នេះបានហៅថាកំពូលអ្នកច្នៃម៉ូដដ៏ខ្លាំងពិតមែន ក្រុមហ៊ុន Kia បង្ហាញរូបភាពប៉ុន្មានសន្លឹកនៅ Kia China day ដែលស្តែងចេញពីគំនិតនៃការឌីហ្សាញយ៉ាងទំនើបអស្ចារ្យជាមួយនឹង Concept ឡានអនាគត SUV ដែលប្រើអគ្គិសនិសុទ្ធ ១០០% ។
យោងតាមប្រភពពី electrek.co បានឲ្យដឹង ក្រុមហ៊ុនកូរ៉េខាងត្បូង Kia បានបង្ហាញនូវរថយន្តអគ្គិសនីថ្មីប្រភេទ SUV គឺ Kia EV5 ដែលជាConcept នៃការឌីហ្សាញបែបអនាគត បញ្ជាក់ពីអត្តសញ្ញាណរបស់អាស៊ី ពោលគឺផ្នែកខាងក្នុងរបស់រថយន្តមានលក្ខណ: ទទេស្អាត គ្មាននូវប៊ូតុងរញ៉េញ៉ៃអ្វីឡើយ សូម្បីតែចង្កូតក៏មានរាងអក្សរ D មើលទៅប្រណិតមែនទែន។
មិនត្រូវប៉ុណ្ណោះ កៅអីទាំង ៤ របស់ Kia EV5 ត្រូវឌីហ្សាញមកអាចបញ្ជារវង្វិល ៣៦០ដឺក្រេ និងទ្វារថយន្តក៏មានការឌីហ្សាញបែបចំហ អាចបើកបានម្តងទាំងពីរ ដូចនឹងរថយន្តរបស់ Roll-Royce អ៊ីចឹងដែរ ។ យ៉ាងណាមិញ ថ្មីៗនេះ Kia ទើបតែប្រកាសនូវការដាក់ឲ្យបង្ហាញមុខមាត់ពិត រថយន្តអគ្គិសនី Kia EV9 ជាផ្លូវការនៅក្នុងខែមេសា ឆ្នាំ២០២៣ ។
គួរជំរាបផដែរថា សម្រាប់ Kia EV5 មិនទាន់មានព័ត៌មានច្បាស់ណាមួយអំពី Space ឡើយ សូម្បីទំហំថ្ម និងថាមពលរត់ចម្ងាយបានប៉ុន្មានគីឡូម៉ែត្រ ក៏មិនទាន់បានបញ្ជាក់នៅឡើយទេ ប៉ុន្តែសម្រាប់ Kia EV6 ខាង Kia បានបង្ហើបប្រាប់ថា អាចរត់បានចម្ងាយ ៣១០ម៉ាយ ឬជិត ៥០០គ.ម ៕
អត្ថបទដោយ៖ ព្រឹម ភក្តី