នេះគឺជារថយន្តអគ្គិសនី Hongqi E-HS9 ដែលជាប្រភេទរថយន្ត SUV ៤កៅអី មានតម្លៃខ្ទង់ ១៨ម៉ឺនដុល្លារ សម្រាប់ទីផ្សារស្រុកខ្មែរ ហើយរថយន្តសេរីថ្មីមួយនេះទើបតែចូលមកដល់កម្ពុជាក្តៅៗ នៅឡើយទេ ដោយសារតែមានបច្ចេកវិទ្យាសាកថ្មតាមផ្ទះល្បឿនលឿន តែ២ម៉ោងពេញ អាចរត់បានចម្ងាយដល់ ៥១០គ.ម រួមទាំងការឌីហ្សាញរូបរាងដ៏ប្រណិត គឺចេញពីស្នាដៃអ្នកអាជីពរបស់ Rolls-Royce លោក Giles Taylor។
ចំពោះ Concept ឌីហ្សាញរូបរាងខាងក្រៅរបស់រថយន្ត Hongqi នាពេលបច្ចុប្បន្ននេះ ដែលវាស្រដៀងនឹងម៉ាយីហោល្បី Rolls-Royce គឺគិតរាប់ចាប់ពី លោក Giles Taylor ចូលមកដល់ក្រុមហ៊ុននេះ តាំងពីឆ្នាំ ២០១៩ មកម្ល៉េះ ។
ថ្វីត្បិតតែការចូលមកដល់របស់លោក Giles Taylor មានរយ:ពេលខ្ចីក៏ពិតមែន ប៉ុន្តែស្នាដៃដែលលោកបានកសាងជូនជាចំណងដៃដ៏ធំទៅកាន់ Hongqi នោះគឺ ការរចនាម៉ូតកូនកាត់តាមបែប Rolls-Royce ក៏ដូចជា Hongqi E-HS9 Flagship មួយនេះអ៊ីចឹង ដែលមានរហស្សនាមថា China Rolls-Royce ផងដែរ ។
ជាមួយនឹងការឌីហ្សាញផ្នែកខាងក្នុង រឹតតែអស្ចារ្យជាមួយកៅអីស្បែកគុណភាពខ្ពស់មិនចាញ់ រថយន្តរបស់ម៉ាកយីហោល្បីៗ ដូចជា Mercedes-benz និង Rolls-Royce ឡើយ ។ តួយ៉ាងដូចជាអេក្រង់ដ៏សែនធំ លាតសន្ធឹងពេញផ្ទៃតាប់ឡូតែម្តង ដោយគេបានបែងចែកអាក្រង់នេះ ជា ៣ប្លុកផ្សេងៗគ្នា សម្រាប់បញ្ជាក់លើបច្ចេកវិទ្យាទាំងមូលដែលមាននៅក្នុងរថយន្តនេះ ។
បន្ថែមលើពីនេះ បើយោងតាមការបកស្រាយរបស់លោក គង់ ប៊ុនធីម ដែលទីប្រឹក្សាលក់ប្រចាំក្រុមហ៊ុន Hongqi Cambodia បានប្រាប់មកសារព័ត៌មានចាបខៀវ (Technology Cambodia ) បានឲ្យដឹងថា ចំពោះ E-HS5 Flagship នេះត្រូវបានបំពាក់នូវប្រព័ន្ធ AI ថ្មីលើម៉ាស៊ីនត្រជាក់ ដោយបានដាក់នូវក្លិនចំនួន ៥ ក្លិន ហើយវាដំណើរបានដោយការចាប់ទឹកមុខអ្នកបើកបរ រួចវាក៏បញ្ចេញក្លិននីមួយៗទៅទឹកមុខអ្នកបើកបរ។
ម្យ៉ាងវិញទៀត គាត់ក៏បានបន្ថែមទៀតថា រាល់ការសាកថ្ម ទៅលើរថយន្តអគ្គិសនីមួយនេះ ដែលមានទំហំថ្មធំរហូតដល់ 99kwh ដែលអាចសាកថ្មក្នុងល្បឿនលឿនជាប្រភេទ AC (ប្រើឧបករណ៍ជំនួយ) ពី0 ទៅ ១០០% ចំណាយពេលតែ ៦ម៉ោងតែប៉ុណ្ណោះ រីឯការសាកថ្មមួយប្រភេទទៀតគឺលើខ្សែសាក DC ជាប្រភេទភ្លើងឆៅអាចបញ្ចូលថ្មល្បឿនលឿន ពី0 ទៅ ១០០% ចំណាយពេល ១ម៉ោងឬ២ម៉ោង អាស្រ័យលើប្រភពថាមពលដែលបានផ្តល់ឲ្យ ។
យ៉ាងណាមិញ សម្រាប់ការមកដល់ស្រុកខ្មែរ Hongqi បាននាំយកនូវម៉ូដែលសេរីខ្ពស់ជាងគេ ដោយការប្រើនូវាកម្លាំងម៉ូទ័រចំនួន២ ផ្គួបចូលគ្នាស្មើរនឹង 405kw និងកម្លាំងរមូរសរុប 750Nm ។
គួរជំរាបផងដែរ សម្រាប់បងប្អូនចង់ដឹងអំពីព័ត៌មានកាន់តែជាក់ច្បាស់ជាមួយនឹង Option ផ្សេងៗទៀត បងប្អូនអាចទៅកាន់ក្រុមហ៊ុន Hongqi Cambodia ដើម្បីសាកតេស្ត Drive ស្វែងរក Performance ចង់បានពីរថយន្តអគ្គិសនី E-HS9 Flagship មួយនេះ ៕
អត្ថបទដោយ៖ ព្រឹម ភក្តី
