ផ្តើមចេញពីក្តីស្រមៃ ពីកុមរា វ័យ ១៥ឆ្នាំ ឈ្មោះថា ធួន កូលេន ដែលជាអ្នកនៅខេត្តបាត់ដំបង ចាកចេញពីស្រុកកំណើត និងគ្រួសារទាំងវ័យក្មេង ឡើងមកទីក្រុង ធ្វើការជាកូនឈ្នូលជាងឡានមួយកន្លែង ឆ្លងកាត់រឿងរ៉ាវជីវិតជាច្រើនរាប់មិនអស់ រហូតមកដល់បច្ចុប្បន្ននេះ ក្លាយជាម្ចាស់ហ្ការ៉ាសលក់ឡានមួយកន្លែងឈ្មោះថា Kolen27 ។
“អត់ធ្មត់ដើម្បីសម្រេចគោលដៅ” ជាពាក្យពោលចេញពីមាត់ អតីតជាកូនឈ្នូលជាងឡានម្នាក់នេះ កន្លងផុតអស់កាលជាង ១១ ឆ្នាំ កុមារវ័យ ១៥ឆ្នាំដែលធ្លាប់ជាកូនឈ្នូលជាងឡាននៅផ្សារដេប៉ូ គាត់បានក្លាយជាមេធំកាន់កាប់ហ្ការ៉ាសលក់ឡានធំមួយ ក៏ដូចជាអ្នកប្រឹក្សាដ៏ជំនាញលើវិស័យយានយន្តផងដែរ។
យោងតាមបទសម្ភាសន៍រវាងម្ចាស់ហ្ការ៉ាសលក់ឡាន Kolen 27- កូលែន27 លោក ធួន កូលេន នឹងក្រុមការងារចាបខៀវ-Technology Cambodia បានឲ្យដឹងថា អ្វីដែលធ្វើឲ្យគាត់មានមុខរបរលក់ឡានមួយក្នុងដៃ គឺដោយសារតែមួយជំហានដំបូងកាលពីរូបគាត់មានអាយុ ១៥ឆ្នាំ ដែលហ៊ានលះបង់ភាពយុវវ័យ មកចូលធ្វើការជួសជុលម៉ូតូ ឡាន មួយកន្លែងនៅផ្សារដេប៉ូ ។
គាត់ក៏បានបន្តនិយាយទៀតថា “ គាត់ធ្លាប់ជាបុគ្គលិកនៅក្រុមហ៊ុនរបស់អ៊ីតាលីមួយកន្លែងបានជាង ២ឆ្នាំ កាន់ផ្នែកមេកានិចដែលទទួលបានប្រាក់បៀវត្សន៍ខ្ទង់ពាន់ដុល្លារ ប៉ុន្តែដោយសារក្តីស្រមៃធំចង់មានជំនាញនិងមានរបរខ្លួនឯង រូបលោកបានសុខចិត្តលាលែងការងារកន្លែងចាស់ មកចាប់ផ្តើមជីវិតជាមួយ អ្នកលក់ឡានតាមហ្ការ៉ាសឲ្យគេទោះជាប្រាក់នៅទីនេះតិចជាងពាក់កណ្តាលក្តីក៏គាត់សុខចិត្តនឹងធ្វើវាដែរ។
មួយរយ:ក្រោយមកដោយសារការរៀនសូត្រពីការងារ និងមនុស្សជំវិញខ្លួនច្រើន ផ្គួបផ្សំជាមួយជំនាញទំនាក់ទំនងរបស់គាត់ដ៏ប៉ិនប្រសព្វទៀតនោះ រូបគាត់បានសម្រេចចិត្តឈប់ធ្វើការឲ្យគេ មកបើកមុខរបរលក់ឡានខ្លួនឯងវិញម្តង។
បន្ថែមលើពីនេះ គាត់ក៏មានសារខ្លះចង់ប្រាប់ទៅកាន់យុវជនទាំងអស់ដែលកំពុងតែសិក្សា ឬកំពុងធ្វើការឲ្យគេ និងបងប្អូនដែលមានគម្រោងចង់ចេញរកស៊ី បង្កើតមុខរបរ Start-up ថា ចំណេះដឹងមួយមុខមិនអាចកែប្រែវាសនាយើងឲ្យក្លាយជាអ្នកមានបានឡើង លុះត្រាតែមានបទពិសោធន៍ច្រើនផ្សំជាមួយ ទើបផ្លូវដែលប្រុងដើរនៅខាងមុខវាមិនក្រហិកក្រហុកដូចផ្លូវសំបកមាន់។
ជាកិច្ចសម្ភាសន៍ចុងបញ្ចប់ លោក ធួន កូលេន បានផ្តាំនូវរូបមន្តរកស៊ីធូរមួយចំណុចគឺ “ការចេះទំនាក់ទំនង” ។ទំនាក់ទំនងពិតជាសំខាន់ខ្លាំងមែនទែន ពេលខ្លះយើងមានលុយច្រើន មិនប្រាកដថាយើងមានទំនាក់ទំនងច្រើនឡើង តែរបស់ពីរហ្នឹងបើបាននៅជាមួយហើយនោះ អ្វីៗវានឹងល្អប្រសើរ បញ្ហាទាំងឡាយដោះស្រាយមិនពិបាក ហើយជំនួញរកស៊ីចេះតែរលូតទៅមុខជាលំដាប់។
គួរជំរាបផងដែរថា Kolen 27 ជាកន្លែងលក់ឡានមួយទឹកនិងថ្មីនាំចូលពីសហរដ្ឋមេរិកដែលអាចជឿទុកចិត្តបាន ។ ដូច្នេះប្រសិនជាបងប្អូនចាប់អារម្មណ៍ចង់ទិញឡានមួយទឹក គ្រប់ម៉ូដ គ្រប់ម៉ាក អាចសាកសួរសុំយោបល់ពីលោក ធួន កូលេនបាន តាមរយ:លេខទូរស័ព្ទ 096 714 58 65 ឬអាចចុះទៅកាន់ទីតាំងហ្ការ៉ាសឡានរបស់ Kolen27 ផ្ទាល់ ក៏បាននៅតាមបណ្តោយផ្លូវហាណូយ ៕
អត្ថបទដោយ៖ ព្រឹម ភក្តី
