ថ្មីៗនេះ យោងតាមសម្តីរបស់ឯកឧត្តមទេសរដ្ឋមន្ត្រី ស៊ុន ចាន់ថុល បានឲ្យដឹងថា គ្រប់យានយន្តទាំងអស់ដែលកំពុងប្រើស្លាកលេខចាស់ៗ ដែលគ្មាន QR Code គឺលែងឲ្យប្រើប្រាស់ទៀតហើយ ខណ:ដែលក្រសួងសាធារណការ និងដឹកជញ្ជូនកំពុងគិតគូរជាមួយក្រសួងសេដ្ឋកិច្ច និងហិរញ្ញវត្ថុសិក្សារលើការ ផ្លាស់ប្តូរស្លាកលេខថ្មី ដែលមាន QR Code ជូនប្រជាពលរដ្ឋដោយឥតគិតថ្លៃ មួយកាក់មួយសេនឡើយ។
យោងតាមប្រភពដដែលបានឲ្យទៀតថា ដោយសារតែកន្លងមកមានជនខិលខូចមួយចំនួនបានក្លែងបន្លំនូវស្លាកលេខក្លែងក្លាយដែលយកមកប្រើប្រាស់ជាសាធារណ: ដូច្នេះក្រសួងបានមានគម្រោងនឹងឈប់ឲ្យប្រើនូវស្លាកលេខដែលគ្មាន QR Code ដោយតម្រូវឲ្យប្តូរមកប្រើនូវស្លាកលេខប្រភេទថ្មីដែលមាន QR Code និងបញ្ចូលនូវអាយដ្ឋានច្បាស់លាស់ ។
គួរជំរាបផងដែរថា ក្នុងការផ្លាស់ប្តូរស្លាកលេខថ្មី ដោយមិនគិតថ្លៃសេវា ក្រសួងសាធារណការ និងដឹកជញ្ជូន បានមានគម្រោងសហការជាមួយក្រសួងសេដ្ឋកិច្ច និងហិរញ្ញវត្ថុ ដើម្បីអនុវត្តន៍ចាត់ចែងថវិកាមួយចំនួនក្នុងដំណើរការនេះ៕
អត្ថបទដោយ៖ ព្រឹម ភក្តី