កន្លងទៅ មានករណីឆេះរថយន្ត កើតឡើងលើផ្លូវល្បឿនលឿន ដែលគេស្គាល់ភាគច្រើនជារថយន្តម៉ាក់ Land Rover ។ ហើយក៏មានមតិមហាជនជាច្រើនកើតចម្ងល់ជាខ្លាំងអំពីឡានទំនើប និងតម្លៃថ្លៃ ហេតុអ្វីបានជាងាយនឹងឆេះស្រួលៗបែបនេះ ។ ហេតុដូច្នេះហើយទើបខាងក្រុមហ៊ុន Jaguar Land Rover (JLR) ចេញមកបកស្រាយ និងប្រាប់ពីបញ្ហាបច្ចេកទេសមួយចំនួនដែលបង្កឲ្យមានឆាបឆេះរថយន្ត នេះកើតឡើង។
យោងតាមការថ្លែងក្នុងសន្និសីទការសែត លោក BIJU NARAYANAN នាយកគ្រប់គ្រងទូទៅរថយន្ត LAND ROVER CAMBODIA បានបកស្រាយថា៖ “យើងខ្ញុំសប្បាយចិត្ត នៅពេលឃើញប្រជាពលរដ្ឋកម្ពុជាជាច្រើនប្រើប្រាស់រថយន្ត Range Rover។ ក៏ប៉ុន្តែ យើងឃើញថារថយន្តទាំងនោះមួយចំនួនមិនបានជាវពីយើងដែលតំណាងចែកចាយជាផ្លូវការនោះទេ។
រាល់រថយន្ត ដែលមិនបាននាំចូលពីតំណាងចែកចាយជាផ្លូវការគឺមិនមានការបំពាក់មកនូវស្ពិករថយន្ត គ្រឿងម៉ាស៊ីន កម្មវិធី និងការបញ្ចេញឧស្ម័នឱ្យបានត្រឹមត្រូវ ដែលមានការទទួលស្គាល់ពីរោងចក្រផ្ទាល់ក្នុងការប្រើប្រាស់សម្រាប់ទីផ្សារប្រទេសកម្ពុជានោះឡើយ។ ពួកយើងសូមបញ្ជាក់ថា រថយន្តដែលជួបឧបទ្ទវហេតុឆេះនៅលើផ្លូវល្បឿនលឿន គឺមិនមែននាំចូលពីក្រុមហ៊ុន RMA Cambodia ដែលជាតំណាងចែកចាយផ្លូវការនោះឡើយ។
ពួកយើងបានពិនិត្យមើលក្នុងប្រព័ន្ធផ្លូវការរបស់ Jaguar Land Rover (JLR) ហើយយើងបានរកឃើញថា យានយន្តទាំងនោះត្រូវបានចែកចាយពីប្រទេសផ្សេង។ លើសពីនេះទៅទៀត រថយន្តទាំងនោះ គឺមិនដែលមានប្រវត្តិត្រួតពិនិត្យនៅមជ្ឈមណ្ឌលថែទាំរថយន្តរបស់ JLR នោះទេ។ កង្វះការថែទាំឱ្យបានត្រឹមត្រូវ ការមិនប្រើគ្រឿងបន្លាស់ពិតប្រាកដ និងជាងជំនាញបច្ចេកទេស ដែលមានសមត្ថភាព អាចបណ្តាលឱ្យមានគ្រោះថ្នាក់យ៉ាងខ្លាំង»។
អត្ថបទ៖ ព្រឹម ភក្តី
