ថ្មីៗនេះ ក្រុមហ៊ុន Lamborghini ទើបតែបញ្ចេញនូវឡានស្ព័រម៉ូដែលថ្មីមួយគ្រឿងដែលបំពាក់មកជាមួយនឹងម៉ាស៊ីន V12 hybrid ដំបូងគេបង្អស់មិនធ្លាប់មានមុនមក ដែលមានម៉ូទ័រអគ្គិសនីភ្ជាប់មកជាមួយដែរ។ អ្វីដែលនឹកស្មានមិនដល់ និងមិនគួរឲ្យជឿនោះ វាកើតឡើងហើយ អាគុយសម្រាប់អូសកម្លាំងភ្លើងម៉ូទ័រនោះ អាចឲ្យឡានរត់បានតែ ១០គ.ម ប៉ុណ្ណោះ។
យោងតាមគេហទំព័រ Theverge បានឲ្យដឹងថា ក្រុមហ៊ុន Lamborghini បានបញ្ចេញនូវឡានស្ព័រ ១ម៉ូដែលទៀតឈ្មោះថា Lamborghini Revuelto ស៊េរីឆ្នាំ២០២៣ ដែលប្រើនូវបច្ចេកវិទ្យា Plug-in Hybrid អាចសាកថ្មពីខាងក្រៅបានដូចឡានអគ្គិសនីដែរ។ ចំពោះអាគុយដែលបានបំពាក់លើឡាននេះ ត្រូវបានគេដឹងថា គឺមានទំហំ 3.8Kwh តែប៉ុណ្ណោះ ដោយសាកថ្មមួយពេញអាចរត់ចម្ងាយបានតែ ១០គ.ម។
ដោយឡែកសម្រាប់ Performance របស់ឡាននេះ ត្រូវបានបំពាក់ជាមួយនឹងម៉ាស៊ីនចំណុះ ៦,៥លីត្រ ស៊ីឡាំង V12 មានកម្លាំង ១០០០សេះ និងមានកម្លាំងរមួល ៧២៥ ញ៉ូតុនម៉ែត្រ ហើយសម្រាប់ល្បឿនស្ទុះវិញគឺលឿនមែនទែន ពី ០-១០០គ.ម/ម៉ ចាយពេលតែ ២,៥វិនាទី តែប៉ុណ្ណោះ លឿនជាង Aventador ០,៣វិនាទី ព្រមទាំងមានល្បឿនលឿនបំផុត Top Speed 350Km/h ។ មួយវិញទៀតសម្រាប់ម៉ូដែលឡានបន្ទាប់ដែលត្រូវបំពាក់ជាមួយម៉ាស៊ីន Hybrid គឺ Aventador និង Urus ដែលយើងអាចនឹងឃើញនៅចុងឆ្នាំ២០២៣ ខ្ទង់ខែសីហា និងតុលា។
គួរជំរាបផងដែរថា Lamborghini Revuelto នឹងដាក់លក់ក្នុងតម្លៃដើមអូសចេញពីរោងចក្រភ្លាមៗ គឺ ៥៤២.១៦៥ដុល្លារ ៕
អត្ថបទដោយ៖ ព្រឹម ភក្តី
