទាំងមានការស៊ែរតៗចែកគ្នាមើលពេញបណ្ដាញសង្គម ប៉ុន្តែមនុស្សតិចណាស់បានត្រឹមតែមើល ហើយក៏ដើរចេញបាត់ ។ ផ្ទុយមកវិញ យោងតាមទិន្នន័យដែលប្រភពខាងលើបានបង្ហាញចំនួននៃការកក់ទុករបស់រថយន្ត Microlino នេះឡើងដល់ ៣០០០០ គ្រឿង ឯណោះ ។
រថយន្តអគ្គិសនីនេះ ត្រូវបានខ្ចី ខនសិប ពីពពួកឡាន Supercar ដោយបានបំពាក់មកជាមួយកៅអីស្បែកសម្រាប់មនុស្សអង្គុយ ២នាក់យ៉ាងទូលាយ ទូលាយដល់ថ្នាក់មានកាប៊ីនឃ្លុបក្រោយដែលអាចដាក់សម្ភារ: បានច្រើនដូចទៅនឹងរូបភាពខាងក្រោមនេះអ៊ីចឹង ។
រីឯទំហំរបស់រថយន្តអគ្គិសនីតូចនេះ ខាងក្រុមហ៊ុនមិនបានបញ្ចេញច្បាស់នៅឡើយតែ គ្រាន់តែគេបង្ហាញនូវរូបភាព២ ទៅ ៣ សន្លឹក ដោយមានឡានបីគ្រឿងដាក់តម្រៀបគ្នាជាជួរលើចំណត់ឡានតែមួយ ដូច្នេះសបញ្ជាក់ឲ្យដឹងថា រថយន្តតូចច្រឡឹងនេះស្មើនឹង ១ ភាគ ៣ នៃរថយន្តប្រភេទធម្មតាមួយគ្រឿង ។
មិនទាន់អស់នៅឡើយទេ ចំណែកកម្លាំង អាគុយរបស់ក្រុមហ៊ុន Micro នេះអាចផ្តល់នូវថាមពលដែលឲ្យរថយន្តនេះបើកបរបានចម្ងាយដល់ ២៣០ គម ឯណោះ ។ ចំពោះការសាកអាគុយវិញនោះ ប្រើពេលតែ ៤ ម៉ោង សម្រាប់ការសាកលើខ្សែសាក AC ឬភ្លើងរដ្ឋនៅតាមផ្ទះ ។ លើសពីនេះ រីឯល្បឿនខ្ពស់បំផុតរបស់ Microlino នេះអាចឲ្យអ្នកបើកបរជាន់មួយបែកញើសបានត្រឹមតែ ៩០ គ.ម /ម៉ ប៉ុណ្ណោះ ។
គូសបញ្ជាក់ផងដែរ រថយន្តអគ្គិសនីតូច Cute នេះកាលពីឆ្នាំ២០១៨ ក៏បានខកខានបង្ហាញមុខនៅលើទីផ្សារ ទើបតែបច្ចុប្បន្ននេះទេបានសម្រេចចិត្តត្រឹមត្រូវបង្ហាញរូបរាងដ៏គួរឲ្យស្រលាញ់មួយនេះមក ហើយរថយន្តនេះក៏កំពុងត្រៀមខ្លួននាំចេញទៅ ៣ ប្រទេសធំ រួមមាន អាល្លឺម៉ង អ៊ីតាលី និងប្រទេសស្វីស ផងដែរ ៕
អត្ថបទដោយ៖ ព្រឹម ភក្តី
