កាលពេលពីថ្មីៗនេះ នៅថ្ងៃទី២១ ខែកញ្ញា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល នៃក្រសួងសាធារណការ និងដឹកជញ្ជូន បានដឹកនាំក្រុមការងារ ក៏ដូចជាមន្ត្រីរាជ្ជការជាច្រើននាក់បានចុះទៅត្រួតពិនិត្យជាចុងក្រោយនៃផ្លូវល្បឿនលឿនភ្នំពេញ-ព្រះសីហនុ ដែលមានប្រវែងផ្លូវសរុបទាំងអស់ប្រវែង១៨៧,០៥គីឡូម៉ែត្រ។
ឆ្លៀតឱកាសនៅពេលនោះផងដែរ ឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងប្រាប់ទៅកាន់សារព័ត៌មានឲ្យបានជ្រាបថា៖ សម្រាប់ផ្លូវល្បឿនលឿនពីភ្នំពេញទៅកាន់ក្រុងព្រះសីហនុ អាចបើកបរក្នុងល្បឿនអតិបរមា ១២០គ.ម/ម៉ ដោយឡែកចំពោះល្បឿនទាបបំផុតគឺអនុញ្ញាតត្រឹម ៦០ គ.ម/ម៉ ។
ទន្ទឹងនឹងនេះផងដែរ ក្រសួងសាធារណការ និងដឹកជញ្ជូន ក៏បានបញ្ចេញនូវសេចក្តីណែនាំអំពីការប្រើប្រាស់លើផ្លូវល្បឿនលឿនផងដែរ ក្នុងនោះក្រសួងបានបញ្ជាក់អំពី ការកំណត់ល្បឿនបើកបរលើយានយន្តទាំងគ្រប់ប្រភេទដូចខាងក្រោម៖
- សម្រាប់រថយន្តសណ្តោងសឺមីរ៉ឺម៉ក ឬសណ្តោងយានដំណើរកំសាន្ត ត្រូវបើកបរល្បឿនខ្ពស់បំផុតត្រឹម៨០គ.ម/ម៉ ។
- សម្រាប់រថយន្តធុនធ្ងន់ដែលមិនមានសណ្តោងសឺមីរ៉ឺម៉ក និងទោចក្រយានយន្ត ដែលមានទំហំស៊ីឡាំងចាប់ពី ៥០០cc ឬប្រើថាមពលអគ្គិសនីចាប់ពី ២៧គីឡូវ៉ាត់ឡើងទៅ ត្រូវបើកបរល្បឿនខ្ពស់បំផុតត្រឹម ១០០គ.ម/ម៉
- និងសម្រាប់រថយន្តធុនស្រាលគ្រប់ប្រភេទត ត្រូវបើកបរល្បឿនខ្ពស់បំផុតត្រឹម១២០គ.ម/ម៉ ។
ក្នុងករណីមានភ្លៀង ដែលមិនអាចមើលឃើញច្បាស់ក្នុងចម្ងាយប្រហែល ២០០ម៉ែត្រ អ្នកបើកបរយានយន្តត្រូវបើកភ្លើងកូត និងត្រូវបន្ថយល្បឿនដូចខាងក្រោម៖
-រថយន្តដែលអនុញ្ញាតឱ្យប្រើប្រាស់ល្បឿនអតិបរមា ៨០គ.ម/ម៉ ត្រូវ បន្ថយល្បឿនម៧០គ.ម/ម៉
-យានយន្តដែលអនុញ្ញាតឱ្យប្រើប្រាស់ល្បឿនអតិបរមា ១០០គ.ម/ម៉ ត្រូវបន្ថយល្បឿន មក ៩០គ.ម/ម៉
-រថយន្តដែលអនុញ្ញាតឱ្យប្រើប្រាស់ល្បឿនអតិបរមា ១២០គ.ម/ម៉ ត្រូវបន្ថយល្បឿនមក ១០០គ.ម/ម៉។
ក្នុងករណីមានភ្លៀងធ្លាក់ខ្លាំង ចុះអ័ព្ទ ដីហុយ ឬផ្សែងហុយ ដែលមិនអាចមើលឃើញច្បាស់ក្នុងចម្ងាយប្រហែល ៥០ម៉ែត្រ៖អ្នកបើកបរមិនត្រូវប្រើល្បឿនលើសពី ៥០គ.ម/ម៉ និងប្រហែល ៣០ម៉ែត្រអ្នកបើកបរមិនត្រូវប្រើល្បឿនលើសពី ៣០គ.ម/ម៉ ហើយត្រូវបើកភ្លើងកួត៕
អត្ថបទដោយ៖ ព្រឹម ភក្តី
