កាលពីថ្ងៃសៅរិ៍ទី១៤ ខែឧសភា ឆ្នាំ២០២២ កន្លងទៅនេះ ប្រធានាធិបតីនៃប្រទេសឥណ្ឌូនេស៊ីលោក Joko Widodo បានស្កាត់ទៅជួបកំពូលមហាសេដ្ឋី Elon Musk នៅក្នុងរដ្ឋតិចសាស សហរដ្ឋអាម៉េរិក ដើម្បីពិភាក្សាគ្នាលើគម្រោងវិនិយោគ រោងចក្រ Tesla នៅលើទឹកដីប្រទេសឥណ្ឌូនេស៊ីផ្ទាល់ នេះបើយោងតាមការចុះផ្សាយរបស់ wionews។
នៅក្នុងជំនួបដ៏កម្រនេះ គេឃើញលោក Joko Widodo ពាក់អាវក្រណាត់ពណ៌ស មូរដៃអាវ តាមបែបសាមញ្ញធម្មតា ក្នុងដំណើរទន្ទឹមគ្នាមួយកំពូលមហាសេដ្ឋី Elon Musk នៅឯរោងចក្រឡានអគ្គិសនី Tesla។ ការជួបគ្នានេះ ត្រូវបានមន្ត្រីឥណ្ឌូនេស៊ីប្រាប់កាសែតរ៉យទ័រថា លោក Elon Musk បានរៀបចំកិច្ចពិភាក្សាមួយស្ដីពីការវិនិយោគលើវិស័យឧស្សាហកម្មនីកែលក្នុងប្រទេសឥណ្ឌូនេស៊ី ជាពិសេសគឺការផលិតអាគុយសម្រាប់រថយន្តអគ្គិសនីផ្ទាល់។
គូសបញ្ជាក់ថាលោក Joko Widodo និងលោក Elon Musk កំពុងចរចាគ្នាដើម្បីដាក់រោងចក្រ Tesla ក្នុងប្រទេសឥណ្ឌូនេស៊ីដែលនេះគឺជាប្រទេសក្នុងអាស៊ីដំបូងគេ ដែលមានរោងចក្រ Tesla ឈរជើង។
អត្ថបទដោយ៖ ផែន ផាន់ណា
