កម្ពុជាកាន់តែទំនើប ថែមទាំងមានភាពទាក់ទាញយ៉ាងខ្លាំងពីសំណាក់អ្នកវិនិយោគក្រុមហ៊ុនធំៗ ជាច្រើនមកពីគ្រប់ទិសទី ជាក់ស្តែងកាលពីពេលថ្មីៗនេះ ក្រុមហ៊ុនជំនាញស្ថានីយសាកថ្មរថយន្តអគ្គិសនីដ៏ធំមួយរបស់ប្រទេសឡាវ គឺ LOCA មានគម្រោងចង់វិនិយោគមកកាន់ប្រទេសកម្ពុជា ។
បើយោងតាមការចុះផ្សាយពីក្រសួងសាធារណការ និងដឹកជញ្ជូន បានឲ្យដឹងនៅថ្ងៃទី២៩ ខែមីនា ឆ្នាំ២០២៣ ថា ក្រុមហ៊ុន LOCA បានអញ្ជើញចូលជួបសម្ដែងការគួរសម និងណែនាំពីគោលបំណងរបស់ខ្លួនក្នុងការសិក្សាពីឱកាសវិនិយោគ ព្រមទាំងស្វែងយល់បន្ថែមពីច្បាប់ និងតម្រូវការឯកសារគតិយុត្តផ្សេងៗ អនុញ្ញាតឱ្យក្រុមហ៊ុនអាចត្រៀមខ្លួនបានរួចរាល់ សមស្របនឹងតម្រូវការក្នុងការវិនិយោគនៅកម្ពុជា។
ក្នុងជំនួបនេះ តំណាងក្រុមហ៊ុន LOCA បានធ្វើបទបង្ហាញពីព័ត៌មានសំខាន់ៗ និងទិសដៅរបស់ក្រុមហ៊ុនក្នុងការផ្ដល់ជូននូវសេវាកម្មផ្សេងៗ ដែលជាចំណែកចូលរួមកាត់បន្ថយការបំភាយឧស្ម័នពុល (Co2) ចូលទៅស្រទាប់បរិយាកាស និងលើកកម្ពស់ការប្រើប្រាស់រថយន្តអគ្គិសនី ដោយក្រុមហ៊ុនក៏បានភ្ជាប់ផងដែរ ពីបច្ចុប្បន្នភាពនៃការប្រើប្រាស់រថយន្តអគ្គិសនីក្នុងសាធារណរដ្ឋប្រជាធិបតេយ្យប្រជាមានិតឡាវ។
ជាការឆ្លើយតប ថ្នាក់ដឹកនាំក្រសួង បានយល់ព្រមក្នុងការសហការការងារបន្ត និងណែនាំបន្ថែមលើការរៀបចំឯកសារជាតម្រូវការចាំបាច់សម្រាប់ការវិនិយោគនៅកម្ពុជា ព្រមទាំងធ្វើការស្នើសុំឱ្យក្រុមហ៊ុនចែករំលែកនូវបច្ចេកវិទ្យាថ្មីៗមកកម្ពុជាសំដៅជំរុញលើកកម្ពស់ការប្រើប្រាស់យានយន្តអគ្គិសនី។
ម្យ៉ាងវិញទៀត ថ្នាក់ដឹកនាំក្រសួងក៏បានឆ្លៀតយកឱកាសនេះជម្រាបជូនអំពីទិសដៅរបស់កម្ពុជា ដែលបច្ចុប្បន្នកំពុងលើកទឹកចិត្តប្រជាពលរដ្ឋក្នុងការប្រើប្រាស់យានយន្តអគ្គិសនី និងបើកឱកាសយ៉ាងទូលាយឱ្យវិនិយោគគិនអាចចូលមកវិនិយោគបន្ថែមលើវិស័យយានយន្តអគ្គសនីនៅកម្ពុជាផងដែរ។
គួរជំរាបផងដែរថា បច្ចុប្បន្ន រដ្ឋមានស្ថានីយសាកថ្មរថយន្តអគ្គិសនីចំនួន ៤កន្លែង ដូចជា ក្នុងទីស្ដីការក្រសួងសាធារណការ និងដឹកជញ្ជូន, ក្រុងសៀមរាប(ខេត្តសៀមរាប), ផ្សារទំនើប ហ្វូរី ថាម សឃ្វែរ ម៉ល (ខេត្តព្រះសីហនុ), ខេត្តបាត់ដំបង (គ្រោងនឹងសម្ភោធជាផ្លូវការនាពេលឆាប់ៗខាងមុខនេះ) រួមទាំងរបស់ឯកជនសរុបជាង ៥កន្លែងបន្ថែមទៀត ៕
អត្ថបទដោយ៖ ព្រឹម ភក្តី
