យោងតាមកញ្ចប់ថវិកាជាតិឆ្នាំ ២០២៦-២០២៧ ដែលទើបប្រកាសដោយក្រសួងហិរញ្ញវត្ថុឥណ្ឌា កាលពីថ្ងៃទី ០១ ខែកុម្ភៈ ម្សិលមិញនេះ រដ្ឋាភិបាលបានសម្រេចធ្វើវិសោធនកម្មច្បាប់ពន្ធដារយ៉ាងសំខាន់។ ច្បាប់ថ្មីនេះអនុញ្ញាតឱ្យក្រុមហ៊ុនបរទេស (ដូចជា Apple) អាចផ្ដល់គ្រឿងចក្រ និងឧបករណ៍បច្ចេកវិទ្យាទំនើបៗដល់រោងចក្រម៉ៅការក្នុងស្រុក (ដូចជា Foxconn និង Tata) ដោយ “មិនចាំបាច់បង់ពន្ធលើចំណូល” ក្នុងរយៈពេល ៥ ឆ្នាំពេញ។

បើយោងតាមការស្រាវជ្រាវពី Counterpoint Research បានឱ្យដឹងថា ចំណែកទីផ្សាររបស់ iPhone នៅក្នុងប្រទេសឥណ្ឌាបានកើនឡើងទ្វេដងរហូតដល់ ៨% គិតចាប់តាំងពីឆ្នាំ ២០២២ មក។ ទោះបីជាបច្ចុប្បន្ន ប្រទេសចិននៅតែគ្រប់គ្រងការដឹកជញ្ជូន iPhone ទូទាំងពិភពលោករហូតដល់ ៧៥% ក៏ដោយ ប៉ុន្តែចំណែកផលិតកម្មរបស់ប្រទេសឥណ្ឌាបានកើនឡើងខ្លាំងរហូតដល់ ៤ ដង ពោលគឺឡើងដល់ ២៥% គិតចាប់តាំងពីឆ្នាំ ២០២២ មកម្លេះ។

ការលើកលែងពន្ធនេះអនុវត្តចំពោះតែរោងចក្រដែលស្ថិតក្នុង "តំបន់ឃ្លាំងគយពិសេស" (Customs-bonded areas) ប៉ុណ្ណោះ។ ប្រសិនបើផលិតដើម្បីនាំចេញទៅក្រៅប្រទេស នោះនឹងចំណេញពន្ធមហាសាល តែប្រសិនបើផលិតក្នុងតំបន់នេះហើយយកមកលក់ក្នុងប្រទេសឥណ្ឌា វានឹងត្រូវជាប់ "ពន្ធនាំចូល" ដដែល។ ឥណ្ឌាចង់ឱ្យ Apple ប្រើប្រាស់ដីឥណ្ឌាជា "មជ្ឈមណ្ឌលផលិតកម្មសកល" ដើម្បីប្រកួតប្រជែងជាមួយរោងចក្រនៅចិន និងវៀតណាម។

គូសបញ្ជាក់ផងដែរថា រដ្ឋាភិបាលឥណ្ឌាកំពុងប្រាប់ Apple ថា "អ្នកគ្រាន់តែយកបច្ចេកវិទ្យា និងគ្រឿងចក្រមក ចំណែករឿងពន្ធ និងកម្លាំងពលកម្ម យើងជាអ្នកជួយសម្រួល" ដើម្បីគោលដៅនាំចេញ iPhone ទៅកាន់ពិភពលោក នេះជាប្រកួតប្រជែងសង្រ្គាមសេដ្ជកិច្ចរវាងចិន និងជាយុទ្ធសាស្ត្រថ្មីទាក់ទាញ Apple ឱ្យចាកចេញពីចិនទាំងស្រុង តាមរយៈការលើកលែងពន្ធ។