លាហើយឡានមួយទឹកចាស់ៗ ផុតឆ្នាំកំណត់នៃការប្រើប្រាស់ និងគ្មានលក្ខណ:បច្ចេកទេសត្រួតពិនិត្យត្រឹមត្រូវ ក្រសួងសាធារណការ និងដឹកជញ្ជូន មានគម្រោងនឹង បិទនាំចូលមកកាន់ស្រុកខ្មែរ ដើម្បីបញ្ជៀសរាល់គ្រោះថ្នាក់ចរាចរណ៍ ដែលកើតឡើងដោយសារ រថយន្តខ្វះលក្ខណ:បច្ចេកទេសត្រឹមត្រូវ។
យោងតាមកិច្ចសម្ភាសសារព័ត៌មាន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន ក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេស (ឆៀក) យានយន្ត សាខាសំរោងអណ្តែត កាលពីថ្ងៃទី ២១ មេសា ២០២៣ ឯកឧត្តមបានឆ្លើយថា៖ “ យើងបានកំពុងតែពិភាក្សាគ្នាជាមួយនឹងក្រសួងបរិស្ថាន និងក្រសួងសេដ្ឋកិច្ច និងហិរញ្ញាវត្ថុនឹងរៀបចំពិនិត្យមើល ថាតើឡានមួយទឹក ដែលមានអាយុប៉ុន្មាន? ឬចាស់ជាងហ្នឹង យើងនឹងមិនអនុញ្ញាតចូលទេ… កំពុងតែពិភាក្សាគ្នា តើ ១០ឆ្នាំ ១៥ឆ្នាំ ឬ ៧ឆ្នាំ យើងពិភាក្សាគ្នា” ។
ឯកឧត្តមក៏បានបន្ថែមទៀតថា ក្រសួងសាធារណការ កំពុងតែជម្រុសឲ្យប្រជាជនកម្ពុជាងាកមកប្រើប្រាស់រថយន្តដើរដោយថាមពលអគ្គិសនី ដោយសារតែតម្លៃថោក ព្រមទាំងបានរថយន្តថ្មី និងជួយកាត់បន្ថយការចំណាយថវិកាច្រើនជាងរថយន្តប្រើចំហេះក្នុង ។
គួរជំរាបផងដែរថា បច្ចុប្បន្ន កម្ពុជាមានស្ថានីយសាកថ្មរថយន្តអគ្គិសនីចំនួន ៤កន្លែង ដូចជា ក្នុងទីស្ដីការក្រសួងសាធារណការ និងដឹកជញ្ជូន, ក្រុងសៀមរាប(ខេត្តសៀមរាប), ផ្សារទំនើប ហ្វូរី ថាម សឃ្វែរ ម៉ល (ខេត្តព្រះសីហនុ), ខេត្តបាត់ដំបង (គ្រោងនឹងសម្ភោធជាផ្លូវការនាពេលឆាប់ៗខាងមុខនេះ) រួមទាំងរបស់ឯកជនសរុបជាង ៥កន្លែងបន្ថែមទៀត ៕
អត្ថបទដោយ៖ ព្រឹម ភក្តី
